ސައުދީގެ ވެރިރަށް ރިޔާދުގައި ހުންނަ އެމެރިކާގެ އެމްބަސީއަށް އީރާނުން ހަމަލާދީފިއެވެ.
ސައުދީގެ ދިފާއީ އޮފިޝަލުންނާ ހަވާލާދީ ހަބަރުފަތުރާ އިދާރާތަކުން ބުނެފައި ވަނީ، އީރާނުގެ ހަމަލާ އެމްބަސީއަށް އަރާފައި ވީ ނަމަވެސް ޑިމްޕޮމޭޓުން ތިއްބަވާ ކޮމްޕައުންޑަށް މާބޮޑު ގެއްލުން ލިބިފައި ނުވާ ކަމަށެވެ.
އީރާނުން މި ހަމަލާ ދީފައިވަނީ އޭގެ ޒާތުގައި ޖެހި ގޮވާގޮތަށް ތައްޔާރު ކޮށްފައިވާ 2 ޑްރޯނެއް ބޭނުން ކޮށްގެންނެވެ.
ހަބަރުތަކުން ބުނާގޮތުން އީރާނުން ވަނީ ޑްރޯން ބޭނުންކޮށްގެން ސައުދީގައި ހުންނަ އެމެރިކާގެ އެހެން ބައެއް މަގާމުތަކަށް ވެސް ހަމަލާ އަމާޒު ކޮށްފައެވެ. ނަމަވެސް އެތަންތަނަށް ގެއްލުމެއް ލިބުނު ކަމުގެ ރިޕޯޓެއް ނެތެވެ.
މި ހަމަލާ ދިން ފަހުން 'ނިއުސްނޭޝަން' ކިޔާ ނޫސް އެޖެންސީއަކަށް ދެއްވި އިންޓަވިއުއެއްގައި އެމެރިކާގެ ރައީސް ޑޮނާލްޑް ޓްރަމްޕް ވަނީ ގަދަ އިންޒާރު ދެއްވާފައެވެ.
އެގޮތުން އޭނާ ވިދާޅުވީ، އެމްބަސީއަށް ހަމަލާ ދިނުމާއި، އީރާނުގެ ހަމަލާތަކުގައި މަރުވި އެމެރިކާ ސިފައިންގެ ބަދަލު ހިފާގޮތް ވަރަށް އަވަހަށް ފެންނާނެ ކަމަށެވެ.
ހަބަރުތައް ބުނާގޮތުން، އީރާނުން އެމްބަސީއަށް ހަމަލާ ދިން ވަގުތު އެ އެމްބަސީ ހުރީ ހުހަށެވެ. މެދުއިރުމަތީގައި ހުންނަ އެމެރިކާގެ މަގާމުތަކަށް އަމާޒުކޮށް އީރާނުން ހަމަލާ ދެމުން ގެންދާތީ، އެ ސަރަހައްދުގެ ގައުމުތަކުގައި ތިބި އެމެރިކާގެ ރައްޔިތުން ވަގުތުން ފައިބަން އެމެރިކާގެ ސަރުކާރުން އަންގާފައި ވުމުގެ އިތުރުން، އެތަންތާނގައި ތިބި އެމެރިކާގެ ރައްޔިތުން ވަނީ އެކިއެކި ތަންތަނަށް ގޮސް ރައްކާތެރިކަން ހޯދާފައެވެ.
ޓްރަމްޕް ވިދާޅުވަނީ އީރާނަށް ދޭ ހަމަލާތައް 4-5 ހަފްތާއަށް ދެމިގެން ދާނެ ކަމަށާއި ފަހަރުގައި އެއަށްވުރެ ދިގުލައިގެން ދިޔުންވެސް އެކަށީގެންވާ ކަމަށެވެ. މި ހަނގުރާމައާ ގުޅޭ ގިނަ މައުލޫމާތު އެމެރިކާގެ އާންމު ރައްޔިތުންނަށް ސާފުކޮށް ކިޔައިދެމުން ނުދާ އިރު، ގިނަ ބަޔަކު ތިބީ ވާނުވާގައެވެ.
އެމެރިކާގައި ކުރީއްސުރެ އޮންނަ ސިޔާސަތަކީ، އާންމު ރައްޔިތުންނަށް އެނގެން ބޭނުންނުވާ މައުލޫމާތެއް ވިއްޔާ އެމެރިކާއަށް ފެންނަ ގޮތަށް ހިދުމަތްދޭ ބައިނަލްއަގުވާމީ މީޑިއާތަކުންވެސް އެމައުލޫމާތެއް އެމެރިކާއަށް ނުފެންނަ ގޮތް ހެދުމެވެ. އެގޮތުން ސީއެންއެން ފަދަ ޗެނަލްތަކުގައި އެމެރިކާއަށް ފެންނާނީ އެގައުމުގެ އެތެރޭގައި ދައްކަން ހުއްދަ އޮންނަ މަންޒަރާއި އަޑެވެ. އާންމުކޮށް ބޭރަށް ފެންނާނެހެން ހުންނަ މަންޒަރާއި އަޑު، ގިނަ ޕްރޮގްރާމުތަކުގައި ތަފާތު ކުރެއެވެ.
މި ހަނގުރާމައާ ގުޅިގެން އެމެރިކާގެ ބައެއް ސިޓީތަކުގައި ކުރިއަށް ގެންދިޔަ ހިޔާލު ހޯދުމުގެ ވޯޓަކުން ދައްކާގޮތުން އެމެރިކާގެ 38 ޕަސެންޓް މީހުން މި ހަނގުރާމައާ ދެކޮޅެވެ. ދެން ތިބި މީހުން ހުށަހަޅަނީ މަޝްވަރާއިން ހައްލު ހޯދުމަށެވެ. ހަނގުރާމަ ކޮށްގެން ވިޔަސް އީރާންގެ ދުވަސް ދުއްވާލަން ބުނަނީ 18 ޕަސެންޓް މީހުންނެވެ.
އެމެރިކާ އާއި އިޒްރޭލުން އީރާނަށް ހަމަލާތައް ދޭން ދެއްކި ގިނަ ބަހަނާތަކުގެ ތެރޭގައި ނިއުކްލިއާ ހަތިޔާރެއް އުފައްދަން އުޅެނީ ކަމަށް ބުނުމާއި، އެއްބައްރުން އަނެއް ބައްރަށް ދަތުރު ކުރާ ވަރުގެ ބެލެސްޓިކް މިސައިލް ހަދަނީ ކަމަށް ބުނުމާއި، އެމެރިކާއާއި އިޒްރޭލުގެ ދެމިއޮތުމަށް އޮތް ނުރައްކަލެއް ކަމަށް ބުނުން ފާހަގަ ކުރެވެއެވެ. އަދި މީގެ އިތުރުން މެދުއިރުމައްޗަށް ވެސް އޮތް ނުރައްކަލެއް ކަމަށް އެމެރިކާއިން ބުނެފައި ވެއެވެ.
އީރާނަށް ދޭ ހަމަލާތައް ގަލްފުގެ ގައުމުތަކުން ކުށްވެރި ކޮށްފައި ނުވާ އިރު އެގައުމުތަކުން ގެންދަނީ އެމީހުންގެ ވައިގެ ސަރަހައްދުތަކާއި އެހެނިހެން ވަސީލަތްތައް ބޭނުންކުރުމުގެ ފުރުސަތު އެމެރިކާއަށް ދީ އީރާނަށް ހަމަލާ ދިނުމުގެ މަގުތައް ފަހިކޮށްދެމުންނެވެ.
މިކަމާ ގުޅިގެން އީރާނުން ބުނެފައިވަނީ، އީރާނަށް ރައްކާތެރިކަމެއް ނެތިއްޔާ އަވަށްޓެރިންނަށްވެސް ރައްކާތެރިކަމެއް ނެތް ކަމަށެވެ.
