ސޯޝަލް މީޑިއާގެ ޕްލެޓްފޯމް، ޓިކްޓޮކްގައި ދީނަށް ފުރައްސާރަކުރަމުން ދިޔަ އިތުރު މީހަކު ހޯދަން ފުލުހުން އިއުލާންކޮށްފިއެވެ.
ފުލުހުން ހޯދަމުން އަންނަނީ, ނ. ކުޑަފަރީ, ހިޔަލީގެ, ހުސައިން ޔޫސުފް, (44އ) އެވެ.
ފުލުހުން އޭނާގެ މައްޗަށް ތުހުމަތު ކުރަނީ އިސްލާމްދީނަށް ތައުހީނުކޮށް ފުރައްސާރަކުރުމާ، ދިވެހި ރައްޔިތުންގެ އެއްބައިވަންތަކަން ނަގާލަން މަސައްކަތްކުރުމާ، މީހުންގެ މެދުގައި ދީނީ ގޮތުން ބައިބައިވުން އުފެދޭ ބާވަތުގެ ވާހަަކަ އާއި އިސްލާމްދީނުގެ އަސްލުތަކާ ގުޅޭ ގޮތުން ދޮގު މަައުލޫމާތު، ސޯޝަލް މީޑިއާގެ ޕްލެޓްފޯމް ޓިކްޓޮކް މެދުވެރިކޮށް ފެތުރިކަމުގެ ތުހުމަތެވެ.
ފުލުހުން ވަނީ މި މަހުގެ 18 ވަނަ ދުވަހުގެ މެންދުރު 12:00 އަށް, މާލޭގެ ހެންވޭރުގައި ހުންނަ ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންއަށް ހާޒިރުވާން އޭނާއަށް އަންގައިފައެވެ.
ސޯޝަލް މީޑިއާގައި ދީނަށް ފުރައްސާރަކުރާ މައްސަލަ އިތުރުވަމުން އަންނައިރު، ފުލުހުން ވަނީ މި ފަހުންވެސް ޓިކްޓޮކްގައި އިސްލާމް ދީނަށް ފުރައްސާރަ ކުރާ ކަމުގެ ތުހުމަތުގައި, ހ. ފިލިކުރިގެ, އަހްމަދު އާމިރު, ހޯދަން އިއުލާންކޮށްފައެވެ.
