ޔޫކްރެއިންގެ އިޒްމާއިލް ބަނދަރުގައި އޮންނަ ރޭލު ސްޓޭޝަނަކަށާއި މައިކޮލައިވް ކައިރީގައި އޮތް ދެ އުޅަނދަކަށް ރަޝިޔާގެ ސިފައިން ހަމަލާދީފިއެވެ. ހަމައެއާއެކު، ޔޫކްރެއިންގެ ޑްރޯންތަކަކުން ވަނީ ރަޝިޔާގެ ބޯލްޓިކް ކަނޑުގެ ތެޔޮ އެކްސްޕޯޓުކުރާ މަރުކަޒަކަށާއި މޮސްކޯ ކައިރީގައި ހުރި ގުދަނަކަށް ހަމަލާދީފައެވެ.
ރަޝިޔާގެ ޑިފެންސް މިނިސްޓްރީން ބުނި ގޮތުގައި، އިޒްމާއިލްގައި ހުންނަ ރޭލު ސްޓޭޝަނަކީ ޔޫކްރެއިންގެ އަސްކަރިއްޔާއަށް ބޭނުންވާ ހަތިޔާރާއި ތެޔޮ ބަރުކުރުމަށާއި ރައްކާކުރުމުގެ އިތުރުން އެ ތަކެތި އުފުލުމަށް ބޭނުންކުރަމުންދިޔަ ތަނެކެވެ. މީގެ އިތުރުން، މައިކޮލައިވްގެ އައްސޭރިފަށުގައި އޮތް ދެ ޓަގުބޯޓަކަށް ވެސް ރަޝިޔާގެ ސިފައިން ހަމަލާދީފައިވާ ކަމަށް އެ މިނިސްޓްރީން ބުނެފައިވެއެވެ. އެ މިނިސްޓްރީން ތުހުމަތުކުރާ ގޮތުގައި އެ ދެ އުޅަނދަކީ ޔޫކްރެއިންގެ ބަނދަރުތަކަށް ހަތިޔާރު އުފުލާ އުޅަނދުތަކަކަށް ހިމާޔަތްދެމުންދިޔަ ދެ އުޅަނދެވެ.
މި ހަމަލާތައް ދީފައިވަނީ، އޭގެ އެއް ދުވަސް ކުރިން ރަޝިޔާއިން ދިން ހަމަލާތަކެއްގައި އިޒްމާއިލްގެ ބަނދަރުގެ އުމްރާނީ ވަސީލަތްތަކަށް ގެއްލުންވެ، ކަރަންޓު ކެނޑިފައި ވަނިކޮށެވެ. ރޫމޭނިއާގެ ބޯޑަރާ ކައިރީގައި ޑެނިއުބް ކޯރުގައި އޮންނަ އިޒްމާއިލްއަކީ ޔޫކްރެއިންގެ މުދާ އެކްސްޕޯޓުކުރުމަށް ބޭނުންކުރާ މުހިންމު ބަނދަރެކެވެ.
އަނެއްކޮޅުން، ރަޝިޔާގެ ލެނިންގްރާޑް ސަރަހައްދުގައި އޮންނަ ބޯލްޓިކް ކަނޑުގެ މައި ތެޔޮ އެކްސްޕޯޓުކުރާ ބަނދަރު ކަމަށްވާ އުސްޓް-ލޫގާއަށް ޔޫކްރެއިންގެ ޑްރޯންތަކަކުން ދިން ހަމަލާއެއްގައި ވަނީ އަލިފާން ރޯވެފައެވެ. އެ ސަރަހައްދުގެ ގަވަރުނަރު އެލެގްޒެންޑަރ ޑްރޮޒްޑެންކޯ ވިދާޅުވި ގޮތުގައި، އެ އަލިފާންގަނޑު މިހާރު ވަނީ ކޮންޓްރޯލްކޮށްފައެވެ. އަދި މި ހާދިސާގައި އެއްވެސް މީހަކަށް އަނިޔާވެފައިނުވާ ކަމަށް އޭނާ ވިދާޅުވިއެވެ. އޭނާ އިތުރަށް ފާހަގަކުރެއްވި ގޮތުގައި، ސެންޓް ޕީޓަރސްބަރގް ވަށައިގެންވާ ސަރަހައްދުން ރޭގަނޑުގެ ވަގުތެއްގައި 50 އަށް ވުރެ ގިނަ ޑްރޯން ވައްޓާލާފައިވެއެވެ.
އަލްޖަޒީރާއިން ރިޕޯޓުކޮށްފައިވާ ގޮތުގައި، ޔޫކްރެއިނުން ދަނީ ރަޝިޔާގެ އިގުތިސާދަށް ގެއްލުން ދިނުމުގެ ގޮތުން ރަޝިޔާގެ ތެޔޮ ސާފުކުރާ ކާރުހާނާތަކަށާއި ބަނދަރުތަކުގެ އިތުރުން ހަކަތައިގެ ވަސީލަތްތަކަށް އަމާޒުކޮށް ތަކުރާރުކޮށް ހަމަލާދެމުންނެވެ. މީގެ އިތުރުން، މޮސްކޯގެ ހުޅަނގު އުތުރުގައި އޮންނަ ޓްވެރް ސަރަހައްދުގެ ގަވަރުނަރު ވިދާޅުވި ގޮތުގައި، ޑްރޯންއެއްގެ ބައިތަކެއް ވެއްޓުމުގެ ސަބަބުން އޮންލައިން ވިޔަފާރިކުރާ ކުންފުންޏެއް ކަމަށްވާ ވައިލްޑްބެރީސްގެ ގުދަނެއްގެ ފާރަށް ވަނީ ގެއްލުންވެފައެވެ. ނަމަވެސް އެއްވެސް މީހަކަށް އަނިޔާވެފައެއް ނުވެއެވެ. ފާއިތުވި މަހެއްހާ ދުވަހުގެ ތެރޭގައި ވައިލްޑްބެރީސްގެ އިމާރާތްތަކަށް 20 އަށް ވުރެ ގިނަ ފަހަރު ހަމަލާ އަމާޒުވެފައިވާ ކަމަށް ރިޕޯޓުތައް ބުނެއެވެ.
ޑްރޯން ހަމަލާތަކާ ގުޅިގެން، ރަޝިޔާގެ ފެޑެރަލް އެއަރ ޓްރާންސްޕޯޓް އޭޖެންސީ (ރޮސާވިއާޓްސިއާ) އިން ވަނީ ސަލާމަތީ ފިޔަވަޅެއްގެ ގޮތުން މޮސްކޯ ސަރަހައްދުގެ ހުރިހާ އެއަރޕޯޓުތަކެއްގެ ދަތުރުތައް ވަގުތީ ގޮތުން މެދުކަނޑާލާފައެވެ. ހަމައެއާއެކު، ބޯލްޓިކް ސަރަހައްދުގެ އެހެން ގައުމުތަކުން ވެސް ވަނީ ރައްކާތެރިކަމުގެ ފިޔަވަޅުތައް އަޅާފައެވެ. ލެޓްވިއާގެ އަސްކަރިއްޔާއިން ބުނި ގޮތުގައި، އެ ގައުމުގެ ވައިގެ ސަރަހައްދަށް ވަން ޑްރޯންއެއް ފައިޓަރ ޖެޓުތަކުން ވަނީ ވައްޓާލާފައެވެ. އަދި ފިންލޭންޑުން ވަނީ ރައްކާތެރިކަމުގެ ފިޔަވަޅެއްގެ ގޮތުން ބޯލްޓިކް ކަނޑުގެ ބައެއް ސަރަހައްދުތަކުގައި ކަނޑުދަތުރުފަތުރުކުރުން ވަގުތީ ގޮތުން މަނާކޮށްފައެވެ.
