3 އިންތިހާބުގެ ކަވަރޭޖް: ވޯޓު ލުން ނިންމާލައި ވޯޓު ގުނަން ފަަށައިފި

މަޖީދިއްޔާ ސްކޫލްގައި ހުރި ހެންވޭރު ހުޅަނގު 4 ނަންބަރު ފޮށީގެ ވޯޓު ގުނުން ހުއްޓާލާފައި ވަނީ އެ މަރުކަޒުގައި އޮބްޒާވަރުންގެ ކަންބޮޑުވުން ފާޅުކޮށް ހިނގި ހަމަނުޖެހުމާ ގުޅިގެން. އެ މަރުކަޒުގެ މައްސަލަ ހައްލުކޮށް މިހާރު އަންނަނީ ވޯޓު ގުނަމުން. އެ ތަނުގައި ގިނަ އަދަދެއްގެ ފުލުހުން އަންނަނީ ހަރަކާތެރިވަމުން.

ހަމަނުޖެހުން ހިންގަމުން ދަނީ މަޖީދިއްޔާ ސްކޫލުގައި ބެހެއްޓިފައިވާ ހެންވޭރު ހުޅަނގު ދާއިރާގެ 4 ނަންބަރު ފޮށީގެ ވޯޓު ގުނުން ކުރިއަށް ދަނިކޮށް. އެ މަރުކަޒުގައި ތިބި މައި ދެ ޕާޓީގެ އޮބްޒާވަރުން އަންނަނީ ކަންބޮޑުވުން ފާޅުކޮށް އީސީގެ މުވައްޒަފުންނަށް އަޑުގަދަކޮށް އެއްޗިހި ކިޔަމުން. 

މިއަދު ބޭއްވި އިންތިހާބުތަކުގެ ވޯޓުލުން ހަވީރު 5 ޖެހި އިރު ވަނީ ނިންމާލާފައި. ވަގުތު ހަމަވި އިރު ވޯޓުލާ ބައެއް މަރުކަޒުތަކުގައި ކިއުގައި ގިނަ ބަޔަކު ތިބުމުން ވޯޓު ލުން ނިންމާލުމުގައި ވަގުތުތަކެއް ހޭދަވެފައިވޭ. މިހާތަނަށް އައި އިރު ބައެއް މަރުކަޒުތަކުގެ ވޯޓު ގުނަން ވަނީ ފަށާފައި

5 ޖެހުމާއެކު ވޯޓުލާ މަރުކަޒުތަކުގެ ކިއު ބަންދުކޮށްފި. މި ވަގުތު ކިއު ބަންދު ކުރުމާ ހަމައަށް ކިއު އަށް އަރާފައިވާ މީހުން ވޯޓު ލާ ނިމުމުން ވޯޓު ފޮށި ބަންދުކުރަން ފަށާނެ ކަމަށް އީސީން ބުނޭ.

މިއަދު ކުރިއަށް ދާ ލޯކަލް ކައުންސިލް އާއި ޑަބްލިއުޑީސީގެ އިންތިހާބު އަދި ރިފަރެންޑަމް ވޯޓުގެ އިންތިހާބަށް ވޯޓު ލާން އެއް ގަޑިއިރު އިތުރުކޮށްފި. އީސީން ބުނީ ވޯޓު ލާ ވަގުތު އިތުރުކޮށްފައި ވަނީ ހޫނު ގަދަ ދުވަހަކަށް ވުމުން ވޯޓު ލާން ގިނަ ބަޔަކަށް ދަތިވެފައި ވާތީ. އެހެންކަމުން ހަވީރު 5 ޖަހާއިރު ވޯޓު ލާ ކިއު ބަންދުވާނެ ކަމަށް އީސީން ބުނޭ.

މިއަދުގެ 2 ޖެހުމާ ހަމައަށް 44.75 ޕަސެންޓް މީހުން ވޯޓުލާފައިވާ ކަމަށް އިލެކްޝަން ކޮމިޝަނުން ބުނެފި. އީސީން އާންމުކޮށްފައިވާ ތަފާސް ހިސާބުތަކަށް ބަލާއިރު ވޯޓުލުމުގެ ހައްގު ލިބިފައިވާ މީހުންގެ ތެރެއިން 131،947 މީހުން ވަނީ ވޯޓުލާފަ. އެގޮތުން މިހާތަނަށް 63175 އަންހެނުން ވޯޓުލާފައިވާއިރު، 68772 ފިރިހެނުން ވަނީ ވޯޓުލާފަ.

ފުލުހުން: ގދ. ގައްދޫގައި ހިނގި ހަމަނުޖެހުމަކީ ވޯޓުގެ ސިއްރުކަން ކަށަވރު ނުކުރެވޭ ގޮތަށް ވޯޓުލާ ބޫތު ބަހައްޓާފައިވާ ކަމަށް ބުނެ ފާޅުކުރި ކަންބޮޑުވުމުގެ ތެރެއިން ހިނގި ހަމަނުޖެހުމެއް. މިހާރު ވަނީ މައްސަލަ ހައްލުކޮށްފައި. ވޯޓު ލުން ދަނީ ކުރިއަށް.

ގދ. ގައްދޫ ވޯޓު ލާ މަރުކަޒުގައި ހިނގި ހަމަނުޖެހުން ހައްލުކޮށް އަލުން ވޯޓު ލާން ފަށައިފި. މި ހަމަނުޖެހުން ހިނގާފައި ވަނީ ސިޔާސީ ދެ ޕާޓީއެއްގެ މެންބަރުންތަކެއްގެ މެދުގައި. ފުލުހުން އެތަނުގައި ހަރަކާތްތެރިވެފައިވާ އިރު، ހަމަނުޖެހުން ކޮންޓްރޯލް ކުރުމަށް 30 މިނެޓް ހޭދަވެފައި ވޭ. އަދި އެ 30 މިނެޓްތެރޭ ވޯޓުން ލުން ވަނީ މެދު ކަނޑާލާފައި. މިހާރު އަލުން ވޯޓުލުން ކުރިއަށް ދާ ކަމަށް އެ ރަށު ކައުންސިލުން ބުނޭ. މިހާތަނަށް އެ ރަށުން 100 އަށް ވުރެ މީހުން ވޯޓު ލާފައިވާ ކަމަށް ވެސް މައުލޫމާތު ލިބޭ. 

ވޯޓްލާން ފެށިތާ ތިން ގަޑިއިރުގެ ތެރޭގައި 21.05 ޕަސެންޓް މީހުން ވޯޓުލާފައިވާ ކަމަށް އިލެކްޝަން ކޮމިޝަނުން ބުނެފި. އީސީން އާންމުކޮށްފައިވާ ތަފާސް ހިސާބުތަކަށް ބަލާއިރު ވޯޓުލުމުގެ ހައްގު ލިބިފައިވާ މީހުންގެ ތެރެއިން 62083 މީހުން ވަނީ ވޯޓުލާފަ. އެގޮތުން މިހާތަނަށް 28838 އަންހެނުން ވޯޓުލާފައިވާއިރު، 33245 ފިރިހެނުން ވަނީ ވޯޓުލާފަ.

• ވޯޓު ލުމުގެ ހައްގު ލިބިފައިވާ މީހުންގެ އަދަދު: 294،876 
• އޭގެތެރޭގައި ހިމެނެނީ 144،506 އަންހެނުން
• އޭގެތެރޭގައި ހިމެނެނީ 150370 ފިރިހެނުން

މިހަތަނަށް އެއްވެސް ވޯޓު ލާ މަރުކަޒެއްގައި ހަމަނުޖެހުމެއް ހިނގާފައެއް ނުވޭ. އަދި ވޯޓުގެ ކަންކަން ދަނީ ވަރަށް އާމާންކޮށް ކަމަށް މައުލޫމާތު ލިބޭ.

އައްޑޫ އަޕްޑޭޓް: މި އިންތިހާބަކީ އައްޑޫ ސިޓީ އިން ހުޅުދޫ އަދި މީދޫ ވަކިވުމަށްފަހު ބާއްވާ ފުރަތަމަ އިންތިހާބު، މި އިންތިހާބުގައި ވޯޓުލާން ނިކުންނަ މީހުންގެ އަދަދު ވަރަށް ބޮޑަށް އިތުރުކަން ފާހަގަވޭ. އައްޑޫގެ ވޯޓުލާ މަރުކަޒުތަކުގައި ދިގު ކިއުއެއް ދަމާލާފައިވާއިރު ވޯޓުލުމުގެ ކަންތައްތައް ކުރިއަށް ދަނީ ވަރަށް އަމާންކޮށް.

މާލެ ސިޓީގެ ޑަބްލިއުޑީސީގެ ރައީސް ކަމަށް ވާދަކުރާ ޕީއެންސީގެ ކެންޑިޑޭޓް އާޝިޔަތު އަލައިކާ އަދުނާން ވޯޓު ލައްވައިފި. އޭނާ ވޯޓު ލައްވާފައި ވަނީ އަމީނިއްޔާ ސްކޫލުގައި ހުރި ވޯޓު ފޮއްޓަށް.

ވޯޓްލާން ފެށިތާ ތިން ގަޑިއިރުގެ ތެރޭގައި 19.95 ޕަސެންޓް މީހުން ވޯޓުލާފައިވާ ކަމަށް އިލެކްޝަން ކޮމިޝަނުން ބުނެފި. އީސީން އާންމުކޮށްފައިވާ ތަފާސް ހިސާބުތަކަށް ބަލާއިރު ވޯޓުލުމުގެ ހައްގު ލިބިފައިވާ މީހުންގެ ތެރެއިން 58819 މީހުން ވަނީ ވޯޓުލާފަ. އެގޮތުން މިހާތަނަށް 25761 އަންހެނުން ވޯޓުލާފައިވާއިރު، 33058 ފިރިހެނުން ވަނީ ވޯޓުލާފަ.

އެމްޑީޕީގެ ރައީސް އަބްދުﷲ ޝާހިދު ވޯޓު ލައްވައިފި. ޝާހިދު ވޯޓު ލައްވާފައި ވަނީ މަޖީދިއްޔާ ސްކޫލުގައި ހުރި ވޯޓު ފޮއްޓަށް.

ކުރީގެ ރައީސް މުހައްމަދު ނަޝީދު ވޯޓު ލައްވައިފި. އެމަނިކުފާނު ވޯޓު ލައްވާފައި ވަނީ އިސްކަންދަރު ސްކޫލްގައި ހުރި ވޯޓު ފޮއްޓަށް.

ކުރީގެ ރައީސް އިބްރާހިމް މުހައްމަދު ސޯލިހް ވޯޓު ލައްވައިފި. ސޯލިހް ވޯޓު ލައްވާފައި ވަނީ ޖަމާލުއްދީން ސްކޫލްގައި ހުރި ޅ. ހިންނަވަރަށް ހާއްސަކޮށްފައިވާ ވޯޓު ފޮއްޓަށް.

މާލޭގެ މޭޔަރު ކަމަށް ވާދަކުރާ ޕީއެންސީގެ ކެންޑިޑޭޓް މޫސާ އަލީ ޖަލީލް ވޯޓު ލައްވައިފި. އޭނާ ވޯޓު ލެއްވީ ކަލާފާނު ސްކޫލްގައި ހުރި ވޯޓު ފޮއްޓަށް. 

ކުރީގެ ރައީސް އަބްދުﷲ ޔާމީން ވޯޓު ލައްވައިފި. ޔާމީން ވޯޓު ލައްވާފައި ވަނީ އަހްމަދިއްޔާ އިންޓަނޭޝަނަލް ސްކޫލްގައި ހުރި މައްޗަން ގޯޅި މެދު ދާއިރާގެ ޓީ-4.15-404 ނަންބަރު ވޯޓު ފޮއްޓަށް

މާލޭގެ މޭޔަރު ކަމަށް ވާދަކުރާ އެމްޑީޕީގެ ކެންޑިޑޭޓް އާދަމް އާޒިމް ވޯޓު ލައްވައިފި. އާޒިމް ވޯޓު ލައްވާފައި ވަނީ މާފަންނު މަދަރުސާގައި ހުރި ވޯޓު ފޮއްޓަށް.

ރައީސުލްޖުމްހޫރިއްޔާގެ އަނބިކަނބަލުން ފަސްޓް ލޭޑީ މެޑަމް ސާޖިދާ މުހައްމަދު ވޯޓު ލައްވައިފި. އެކަމަނާ ވޯޓު ލައްވާފައި ވަނީ އަމީނިއްޔާ ސްކޫލްގެ ހޯލުގައި ހުރި ވޯޓު ފޮއްޓަށް. 

ވޯޓުލުމަކީ ހަމައެކަނި މަދަނީ ވާޖިބެއް ނޫން. އެއީ ދިމިގްރާތީ ނިޒާމުގެ ބިންގަލެއް. މިއަދު މި ބޭއްވޭ އިންތިހާބުތަކަކީ ރައްޔިތުންގެ ބާރުވެރިކަން ދައްކުވައިދޭ މުހިންމު ދުވަހެއް. މި އިންތިހާބުތަކުގައި ބައިވެރިވުމުން ދިވެހި ރައްޔިތުން އެކުރަނީ ގައުމުގެ ހަމަޖެހުމާއި، ތަރައްގީއާއި، ދިމިގްރާތީ އުސޫލުތައް ދެމެހެއްޓުމަށް ކުރާ އަގުހުރި މަސައްކަތެއް. މިއީ ދިމިގްރާތީ ނިޒާމު ރައްޔިތުންގެ އިހްސާސްތަކާ އެއްގޮތަށް ކުރިއަށްދާކަން ކަށަވަރުކޮށްދޭ އެންމެ ވަރުގަދަ ވަސީލަތެއް. އެހެންކަމުން، ކޮންމެ ރައްޔިތަކުވެސް ފަރުދީ ޒިންމާ އަދާކޮށް، ގައުމުގެ ކުރިމަގު ބައްޓަންކުރުމަށް ވޯޓުލާން ނުކުތުމަކީ ނުހަނު ބޭނުންތެރި ކަމެއް.

ރައީސް ޑރ. މުހައްމަދު މުއިއްޒު ވޯޓު ލައްވައިފި. ރައީސް ވޯޓު ލައްވާފައި ވަނީ ތާޖުއްދީން ސްކޫލްގައި ހުރި ވޯޓު ފޮއްޓަށް. ވޯޓު ލައްވައި ނިންމާފައި ނޫސްވެރިންނަށް މައުލޫމާތު ދެއްވަމުން މުއިއްޒު ވަނީ އަވަހަށް ވޯޓު ދީ ފަރުދީ ޒިންމާ އަދާ ކުރުމަށް އިލްތިމާސްކުރައްވާފަ.

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އަދި ރިފެރަމްޑަމް ވޯޓު ލުން ފަަށައިފި. ވޯޓު ލުމަށް ތައްޔާރުވެ އިށީގެ އޮފިޝަލުން މަރުކަޒުތަކުގައި ހަރަކާތްތެރި ވަމުން އަންނަ އިރު، ވޯޓޫ ލާން މީހުން އަންނަނީ މިހާރު ކިއު ހަދަމުން.