މިދިޔަ އަހަރުގެ މި މުއްދަތާ އަޅާބަލާއިރު ދައުލަތަށް ލިބުނު ޖުމްލަ އާމްދަނީއާއި ހިލޭ އެހީ 10.9 ޕަސެންޓް އިތުރުވެ، 24.1 ބިލިއަން ރުފިޔާ ލިބިފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އާންމުކޮށްފައިވާ އެންމެ ފަހުގެ "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން، 2025 ވަނަ އަހަރުގެ މި މުއްދަތުގައި ލިބުނު 21.7 ބިލިއަން ރުފިޔާއާ އަޅާބަލާއިރު، މިއީ 2.4 ބިލިއަން ރުފިޔާގެ އިތުރުވުމެކެވެ. އާމްދަނީ އިތުރުވުމުގެ މައިގަނޑު ސަބަބަކީ މުދަލާއި ހިދުމަތުގެ އަގުން ނަގާ ޓެކްސް (ޖީއެސްޓީ) ހިމެނޭހެން، ޓެކްސްގެ ގޮތުގައި ލިބުނު އާމްދަނީ ރަނގަޅުވުމެވެ.
ޓެކްސް އާމްދަނީގެ ކުރިއެރުން
ތަފާސްހިސާބުތަކުން ދައްކާގޮތުގައި ޓެކްސްގެ ގޮތުގައި ލިބުނު އާމްދަނީ ވަނީ 12.1 ޕަސެންޓް ނުވަތަ 2.0 ބިލިއަން ރުފިޔާ އިތުރުވެފައެވެ. އެގޮތުން މިދިޔަ އަހަރު 16.4 ބިލިއަން ރުފިޔާ ލިބުނުއިރު، މި އަހަރު އެ އަދަދު ވަނީ 18.4 ބިލިއަން ރުފިޔާއަށް އަރާފައެވެ. ޓެކްސް އާމްދަނީގެ އެންމެ ބޮޑު ބައެއް ހިއްސާކުރާ ޖީއެސްޓީގެ ގޮތުގައި 10.0 ބިލިއަން ރުފިޔާ ލިބިފައިވެއެވެ. މީގެ ތެރޭގައި ހިމެނެނީ:
- އާންމު ޖީ.އެސް.ޓީ: 3.1 ބިލިއަން ރުފިޔާ (13.6 އިންސައްތަ އިތުރުވުމެއް)
- ޓީ.ޖީ.އެސް.ޓީ: 6.9 ބިލިއަން ރުފިޔާ (8.0 އިންސައްތަ އިތުރުވުމެއް)
މި އަހަރު އާމްދަނީއާއި ހިލޭ އެހީގެ ގޮތުގައި ލިބޭނެ ކަމަށް ލަފާކޮށްފައިވާ 40.4 ބިލިއަން ރުފިޔާގެ ތެރެއިން 59.7 ޕަސެންޓް މިހާރު ވަނީ ދައުލަތަށް ލިބިފައެވެ.
ދައުލަތުގެ ހަރަދުތައް
ދައުލަތުގެ ރިކަރަންޓް އަދި ކެޕިޓަލް ހަރަދުގެ ޖުމްލަ މިހާރު ހުރީ 25.5 ބިލިއަން ރުފިޔާގައެވެ. މިއީ މިދިޔަ އަހަރާ އަޅާބަލާއިރު 19.7 ޕަސެންޓްގެ އިތުރުވުމެކެވެ. ހަރަދުތައް އިތުރުވާން ދިމާވި މައިގަނޑު ސަބަބުތަކުގެ ތެރޭގައި މުވައްޒަފުންގެ މުސާރައާއި، ސިއްހީ ހިދުމަތްތަކާއި، އިޖުތިމާއީ ރައްކާތެރިކަމަށް ކުރާ ހޭދަ އިތުރުވުން ހިމެނެއެވެ.
ހާއްސަކޮށް، މިދިޔަ އަހަރުގެ ނޮވެމްބަރު މަހު ސަރުކާރުގެ މުވައްޒަފުންގެ މުސާރަ ބޮޑުކުރުމާ ގުޅިގެން، މުސާރައާއި ޕެންޝަނަށް ކުރި ހަރަދު ވަނީ 8.5 ބިލިއަން ރުފިޔާއަށް އުފުލިފައެވެ. މީގެ އިތުރުން، އާސަންދައަށް 1.2 ބިލިއަން ރުފިޔާ އަދި ސަބްސިޑީއަށް 3.2 ބިލިއަން ރުފިޔާ ހޭދަކޮށްފައި ވެއެވެ. ސަބްސިޑީގެ ހަރަދު 79 ޕަސެންޓް އިތުރުވެފައި ވަނީ މެދުއިރުމަތީގެ ހަނގުރާމައާ ގުޅިގެން ދުނިޔޭގެ ބާޒާރުގައި ތެލާއި ތަކެތީގެ އަގު އުފުލުމުގެ ސަބަބުންނެވެ.
ޖުލައި 23 ގެ ނިޔަލަށް ދައުލަތުގެ މާލީ ހިސާބުތަކުން ދައްކާ ގޮތުގައި 1.5 ބިލިއަން ރުފިޔާގެ ޕްރައިމަރީ ސާޕްލަސްއެއް އޮތް ނަމަވެސް، އޯވަރޯލް ބެލެންސް ހުރީ 1.4 ބިލިއަން ރުފިޔާގެ ޑެފިސިޓެއްގައެވެ.
