ފައިޓާ ޖެޓްތައް ވެއްޓޭ މަންޒަރު ފެންނަ ވީޑިއޯތައް އާންމުވެފައި ވާއިރު، އެމެރިކާއިން ބުނެފައި ވަނީ، އެމީހުންގެ 3 ފައިޓާ ޖެޓު ކުވެއިތަށް ވައްޓާލެވިއްޖެ ކަމަށެވެ.
އެކަން ކުރެވިފައިވަނީ އޮޅިގެން ކަމަށް ބުނެ ކުވެއިތުން މިހާރު ވަނީ އެކަން ހިނގާދިޔަގޮތުގެ ތަހުގީގެއް ފަށާފައެވެ.
އެެމެރިކާ އާއި އިޒްރޭލުން އީރާނާ ދެކޮޅަށް ފަށާފައިވާ ހަނގުރާމައިގައި ކުވެއިތަކީވެސް އެމީހުންގެ މަދަދުގާރެކެވެ. އެހެން ކަމުން އެ ހާދިސާ ސިފަ ކޮށްފައިވަނީ އެއީ 'ފްރެންޑްލީ ފަޔާ' އެއްގެ ގޮތުގައެވެ.
ބޮން އެޅުމަށާއި މިސައިލް ހަމަލާއަށް އެމެރިކާއިން ގެންގުޅޭ އެފް15 އީ މަރުކާގެ މި ޖެޓުތައް ވެއްޓޭއިރު އޭގެ ޕައިލެޓުން ވަނީ ޖެޓް ވެއްޓުމުގެ ކުރިން ފުންމާލާފައެވެ. އެހެންކަމުން އަނިޔާއެއް ނުލިބި ހުރިހާ ޕައިލެޓުންވެސް ވަނީ ސަލާމަތް ވެފައެވެ.
އެމެރިކާގެ ސެންޓަރަލް ކޮމާންޑް (ސެންޓްކޮމް) އިން އާންމު ކުރި ބަޔާނެއްގައި ބުނީ، ކުވެއިތަށް އެކަން ކުރެވިފައިވަނީ އޮޅިގެން ކަމަށާއި މިހާރު ކުރިއަށް ދާ ހަނގުރާމައިގައި ކުވެއިތުން ދޭ އެއްބާރުލުމަށް ޝުކުރު އަދާކުރާ ކަމަށެވެ.
އިތުރަށް ކްވެއިތުން ބުނެފައިވަނީ އެގައުމަށް އަމާޒުކޮށް އީރާނުގެ ޑްރޯން ހަމަލާތަކައި މިސައިލް އަންނަ ކަމަށާއި އެތަކެތި ނައްތާލުމުގައި ކްވެއިތުގެ ސަލާމަތީ ބާރުތަކުން ފުރިހަމަ މަސައްކަތެއް ކުރަމުން ދާ ކަމަށެވެ.
އިޒްރޭލާއި އެމެރިކާގެ ހަމަލާތައް 3 ވަނަ ދުވަހަކަށް ދެމިގެން ގޮސްފައި ވާއިރު އެމީހުން ގެންދަނީ އީރާނުގެ ވެރިރަށަށާއި އެތަން މިތަނަށް އަދި އާންމު ހިދުމަތްތައް ދޭ ތަންތަނަށް ވެސް ވަރުގަދަ ހަމަލާތައް ދެމުންނެވެ. އެގޮތުން ހޮސްޕިޓަލްތަކާއި ކްލިނިކްތަކާއި ސްކޫލުތަކަށް ވަރުގަދަ ހަމަލާތަކެއް ދީ ގިނަ އަދަދެއްގެ ބަޔަކު ވަނީ މަރާލާފައެވެ.
އިޒްރޭލާއި އެމެރިކާގެ ހަމަލާތަކުގައި މަރުވި މީހުންގެ ސީދާ އަދަދު އަދި ސާފު ނުވި ނަމަވެސް ސްކޫލުތަކަށް އަމާޒުކޮށް ދިން ހަމަލާތަކުން އެކަނިވެސް 150 އަށް ވުރެ ގިނަ ދަރިވަރުން މަރުވި ކަމަށް ހަބަރުތައް ބުނެއެވެ.
އިޒްރޭލުން އީރާނުގެ އެތެރެއަށް ދޭ ހަމަލާތައް ވަރުގަދަ ކޮށްފައި ވާއިރު އެމެރިކާއިން ގެންދަނީ އީރާނުގެ ކަނޑުގެ ދިފާއީ ބާރުގައި ހިމެނޭ އުޅނަދުތަކަށް ހަމަލާދީ ގޮއްވާލަމުންނެވެ. އެގޮތުން މިހާތަނަށް 9 މަނަވަރެއް ގޮއްވާލާފައި ވާކަމަށް އެމެރިކާގެ އޮފިޝަލުން ބުނެއެވެ.
އީރާނުންވެސް ގެންދަނީ އިޒްރޭލަށް އަމާޒު ކޮށާއި އަދި އެމެރިކާގެ މަގާމުތަކަށް އަމާޒުކޮށް ހަމަލާތައް ފޮނުވަމުންނެވެ. އޭގެ ތެރެއިން ބައެއް ހަމަލާ، އޭގެ ބާރުމިނުގައި އަމާޒުތަކަށް ވާސިލުވެފައި ވާއިރު، އީރާނުގެ މަސްދަރުތަކުން ބުނެފައި ވަނީ ސަރަހައްދުގައި ހިމެނޭ އެމެރިކާގެ 27 މަގާމަކަށް ހަމަލާ ދީފި ކަމަށެވެ. އަދި އިޒްރޭލަށް އަމާޒުވާ ހަމަލާތަކުގައި އިމާރާތްތައް ބިމާ ހަމަވެފައި ވެއެވެ.
