ޤަތުލުޢާންމެއްގެ މޭރުމުން އެމެރިކާގެ ރައީސް ޑޮނާލްޑް ޓްރަމްޕް ދެއްވަމުން ގެންދަވާ އިންޒާރުތަކަކުން އީރާނަށް ނިމުން ނާންނާނެކަމަށް އީރާނުގެ ޚާރިޖީ ވަޒީރު މުޙައްމަދު ޖަވާދު ޒަރީފު ވިދާޅުވެއްޖެއެވެ.
އެމެރިކާއާއި އީރާނާ ދެމެދު މެދުއިރުމަތީގައި އަސްކަރީ ހަނގުރާމައެއް ފެށިދާނެ ކަމުގެ ބިރުވެރިކަން އިންތިހާއަށް ބޮޑުވެފައިވަނިކޮށް ޒަރީފު ކުރެއްވި ޓުވީޓެއްގައި ވިދާޅުވީ، އީރާނުގެ ރައްޔިތުން އެއްބައެއްވަންތަ ގޮތުގައި ދެމި އޮންނަތާ އެއް ހާސް އަހަރުވެސް ފާއިތުވެއްޖެ ކަމަށާ، ނެތި ގޮސްފައިވަނީ އެގައުމުގެ ހަތުރުން ކަމަށެވެ. އިގުތިސޯދީ ޓެރަރިޒަމް ހިންގައިގެންނާ، ޤަތުލުއާންމުގެ ބިރަކަށް އީރާނުގެ ނިމުން ނާންނާނެ ކަމަށް ޒަރީފު ވިދާޅުވިއިރު، އިހުތިރާމް ކޮށްގެން ކަންކަމަށް ހައްލު ހޯދޭ ކަންވެސް ޓްރަމްޕަށް ވަނީ ހަނދުމަފުޅުކޮށްދެއްވާފައެވެ.
ޒަރީފު މިފަދަ މޭރުމަކުން ޓުވީޓުކުރައްވާފަ މިވަނީ، ހަނގުރާމަ ކުރަން ބޭނުންވުމަކީ އީރާނުގެ ރަސްމީ ނިމުން ކަމަށާ ދުވަހަކުވެސް ދެން އެމެރިކާއަށް އިންޒާރެއް ނުދުނިމަށް ގޮވާލައްވާ، ޓްރަމްޕް ޓުވީޓެއް ކުރައްވާފައިވާ ދަނޑިވަޅެއްގައެވެ.
އީރާނުގެ ނިއުކްލިއާ މަޝްރޫއަށް ބައިނަލްއަގުވާމީ ފެންވަރުގައި ސުލްހަވެރި ހައްލެއް ހޯދުމަށް ދުނިޔޭގެ ބޮޑެތި ބާރުތަކާ އީރާނާ ދެމެދު 2015 ވަނަ އަހަރު އެކުލަވާލި އެއްބަސްވުމުން އެމެރިކާއިން އަމިއްލައަށް ވަކިވިފަހުން އީރާނާ އެމެރިކާގެ "ހަނގުރާމަ" ވަނީ އިންތިހާއަށް ގަދަވެ، އަސްކަރީ ކުރިމަތިލުމަކަށް ހަމަ ދެންމެ ދެންމެ ބަދަލުވާ ދަރަޖައަށް ހޫނުވެފައެވެ.
