އެމެރިކާ އާއި އިޒްރޭލުން އީރާން ފުނފުނޑު ކޮށްލުމަށް ދެމުން ގެންދާ ހަމަލާގެ މަދަދުވެރިންނަށް އަމާޒުކޮށް އީރާނުން ދޭ ހަމަލާތައް ތެލުގެ އިންޑަސްތްރީއަށް އަމާޒުވެ އުފެއްދުންތެރިކަމަށް ބުރޫއެރުމާއެކު އަގުތައް އުފުލިއްޖެއެވެ.
އީރާނުގެ ހަމަލާއެއް އަމާޒުވެ ސައުދީގެ އެންމެ ބޮޑު ކާރުހާނާ 'ރަސް ތަނޫރާ' މިހާރުވެސް ދަނީ އަނދަމުންނެވެ.
ގަތަރު ސަރުކާރުން ހިންގާ 'ގަތަރުއެނާޖީ' އިން ވަނީ، އެ ކުންފުނިން އުފައްދާ ލިކްއިފައިޑް ގޭސް އުފެއްދުން ވަގުތީ ގޮތުން ހުއްޓާލާފައެވެ. މިއީ ޔޫރަޕަށް އެންމެ ގިނައިން ގޭސް އެތެރެކުރާ އެއް ގައުމު ކަމަށް ވުމާއެކު ޔޫރަޕުގައި ގޭހުގެ އަގުތައް ދަނީ ރޮކެޓް ސްޕީޑްގައި މަތިވަމުންނެވެ. އެގޮތުން ހަނގުރާމައިގެ ކުރިން ހުރި އަގުގެ 50 ޕަސެންޓް މިހާރު ވަނީ ބޮޑުވެފައެވެ.
ތެލުގެ ބާޒާރަށް ބަލާއިރު، މެދުއިރުމަތީގެ ތެޔޮ އެންމެ ގިނައިން އެތެރެ ކުރާ އޭޝިއާ ބައްރުގެ ގައުމުތަކަށް ދަތިތަކާ ކުރިމަތިވަމުން ދާއިރު އީރާނުން ވަނީ ތެޔޮ އުފުލާ ހޮރުމޫޒު ކަނޑިއޮޅި ބަންދުކޮށްފައެވެ. ކަނޑުމަތިން ތެޔޮ ޓޭންކަރުތަކަށް ހަމަލާ ދިމުނާއި އެއްގަމުގައި ހުރި ތެޔޮ ރިފައިނަރީތަކަށް ހަމަލާ އަމާޒު ކުރަމުން ދިޔުމުގެ ސަބަބުން ތެލުގެ އަގުތައް ވެސް ދަނީ އުފުލެމުންނެވެ. އެގޮތުން މިހާރު އަގުތައް ވަނީ 80 ޑޮލަރާ ކައިރި ކޮށްފައެވެ.
މެދުއިރުމަތިން އެންމެ ގިނައިން ތެޔޮ ގެންދާ އެއް ގައުމު ކަމަށް ވާ ޖަޕާނުން ވެސް މިހާރު ދަނީ ހާއްސަ ފިޔަވަޅުތައް އަޅަމުންނެވެ.
ރަސް ތަނޫރާ ފެކްޓަރީ އަކީ ދުނިޔޭގައި ހުރި އެންމެ ބޮޑު ފެކްޓަރީތަކުގެ ތެރޭގައި ހިމެނޭ ފެކްޓަރީއެއް ކަމުގައި ވާއިރު އެތަނުން ދުވާލެއްގެ މައްޗަށް 550،000 ފީފާގެ ތެޔޮ އުފައްދާ ބޭރުކުރެއެވެ.
އީރާނުގެ ހަމަލާތައް ކްލެއިތު، ބަހުރައިން، އުރުދުން، ގަތަރު، ޔޫއޭއީ އަށް ވަނީ އަމާޒު ކޮށްފައެވެ.
މުޅި މެދުއިރުމަތި ހަނގުރާމައިގެ ވިލާގަނޑެއްގެ ދަށުގައި މިހާރު އޮތް އިރު، އީރާނުން ބުނެފައި ވަނީ މިފަހަރު 'ރަތް ރޮނގެއް' ނޯންނާނެ ކަމަށާއި އެމެރިކާއަށް މަދަދުވެރިރާ އެންމެހާ ފަރާތްތަކަށް ހަމަލާ ދޭނެ ކަމަށެވެ.
