ރާއްޖެއިން މިއަހަރު ދައްކަން ޖެހޭ އެންމެ ބޮޑު ބޭރުގެ ދަރަނި 500 މިލިއަން ޑޮލަރުގެ ސްކޫކް ވަގުތުން ވަގުތަށް ދައްކަން ޖެހުނު ކަމަށްވީ ނަމަވެސް އެކަން ކުރެވޭނެ ގާބިލްކަން އެބަހުރި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ނޫސްވެރިންނާ ބައްދަލުކުރެެއްވުމަށް މިއަދު ކުރިއަށްގެންދެވި ނޫސްވެރިންގެ ބައްދަލުވުމުގައި ރައީސް ވިދާޅުވީ، 8 އެޕްރީލް ވަނަ ދުވަހު ރާއްޖެއިން ސްކޫކަށް ދައްކަން ޖެހޭ ފައިސާ އެކީ ދައްކާ ހަލާސްކުރާނޭ ކަމަށެވެ.
އަދި އެ ތާރީހުގައި ފައިސާ ދައްކަން ރައްކާކޮށްފައި 650 މިލިއަން ޑޮލަރު ހުރިކަން ފާހަގަކުރައްވާ ރައީސް ވިދާޅުވީ، 500 މިލިއަން ޑޮލަރުގެ ސްކޫކް ދައްކާފައި 150 މިލިއަން ޑޮލަރަށް ވުރެ ގިނައިން ހުންނާނެ ކަމަށެވެ.
މީގެ އިތުރުން، ދައުލަތުގެ ރިޒާވްގެ ހާލަތަށް އަލިއަޅުއްވާލައްވަމުން ރައީސް ވިދާޅުވީ، ސޮވެރިން ޑިވެލޮޕްމަންޓް ފަންޑު (އެސްޑީއެފް)ގައި މިހާރު 320 މިލިއަން ޑޮލަރަށްވުރެ ގިނަ ފައިސާ ހުރި އިރު، ޔޫސަބަލް ރިޒާވްގައި 330 މިލިއަން ޑޮލަރު އެބަހުރި ކަމަށެވެ. އަދި ރާއްޖޭގެ ޖުމްލަ ރިޒާވްގައި މިހާރު 1.27 ބިލިއަން ޑޮލަރު އެބަހުރި ކަމަށެވެ. މިއީ ރެކޯޑެއް ކަމަށް ވެސް އެމަނިކުފާނު ފާހަގަކުރެއްވިއެވެ.
ރައީސް ވިދާޅުވީ ރިޒާވް ރަނގަޅަށް ހުރުމުގެ ސަބަބުން މެދުއިރުމަތީގައި މިހާރު ހިނގާ ހަނގުރާމައިގެ އަސަރުތައް ކުޑަކުރަން ވެސް އެހީއަކަށް އަދި ފަސޭހައަކަށްވެގެންދާނެ ކަމަށެވެ.
މީގެ އިތުރުން ވެސް ޑޮލަރު މާރުކުރަން މަޖުބޫރުކޮށް ބޭރު ފައިސާ މާރުކުރުމުގެ ގާނޫނަށް ގެނައި ބަދަލާ އެކު މިއަހަރުގެ ފެބުރުއަރީގެ ނިޔަލަށް ވެސް މަރުކަޒީ ބޭންކް، އެމްއެމްއޭއަށް 116 މިލިއަން ޑޮލަރު މާރުކޮށްފައިވާ ކަމަށް އެމަނިކުފާނު ފާހަގަ ކުރެއްވިއެވެ.
