ރާއްޖޭގައި ދެވޭ ލޮލުގެ ފަރުވާގެ ހިދުމަތްތައް އިތުރަށްފުޅާ ކުރުމަށް ލޮލުގެ ހާއްސަފަރުވާދޭ މަރުކަޒެއް ހުޅުމާލޭ ހޮސްޕިޓަލުގައި ގާއިމް ކުރުމަށް، މިނިސްޓްރީ އޮފް ހެލްތުއާއި ޗައިނާގެ ނޭޝަނަލް ހެލްތު އެންޑް ފެމިލީ ޕްލޭނިން ކޮމިޝަނާއި ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގައި މިނިސްޓްރީ އޮފް ހެލްތުގެ ފަރާތުން ސޮއި ކުރެއްވީ މިނިސްޓާ އޮފް ހެލްތު، އަބްދުﷲ އަމީނެވެ. އަދި ޗައިނާގެ ނޭޝަނަލް ހެލްތު އެންޑް ފެމިލީ ޕްލޭނިން ކޮމިޝަންގެ ފަރާތުން ސޮއިކުރެއްވީ ޗައިނާ ސަރުކާރުގެ ފަރާތުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ހިޒް އެކްސެލެންސީ ޜޭންގް ލިޒޯންގެވެ.
މިއަދު ސޮއިކުރެވުނު އެއްބަސްވުމުގެ ދަށުން ހުޅުމާލޭ ހޮސްޕިޓަލުގައި ދެވޭ ލޮލުގެ ފަރުވާގެ ހިދުމަތްތައް ފުޅާކޮށް، އާ ހިދުމަތްތައްތައް ތައާރަފްކުރުމަށް ވަނީ ހަމަޖެހިފައެވެ. މިގޮތުން ހުޅުމާލޭ ހޮސްޕިޓަލުގެ ލޮލުގެ ޑިޕާޓްމަންޓް އިތުރަށް ހަރުދަނާކޮށް، ލޮލުގެ އެންމެ އާދައިގެ ފަރުވާތަކުން ފެށިގެން ހާއްސަ ސާޖަރީތައް ހެދޭ ފެންވަރަށް ތަރައްގީކުރުމަށްވެސް ވަނީ ހަމަޖެހިފައެވެ.
ހުޅުމާލެ ހޮސްޕިޓަލަށް ބޭނުންވާ ލޮލުގެ ފަރުވާއާއި ގުޅޭ އާލާތްތައް މި އެއްބަސްވުމުގެ ދަށުން ޗައިނާ ސަރުކާރުގެ ފަރާތުން ހަދިޔާކުރުމަށް ވަނީ ހަމަޖެހިފައެވެ. އަދި ޗައިނާގެ ލޮލުގެ ހާއްސަ ޑޮކްޓަރުން ހުޅުމާލޭ ހޮސްޕިޓަލުގައި ފަރުވާދިނުމަށް މަސައްކަތް ކުރައްވާނެއެވެ. މީގެ އިތުރުން، ދިވެހި ޑޮކްޓަރުންނާއި ނަރުހުންނަށް ބޭނުންވާ ތަމްރީންތައް ޗައިނާގައި ދިނުމަށްވެސް ވަނީ ހަމަޖެހިފައެވެ.
ޗައިނާ ސަރުކާރުގެ އެހީގައި 2015 ވަނަ އަހަރު އަދި 2017 ވަނަ އަހަރު ވެސް ވަނީ ލޮލުގެ ހާއްސަ ކޭމްޕްތަކެއް ރާއްޖޭގައި ކުރިއަށް ގެންގޮސްފައެވެ. މި ކޭމްޕްތަކުގައި ޖުމްލަ 1000 އަށް ވުރެގިނަ މީހުން ސްކްރީންކޮށް 186 މީހުންގެ ކެޓަރެކްޓް ސާޖަރީ ވަނީ ހަދާފައެވެ. އަދި 9.2 މިލިއަން ރުފިޔާގެ ލޮލުގެ ފަރުވާއާއި ގުޅޭ އާލާތްތައް ޗައިނާ ސަރުކާރުން ވަނީ ހަދިޔާކުރައްވާފައެވެ.
ދިވެހިރާއްޖޭގައި ލޮލުގެ ހާއްސަ ފަރުވާދޭ މަރުކަޒެއް ޤާއިމް ކުރުމަކީ ސިއްޙީ ދާއިރާއިން އެއްބާރުލުން ދިނުމުގެ ގޮތުން ޗައިނާ ސަރުކާރާއި އެކު 2017 ގައި ސޮއި ކުރެވިފައިވާ ފަހުމުނާމާގައި ފާހަގަކުރެވިފައިވާ މައިގަނޑު އެއް ދާއިރާއެވެ. މިއަދު ވެވުނު އެއްބަސްވުމާއެކު ރާއްޖެއިން ފެންވަރު ރަނގަޅު ލޮލޮގެ ފަރުވާ ލިބުމުގެ މަގުފަހިވެގެންދާނެއެވެ.
