އިންޑިއާ ކަނޑުގަ އައްޑޫ ހިމެނޭހެން ގްރީން އިކޮނޮމިކް ކޮރިޑޯއެއް އުފެއްދުމަށް ވިސްނުންފުޅު ގެންގުޅުއްވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެކްސްގައި ހިއްސާކުރެއްވި ވީޑިއޯ މެސެޖެއްގައި އައްޑޫ އަތޮޅާ ގުޅުންހުރި ކަންކަމާ ބެހޭގޮތުން ވާހަކަ ދައްކަވަމުން ނަޝީދު ވިދާޅުވީ އައްޑޫ އަތޮޅުގެ އެންމެ ބޮޑު ނިއުމަތަކީ ގުތުރަތީ ގޮތުން އައްޑޫ އަތޮޅު، އިންޑިއާ ކަނޑުގެ ސީދާ މެދުގައި އޮތް އޮތުން ކަމަށެވެ. އަދި އައްޑޫގެ އެއްކޮޅުގައި އެފްރިކާ އޮތް އިރު އަނެއްކޮޅުގައި އިންޑޮނޭޝިއާ، މެލޭޝިއާ، އަދި ސިންގަޕޫރު އޮތްކަމަށް ފާހަގަ ކުރައްވާފައިވެއެވެ.
ނަޝީދު ވިދާޅުވީ އިންޑިއާ ކަނޑަކީ ވަރަށް ގިނަ ބޯޓު ފަހަރު ދަތުރު ކުރާ ކަނޑެއް ކަމަށާއި، ދުނިޔޭގެ އެތައް މިތަނުން މުދާ އުފުލައިގެން ދަތުރުކުރާ ބޯޓު ފަހަރު އިންޑިއާ ކަނޑުގެ ސަރަހައްދު ހުރަސް ކުރާކަމަށެވެ. މިހެން ކަމުން ނަޝީދުގެ ވިސްނުންފުޅަކީ އިންޑިއާ ކަނޑުގަ އައްޑޫ ހިމެނޭހެން ގްރީން އިކޮނޮމިކް ކޮރިޑޯއެއް ގާއިމުކުރުމެވެ.
މި ކޮރިޑޯ ކެންޔާގެ މުމްބާސާ އިން ފަށައިގެން، ދެން އައްޑޫ އަދި އިންޑޮނޭޝިއާގެ ޖަކާޓާ އަށް ނިންމުމަށް ފެންނަކަމަށް ނަޝީދު ފާހަގަ ކުރެއްވިއެވެ. ނަޝީދު ވިދާޅުވީ މި ގްރީން ކޮރިޑޯގެ މެއިން ރޫޓުން އައްޑޫ އަކީ ޓްރާންސްޝިޕްމަންޓް ޕޯޓަކަށް ހެދުމަށްފަހު، އިރުމަތީ އެފްރިކާ ގައުމުތަކުން، ހާއްސަކޮށް، ކެންޔާ އަދި ސޯމާލިއާ އިން ކުދި ކޮންޓެއިނަރު ބޯޓުފަހަރުގައި މުދާ އައްޑޫއަށް ގެނެސް، އައްޑޫގައި މުދާ ބަހައްޓާފައި، އެބޯޓުފަހަރު އެފްރިކާއަށް އަނބުރާ ދެވޭނެ އިންތިޒާމް ހަމަޖެހިގެންދާނެކަމަށެވެ. ހަމައެހެންމެ ޖަކާޓާއިން މުދާ ބަރުކޮށްގެން ގެނެސް އައްޑޫގައި މުދާ ބަހައްޓާފައި، އައްޑޫގައި ހުރި އެފްރިކާއިން ގެނައި މުދާ އިންޑޮނޭޝިއާއަށް ގެންދިއުމަށް މަގުފަހި ވެގެންދާއިރު، އެފްރިކާ ބޯޓު ފަހަރު އަނބުރާ އެފްރިކާ އަށް ދާއިރު އިންޑޮނޭޝިއާ އިން އައްޑޫގައި ބަހައްޓާފައި ހުރި މުދާ އެފްރިކާއަށް ހިފައިގެން ދިއުމުގެ އިންތިޒާމްތައް ކުރެވުންކަމަށެވެ.
ގްރީން ކޮރިޑޯއެއްގެ ގޮތުގައި މި މަޝްރޫއު ފެށިގެން ދިއުމުން ހުރިހާ ކަމެއްވެސް އިޔާދަ ކުރަނިވި ހަކަތައިން ކޮށް، އެހެން ކަންކަން ވެސް ތިމާވެއްޓަށް ބެލުމަށްފަހު ނޫނީ ނުކުރުމަށް ނަޝީދު ލަފާ ދެއްވިއެވެ. އަދި މިމަޝްރޫއުއަކީ ގްރީން އިކޮނޮމިކް ކޮރިޑޯއެއްގެ ގޮތުގައި އައްޑޫއިން މުޅި ދުނިޔެއަށް މިކަން އަންގައިދިނުމުގެ މުހިންމުކަންވެސް ނަޝީދު ފާހަގަ ކުރެއްވިއެވެ.
ނަޝީދު ވިދާޅުވީ ދާދިފަހުން ކެންޔާގެ ރައީސާއެކު ބައްދަލު ކުރައްވާ މަޝްވަރާ ކުރައްވާފައިވާކަމަށެވެ. އަދި މިކަމުގައި އެފްރިކާއިން އެއްބާރުލުން ލިބޭނެކަމުގެ ޝައުގުވެރިކަން ފާޅުކުރައްވާފައިވާކަަމަށެވެ. މިހެން ކަމުން ދެން މިކަމުގައި އޮތީ ރާއްޖޭގެ ކަމާ ގުޅުން ހުރި ފަރާތްތަކުގެ އިތުރުން އިންޑޮނޭޝިއާ އާއެކު މަޝްވަރާތައް ފަށައި، މިކަމުގައި ހުރި ފީޒިބިލިޓީ ސްޓަޑީތައް ހެދުންކަމަށް ނަޝީދު ވިދާޅުވިއެވެ.
