ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މި ރޯދަމަހު 113،382 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށް މިނިސްޓާ އޮފް ސިޓީސް، ލޯކަލް ގަވަމަންޓް އެންޑް ޕަބްލިކްވާކްސް އާދަމް ޝަރީފު އުމަރު ވިދާޅުވެއްޖެއެވެ.
މިނިސްޓާ މިހެން ވިދާޅުވެފައިވަނީ މިއަދު ބޭއްވި ނޫސްވެރިންގެ ބައްދަލުވުމުގައެވެ.
އެގޮތުން މިނިސްޓަރު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް 1447 ވަނަ އަހަރުގެ ރޯދަމަހަށް ކޮންމެ ގޭބިސީއަކަށް ސަރުކާރުން ހަދިޔާކުރާ މަސްދަޅު ކޭސްތައް ބެހުމުގެ މަސައްކަތް ރޭ ނިންމާލާފައިވާ ކަމަށާއި، މި އަހަރު 113،382 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށެވެ.
މިނިސްޓަރ ވިދާޅުވީ މާލޭ ސަރަޙައްދުގައި ރޯދަ ހަދިޔާ ބެހުމުގެ މަސައްކަތް ރޭ ގެ ނިޔަލަށް ނިންމާލާފައިވާކަމަށެވެ. ރޯދަ ހަދިޔާގެ ގޮތުގައި ބެހި މަސްދަޅު ކޭސް ގެ ތަފާސް ހިސާބަށް ބަލާއިރު، މާލޭ ސަރަހައްދުން 55667 މަސްދަޅު ކޭސް ވަނީ ދޫކޮށްފައެވެ. އަދި އަތޮޅުތަކުގެ ގޭބިސީތަކަށް ބެހުމަށް 57715 މަސްދަޅު ކޭސް ފޮނުވުނުކަމަށް މިނިސްޓަރު ފާހަގަކުރެއްވިއެވެ. އެއާއެކު މުޅި ޖުމްލަ 113382 މަސްދަޅު ކޭސް ދޫކޮށްފައިވާ ކަމަށް މިނިސްޓާ ވިދާޅުވިއެވެ.
ފާއިތުވި 2 އަހަރުގެ ތަސާސްހިސާބުތައް ހިއްސާކުރައްވަމުން މިނިސްޓާ ވިދާޅުވީ ރޯދަ ހަދިޔާގެ ގޮތުގައި މި ދިޔަ އަހަރު އަތޮޅުތަކުގެ ގޭބިސީތަކަށް ބެހުމަށް 60712 ކޭސް ފޮނުވިފައި ވިޔަސް، މި އަހަރު އަތޮޅުތަކަށް ފޮނުވަން ޖެހުނީ 57715 ކޭސް ކަމަށެވެ. އެއީ 2997ގެ މަދުވުމެއް ކަމަށެވެ.
މީގެ އިތުރުން މިދިޔަ އަހަރު މާލޭ ސަރަހައްދަށް 50525 ކޭސް ދޫކުރިއިރު، މި އަހަރު 55667 ކޭސް ދޫކޮށްފައިވާކަމަށް މިނިސްޓަރު ވިދާޅުވިއެވެ. އެހެންކަމުން މިއީ 5142 ކޭހުގެ އިތުރު ވުމެއް ކަމަށް މިނިސްޓަރު ވިދާޅުވިއެވެ.
ތަފާސްހިސާބަށް ބަލާއިރު، 1446 ވަނަ އަހަރު ރޯދަ ހަދިޔާގެ ގޮތުގައި މުޅި ރާއްޖެއަށް ދޫކުރެވުނީ 111237 މަސްދަޅު ކޭހެވެ. މި އަހަރު އެ އަދަދުވަނީ 113382އަށް އަރާފައެވެ. މިއީ 2145 ކޭހުގެ އިތުރު ވުމެކެވެ.
މިއީ ރޯދަ ހަދިޔާ ޕްރޮގްރާމް ހިންގާ 3 ވަނަ އަހަރެވެ. މި ދިޔަ އަހަރެކޭ އެއްފަދައިން މި އަހަރު ވެސް ސަރުކާރުން ދޫކޮށްފައިވަނީ ދިވެހި ކޮންމެ ޢާއިލާއަކަށް 48 ދަޅުގެ މަސްކޭހެކެވެ.
ކުރީ އަހަރާ ބަލައި މިއަހަރު އަތޮޅު ތެރެއަށް ދޫކުރި މަސްދަޅު ކޭހުގެ އަދަދު މަދުވުމާ ބެހޭގޮތުން މިނިސްޓަރު ވިދާޅުވީ، މިދިޔަ އަހަރަށް ވުރެ މިއަހަރު މާލެއަށޤ ދޫކުރި މަސްކޭހުގެ އަދަދު ގިނަވުމުން، މިއީ ގިނަބަޔަކު މާލެ އަށް ހިޖުރަ ކުރުމުގެ ސަބަބުން އައި ބަދަލެއްކަމަށް މިނިސްޓަރު ވަނީ ފާހަގަކުރައްވާފައެވެ. މިނިސްޓަރު ވިދާޅުވީ ކަައުންސިލްތަކުން ރޯދަ ހަދިޔާ ދޫކުރާނެ ގޭބިސީތައް އަތޮޅުތެރޭގެ ރަށްރަށުގައި ކަނޑައަޅި ލިސްޓާ އެއްގޮތަށް މަސްދަޅު ކޭސް ދޫކޮށްފައިވާކަމަށެވެ. އަދި މާލޭ ސަރަހައްދުގައި ގޭބިސީތައް ދެނެގަތުމަށް ޓަކައި އަސާސީ މަސްދަރެއްގެ ގޮތުގައި ބަލާފައިވަނީ، ސްޓެލްކޯގެ ޑޮމެސްޓިކް ކަރަންޓް މީޓަރަށްކަމަށެވެ.
މި އަހަރުގެ ރޯދަ ހަދިޔާ ބެހުމުގެ އަމަލީ މަސައްކަތް ފެށިފައިވަނީ މިއަހަރުގެ ޖަނަވަރީ މަހުއެވެ.
