ލ. ފޮނަދޫ ދާއިރާގެ ވޯޓު ފޮށި އަލުން ގުނަން އެދިފައި ނުވާކަމަށް އިލެކްޝަންސް ކޮމިޝަން (އީސީ) ގެ ތަރުޖަމާނު އަދި މެންބަރު، އަހްމަދު އަކްރަމް ވިދާޅުވެއްޖެއެވެ.
ފޮނަދޫ ދާއިރާގެ ވޯޓު ފޮށިތައް އަލުން ގުނަން އެދިފައިވާކަމަށް ބުނެ ބައެއް މީޑިއާތަކުގައި ވަނީ ރިޕޯޓްކޮށްފައެވެ. ނަމަވެސް އަކްރަމް ވަނީ މި ވާހަކަތައް ދޮގުކޮށްފައެވެ.
ފޮނަދޫ ދާއިރާގެ ވަގުތީ ނަތީޖާ ދައްކާ ގޮތުން އެ ދާއިރާގެ މެންބަރުކަން މިހާރު ކުރައްވަމުން ގެންދަވާ އަބްދުއްރަހީމް އަބްދުﷲ (އަދުރޭ) އާއި ވާދަކޮށް އިންތިހާބު ކާމިޔާބު ކޮށްފައި ވަނީ އެމްޑީޕީގެ ފަރާތުން ވާދަކުރި ކެންޑިޑޭޓް އަދި ގާނޫނީ ވަކީލް މޫސާ ސިރާޖެވެ.
އިންތިހާބުގެ ވަގުތީ ނަތީޖާ ދައްކާ ގޮތުން، އަބްދުއްރަހީމްގެ މައްޗަށް ސިރާޖު ކުރި ހޯއްދަވާފައިޗވަނީ އެންމެ 44 ވޯޓުގެ ތަފާތުންނެވެ. މި ދާއިރާއަށް ވޯޓުލުމުގެ ހައްގު 2837 މީހުންނަށް ލިބިގެންވާއިރު މި ދާއިރާއަށް ވޯޓުލާފައިޗވަނީ 2535 މީހުންނެވެ. ވޯޓުލީ މީހުންގެ ތެރެއިން 2489ްެ ވޯޓު ސައްހަ ކަމަށް ބެލެވޭ އިރު، 46 ވޯޓު ވަނީ ބާތިލްވެފައެވެ.
މި އިންތިހާބުގައި ބެހެއްޓި ބައެއް ވޯޓު ފޮށިތަކާއި ބެހޭގޮތުން އީސީއަށް ހުށަހެޅި މައްސަލަތަކާއި ގުޅިގެން ބައެއް ވޯޓުފޮށިތައް ވަނީ އަލުން ގުނާފައެވެ. ނަމަވެސް ސައްހަ ވޯޓު ބާތިލުކަމަށް ބަލައިިގެން ވޯޓު ގުނާފައި ހުރުމުގެ ސަބަބުން ކެނޑިޑޭޓުންނަށް ލިބުނު ވޯޓުގެ އަދަދު ގިނަވުމުގެ އިތުރުން އެއްވެސް ތަފާތެއް ފެނިފައެއް ނުވެއެވެ. އަދި އަލުން ގުނި ވޯޓުފޮށިތަކުގެ ނަތީޖާވެސް ބަދަލުވެފައެއް ނުވެއެވެ.
