ޕްރޮސެކިއުޓާ ޖެނެރަލް އޮފީހުގެ މުވައްޒަފުންނަށް ވެސް، ވިއެހުމާއި ގުޅިގެން ލިބޭ މެޓާނިޓީ ލީވް ހަ މަސް ދުވަހަށް އަދި ޕެޓާނިޓީ ލީވް އެއް މަސްދުވަހަށް ލިބޭގޮތަށް ހަމަޖައްސައިފިއެެވެ.
ޕީޖީ އޮފީހުން ބުނީ ސިވިލް ސާވިސްގައި މަސައްކަތް ކުރާ އަންހެން މުވައްޒަފުންނަށް މެޓާނިޓީ ލީވްގެ ގޮތުގައި މުސާރަ ލިބޭގޮތަށް ހަ މަސް ދުވަސް އަދި ޕެޓާނިޓީ ލީވްގެ ގޮތުގައި ފިރިހެން މުވައްޒަފުންނަށް މުސާރަ ލިބޭގޮތަށް އެއް މަސް ދުވަސް ދިނުމަށް ރައީސް އިބްރާހީމް މުހައްމަދު ސޯލިހު ނިންމެވުމާއި ގުޅިގެން ޕީޖީ އޮފީހުގައި މަސައްކަތް ކުރާ މުވައްޒަފުންނަށް ވެސް އެ އުސޫލުން މެޓާނިޓީ އަދި ޕެޓާނިޓީ ލީވް ލިބޭނެ ކަމަށެވެ.
ޕީޖީ އޮފީހުން ބުނީ އެ އޮފީހުގައި މަސައްކަތް ކުރާ މުވައްޒަފުންގެ 55 އިންސައްތަ އަކީ އަންހެން މުވައްޒަފުން ކަމަށެވެ. އަދި އެ އޮފީހުގެ އަމާޒަކީ އަންހެނުން ބާރުވެރި ކުރުވާ ތަފާތު ކުރުން ނައްތާލައި ހަމަހަމަކަން ގާއިމު ކުރުން ކަމަށެވެ.
ޕީޖީ އޮފީހުގެ އިތުރުން އެސްޓީއޯއިން ވެސް ވަނީ ވިހެއުމާ ގުޅިގެން އެ ކުންފުނީގެ އަންހެން މުވައްޒަފުންނަށް ހަ މަސް ދުވަހުގެ ޗުއްޓީ އަދި ފިރިހެން މުވައްޒަފުންނަށް އެއް މަސް ދުވަހުގެ ޗުއްޓީއެއް ދިނުމަށް ނިންމާފައެވެ.
