އީރާނާ މެދު އެމެރިކާއިން ވާހަކަދައްކަމުން ދިޔަ ހަރުކަށިކަމަށް ދުލެއް ދީ، އީރާނާއެކު ސުލްހައިގެ މަޝްވަރާތައް ކުރިއަށް ގެންދިއުމަށް ފުރުސަތު އެބައޮތް ކަމަށް އެމެރިކާގެ ހާރިޖީ ވަޒީރު މައިކް ޕޮމްޕޭއޯ ވިދާޅުވި ވިދާޅުވުމަކީ އެމެރިކާއިން ޖަހާ "މަޅިއެއް" ކަމަށް އީރާނުން ތުހުމަތުކޮށްފިއެވެ.
އީރާނާއެކު ސުލްހައިގެ މަޝްވަރާތަކަށް ދިއުމަށް ތައްޔާރު ކަމަށާ، ނަމަވެސް މަޝްވަރާތަކުގެ ކުރިން އީރާނުން އެއްވެސް ޝަރުތެއް ކަނޑައަޅައިގެން ނުވާނެ ކަމަށް ޕޮމްޕޭއޯ ވަނީ ވިދާޅުވެފައެވެ.
މިކަމަށް ރައްދު ދެމުން އީރާނު ހާރިޖިއްޔާގެ ތަރުޖަމާނު ޢައްބާސް މޫސާވީ ވިދާޅުވީ، ޕޮމްޕޭއޯގެ ވާހަކަފުޅުތަކުގެ ފަހަތުގައި ފޮރުވިފައިވާ އެޖެންޑާއެއް ވާ ކަމަށާ، އެފަދަ ކަމަކަށް އީރާނުން ނުލެނބޭނެ ކަމަށާ، އެފަދަ ކަމަކަށް އީރާނުން ދޭނެ ސަމާލުކަމެއްވެސް ނުއޮންނާނެކަމަށެވެ.
އީރާނުގެ ރައީސް ހަސަން ރޫހާނީ ވަނީ، އެމެރިކާއިން އީރާނަށް އިހުތިރާމް ކުރާނަމަ ސުލްހައިގެ މޭޒުދޮށަށް އީރާނުން ހާޒިރުވާނެ ކަމަށް އިޝާރާތް ކުރައްވާފައެވެ.
