ޕިކަޕަކުން ގަސްތުގައި ސައިކަލެއްގައި ޖެއްސިކަމަށް ތުހުމަތުކުރެވޭ މައްސަލައެއްގައި އުމުރުން ދުވަސްވީ މީހަކު ހައްޔަރުކޮށްފިއެވެ.
މި މައްސަލައާ ގުޅިގެން މިދިޔަ ބުދަ ދުވަހު ހައްޔަރުކޮށްފައިވަނީ، ގއ. ވިލިނގިއްޔަށް ނިސްބަތްވާ އުމުރުން 60 އަހަރުގެ މީހެކެވެ.
އޭނާ ހައްޔަރުކޮށް, ބަންދުގެ މުއްދަތު ޖެހުމަށް އިއްޔެ ވަނީ ކޯޓަށް ހާޒިރުކޮށްފައެވެ. އަދި އޭނާގެ ބަންދަށް ކޯޓުން ފަސް ދުވަސް ޖަހާފައިވާއިރު ބަންދު އަމުރުގައިވާ ގޮތުން އޭނާގެ ބަންދު މުއްދަތު ނިމޭނީ މި މަހުގެ 10 ވަނަ ދުވަހުއެވެ.
ކޯޓުން ނެރުނު ބަންދު އަމުރުގައިވާ ގޮތުން އޭނާވަނީ ދުއްވަމުން ދިޔަ ޕިކަޕް ކުއްލިއަކަށް ސައިކަލް ލޭނާ ދިމާލަށް ދުއްވައި، ސައިކަލެއްގައި ގަސްތުގައި ޖައްސައިފައެވެ. އަދި އެކަމުގެ ސަބަބުން ސައިކަލު ދުއްވަން އިން މީހާއަށް އަނިޔާވެފައިވާ ކަމަށް އައިއޯއާ ހަވާލާދީ ބަންދު އަމުރުގައި ބުނެފައިވެއެވެ.
ފުލުހުން އޭނާގެ މައްޗަށް ކުރާ ތުހުމަތަކީ، ނުރައްކާތެރިކޮށް ދުއްވައިގެން އެއްގަމު އުޅަނދު އެކްސިޑެންޓްވުމުގެ ތުހުމަތެވެ.
