ރައްޔިތުންގެ މަޖިލީހުގައި ތިއްބަވަން ވާނީ ކޯލިޝަންގެ ވައުދުތައް ގަބޫލުކުރައްވާ އަދި އެކަންތައްތަކަށް ތާއީދުކުރައްވާ މެންބަރުން ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރޭ އަމީނިއްޔާ ސްކޫލްގައި ބޭއްވި އެމްޑީޕީގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، އެމަނިކުފާނު ވެރިކަމަށް ވަޑައިގަތީ ގިނަ ވައުދުފުޅު ތަކަކާ އެކީގައި ކަމަށާއި، އެ ވައުދުފުޅުތައް ފުއްދަވަން ޖެހިވަޑައިގަންނަވާނެ ކަމަށާއި، އެކަން ކުރުމުގައި މަޖިލީހުގެ ދައުރު ވަރަށް މުހިންމު ކަމަށެވެ.
މިގޮތުން ރައީސް ވިދާޅުވީ، ރައްޔިތުންގެ މަޖިލިހަކީ ސަރުކާރު ހުއްޓުމަކަށް ވެސް ގެނެވިދާނެ ބާރެއް ކަމަށެވެ. އަދި އެގޮތަށް ސަރުކާރު ހުއްޓުވައިފި ނަމަ، ވައުދުފުޅުތައް ފުއްދެވޭނެ ގޮތެއް ނޯންނާނެ ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން ރައީސް ސޯލިހު ވިދާޅުވީ ކުރީގެ ސަރުކާރުން ފުލެޓު ދިން ގޮތް ބަލައި މި ސަރުކާރަށް ހައްލު ހޯދިދާނެ ކަމަށާއި، އެކަމަކު އެންމެ މުހިއްމު ކަމަކީ، އެފަދަ ކަންކަން ހިންގި މީހުން މަޖިލީހުގެ ތެރެއިން ޖަވާބުދާރީ ކުރެވޭނެ ގޮތެއް ހޯއްދެވުން ކަމަށެވެ. އަދި އިހުމާލުވީ މީހުން ޖަވާބުދާރީ ކުރެވޭނެ ގާނޫނެއް ފާސްކުރަން ވިއަސް އެކަމަށް ތާއީދު ކުރާނެ މެންބަރުންތަކެއް މަޖިލީހުގައި ތިއްބަވަން ޖެހިވަޑައިގަންނަވާނެ ކަމަށް ވެސް ރައީސް ވިދާޅުވިއެވެ.
މިކަމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ނުހައްގުން ވަޒީފާއިން ވަކިކޮށްފައިވާ 500 މީހުންގެ މައްސަލަ ލިބިވަޑައިގެންފައި ވާކަމަށައި، މައްސަލަ ބައްލަވައި އެފަރާތްތަކަށް ވަޒީފާ ދެވިދާނެ ކަމަށެވެ. އެކަމަކު އެންމެ މުހިންމީ އެކަން ކުރި ބަޔަކާމެދު ފިޔަވަޅު އެޅުއްވުން ކަމުގައެވެ.
އިތުރަށް ރައީސް ވިދާޅުވީ، ދެން އަންނަ ސަރުކާރަކުން ވެސް މިކަހަލަ ކަންތައްތައް ނުކުރެވޭނެ ގޮތްތަކެއް ހޯއްދަވަން އެބަޖެހިވަޑައިގަންނަވާ ކަމަށާއި، މިކަން ކުރެވޭނީ އެމްޑީޕީގެ އުސޫލުތައް ގަބޫލުކުރާ ބަޔަކު މަޖިލީހުގައި ތިބެގެން ކަމަށެވެ.
