ދިރިއުޅުމުގައި ކޮންމެ މީހަކަށް ވެސް ތަފާތު ކަންކަމާ ކުރިމަތިލާން ޖެހެއެވެ. ބައެއް ފަހަރު ދިރިއުޅުމުގައި ބޮޑެތި ނިންމުންތައް ނިންމަންޖެހޭ ހިނދު ފަސްޖެހި ފިޔަވަޅެއް ނަގަން އުނދަގޫވެއެވެ. ކޮންމެ ކަމަކާ ކުރިމަތިލާން ޖެހުނަސް ފައްސި ވިސްނުމެއްގައި ހުންނަން ދަތިވާއިރު، ދިމާވާ ކަންކަމުގެ ސަބަބުން މާޔޫސްވެ، އަމިއްލަ ނަފްސަށް އޮންނަ އިތުބާރު ގެއްލޭ ފަހަރު ވެސް އާދެއެވެ. މިފަދަ ހުރަސްތަކާ ކުރިމަތި ލާން ޖެހެނީ ހަމައެކަނި ޒާތީ ދިރިއުޅުމުގެ ތެރެއިން އެކަންޏެއް ނޫނެވެ. ވަޒީފާގެ މާހަލުގައި ވެސް މެއެވެ.
ނަފްސާނީ ދުޅަހެޔޮކަން ރަނގަޅު ކުރުމަށްޓަކައި ތަފާތު ހިދުމަތްތައް ދޭ އިރު ކޯޗިން ހިދުމަތް ދޭ މީހުންނަކީ މިހާރު މި މުޖުތަމައުއިން ވެސް ފެންނަ ބައެކެވެ. އެގޮތުން ރޯދަ މަހަށް ހާއްސަކޮށްގެން ގެނެސްދޭ 'މީހުން' ސެގްމަންޓްގައި މިއަދު މި ގެނެސްދެނީ ކޯޗެއްގެ ގޮތުގައި އަދި ކޭންފީލްޑް ޓްރެއިނާއެއްގެ ގޮތުގައި މަސައްކަތް ކުރަމުން އަންނަ ގިނަ ބަޔަކު ދަންނަ މޫނެއް ކަމުގައި މަރިޔަމް މުހައްމަދުގެ ވާހަކައެވެ.
އޯގަނައިޒޭޝަނަލް ސައިކޮލޮޖީގެ ދާއިރާއިން ކިޔަވަމުންދާ އަދި އެންއެލްޕީ ޕްރެކްޓިޝަނާއެއް ގޮތުގައި މަސައްކަތް ކުރަމުން އަންނަ މަރިޔަމް އަކީ މި މަސައްކަތްތަކުގެ އިތުރުން ވެސް ދެ ވިޔަފާރިއެއް ވެސް ކުރިއަށް ގެންދާ ފަރާތެކެވެ. ކޯޗިން ސްޓޫޑިއޯއަކާއި ޕާސަނަލް ޑިވެލޮޕްމަންޓް ޓްރެއިނިން އިންސްޓިޓިއުޓެއް، އަމިއްލަ ފަރުދުންނަށާއި އޮފީސް ފަދަ ގްރޫޕްތަކަށް ކޯޗިން ހިދުމަތް ދިނުމަށް ހިންގާ ދެ ވިޔަފާރީގައި މަރިޔަމް އާއެކު ކޯޗިން ޓީމަކާއި ޓްރެއިނާސް ޓީމެއް ވެސް އަންނަނީ ހަރަކާތެރިވަމުންނެވެ.
ވަޒީފާއާ ދުރުގަ 9 އަހަރު ހުރުމަށްފަހު އަލުން ވަޒީފާ ހޯދަން ނިކުމެ 16 ރިޖެކްޝަން
މަރިޔަމްގެ ހަޔާތުގައި އެންމެ ބޮޑު ނާކާމިޔާބީއާ ކުރިމަތިލައި މިއަދު މަރިޔަމް ހުރި ހިސާބަށް އައުމުގެ ދަތުރު ފެށުނު ގޮތް ހިއްސާކުރަމުން ބުނީ، މަދްރަސީ ހަޔާތް ނިންމާލުމަށް ފަހު ވަޒީފާގެ މާހައުލުގައި 7 އަހަރު ދުވަހު މަސައްކަތް ކުރި އިރު އެންމެ ފުރަތަމަ މަރިޔަމް މަސައްކަތް ކޮށްފައި ވަނީ އެންޓި ކޮރަޕްޝަން ކޮމިޝަންގެ ބޯޑުގައި ކަމަށެވެ. އެއަށް ފަހު ރައީސް އޮފީހުގައި މަސައްކަތް ކުރުމަށްފަހު ދެން މަރިޔަމް މަސައްކަތް ކުރީ ސަންލޭންޑް ގައެވެ. މި ތަންތަނުގައި ވެސް މަރިޔަމް މަސައްކަތް ކޮށްފައި ވަނީ މާކެޓިންގެ ދާއިރާގައެވެ.
7 އަހަރު ދުވަހު މަސައްކަތުގައި އުޅުމަށްފަހު މަތީ ތައުލީމް ހާސިލް ކުރުމަށް ރާއްޖެއިން ބޭރަށް އޭނާ ދިޔައެވެ. ނަމަވެސް ބަލިވެއިނުމުން ވަޒީފާގެ މާހައުލާ ދުރަށް ޖެހިލިއެވެ. ވަޒީފާއާ ދުރުގައި ހޭދަކުރި 9 ވަރަކަށް އަހަރު ތެރޭ ކޮންމެވެސް ވަރަކަށް ވިޔަފާރީގެ ކަންކަމުގައި ވެސް އޭނާ އުޅުނެވެ. ހަމައެއާއެކު އެ މުއްދަތުތެރޭގައި މަތީ ތައުލީމް ފުރިހަމަ ނުވެ އިން ބައި ނިންމާލައި ޑިގްރީ ހާސިލްކުރުމަށްފަހު މަރިޔަމް އަނެއްކާ ވެސް ވަޒީފާއެއް ހޯދަން މަސައްކަތް ފެށިއެވެ.
އެގޮތުން ވަޒީފާއަށް އެދި ހުށަހެޅި ގިނަ ތަންތަނުން ރިޖެކްޓް ވެގެން ދިޔަ ކަމަށާއި 16 ތަނަކަށް ވަޒީފާއަށް ލައިގެން ވެސް ވަޒީފާ ހަމަނުޖެހުނު ކަމަށް އޭނާ ބުނެއެވެ. އަލުން ވަޒީފާއެއް ހޯދުމަށް ފެށި ދަތުރުގައި ދިމާވި ނާކާމިޔާބީއާ ކުރިމަތިލީ އިރު، "ޑެސްކެއްގެ ދޮށުގައި އިނދެގެން ވަޒީފާ އަދާކުރުން" މިއީ އޭނާ ބޭނުންވާ ގޮތް ތޯ އަމިއްލަ ނަފްސާ ސުވާލު ކުރިއެވެ. އަދި އަމިއްލަ ނަފްސު ހޯދުމުގެ ދަތުރުގެ ތެރޭގައި އޭނާއަށް އޭނާގެ ފުރަތަމަ މެންޓާ، ބޮބް ޕްރޮކްޓާއާ ދިމާވެ އެ ދަތުރުގެ މަންޒިލް ފެށުނީ އެހިސާބުންނެވެ.
ކޮވިޑްގެ ބަލިމަޑުކަން ފެތުރިގެން ދިޔަ ދުވަސްވަރު ދުނިޔޭގެ އެކި ކަންކޮޅުތަކުގެ މޮޅެތި ޓްރެއިނާސް އަދި ކޯޗުން އޮންލައިންކޮށް ކުރިއަށް ގެންދިޔަ ކޯސްތަކުގެ މަރިޔަމް ބައިވެރިވެ، އެންމެ ފުރަތަމަ ބޮބް ޕްރޮކްޓާ ކައިރިން އޭނާ ތަމްރީން ވިއެވެ. އެއަށްފަހު ޖެކް ހެންފީލްޑް ކައިރިން ޓްރެއިން ވެގެން ލީސާ ނިކޯލްގެ ފަރާތުން ސްޕީކިން ޓްރެއިނިން ހަދައިގެން އަދި ޓޯނީ ރޮބިންސްގެ ފަރާތުން އެންއެލްޕީ ޓެކްނިކްސްތައް އޭނަ ދަސްކުރިއެވެ. ޕަބްލިކްއަށް އޭނާ އެންމެ ފުރަތަމަ ވީޑިއޯއެއް ލާފައި ވަނީ ވެސް މި ތަމްރީންތައް ހެދުމަށް ފަހުގައެވެ.
2020 ވަނަ އަހަރުން ފެށިގެން ކޯޗިން އަދި ޓްރެއިނާއެއްގެ ގޮތުގައި މަސައްކަތް ކުރަމުން އައި އިރު، ވިޔަފާރީގެ ތެރޭގައި އަންހެނަކު އުޅެންޏާ އަންހެނަކަށް ދިމާވާ ގޮންޖެހުންތަކާ އޭނާއަށް ވެސް ކުރިމަތިލާން ޖެހުނެވެ. އެގޮތުން އަލަށް އެ ދާއިރާއަށް ނިކުތް އިރު އެހެން މީހުން ދެކޭ ނަޒަރިއްޔާގެ ސަބަބުން ޖެހިލުންވާ ހާލަތްތަކާ ކުރިމަތިލާން ޖެހުނެވެ.
މީގެ އިތުރުން ދެން ކުރިމަތިލާން ޖެހުނު ގޮން ޖެހުމަކީ ކޮޕަރޭޓް ޓްރެއިނިންގެ ދާއިރަށް ނިކުތް އާ މޫނަކަށް ވެފައި މަރިޔަމް މަސައްކަތް ފެށި އިރު އޮފީސްތަކުގެ އިތުބާރު ހޯދުން ކަމަށް އޭނާ ބުނެއެވެ. އެގޮތުން އެންމެ ފުރަތަމަ ކޯޕަރޭޓް ޓްރެއިނިން ދިނުމަށް ސްޓޭޖަކަށް އެރީ ރާއްޖޭގެ ހުރިހާ އެކްޒެކެޓިވްސް، ސްޓޭޓް މިނިސްޓަރުންނާއި ޑިރެކްޓާ ޖެނެރަލް ލެވެލްގެ ބޭފުޅުންނަށް ނަގައިދިން ޓްރެއިނިން އެއްގައި ކަމަށް މަރިޔަމް ބުނެއެވެ. އެ ޓްރެއިނިން އަށް ފަހު ގިނަ ބައެއްގެ އިތުބާރު ލިބިގެން ދިޔައެވެ. މި ޓްރެއިނިން ސެޝަން ނަގައިދިނުމަށް އޭނާއަށް ފުރުސަތު ލިބިގެން ދިޔައީ "ވަސީ"ގެ ފަރާތުން ކަން ފާހަގަކޮށް އޭނާއަށް ވަރަށް ހާއްސަ ޝުކުރެއް އަދާކުރިއެވެ.
"ހާލަތަކުން އަރައިގަތުމަށް ބުއްދީގެ ބޭނުކޮށް އެކަމަކުން އަރައިގަތުމަށް ވިސްނުން މުހިއްމު"
ދިވެހިންގެ ތެރޭގައި އެންމެ ބޮޑު ޗެލެންޖަކަށް ވެފައި ވަނީ ފިޔަވަޅު ނެގުން ނުވަތަ ޑިޒިޝަން އެއް ނެގުމުގައި ކަން މަރިޔަމް ފާހަގަކުރިއެވެ. ދުނިޔޭގަ ކާމިޔާބު ކޮންމެ މީހަކަށް ބަލާލި ކަމުގައި ވީ ނަމަވެސް އެ މީހަކު ހުރި ހިސާބުން ދިރިއުޅުމުގައި ކުރިއަށް ދެވެނީ އެމީހަކު އިހްތިޔާރު ކުރާ ޗޮއިސްތަކެއްގެ ސަބަބުން ކަމަށް މަރިޔަމް ބުނެއެވެ. އިންސާނުންނަށް ދެއްވާފައިވާ އެންމެ ވަރުގަދަ އެއް ބާރަކީ އިހްތިޔާރު ކުރުމުގެ ބާރު ކަމަށާއި ބުއްދީގެ ބާރު ބޭނުން ކުރުމަކީ އެންމެ މުހިއްމު ކަމެއްގެ ގޮތުގައި މަރިޔަމް ފާހަގަކުރެއެވެ.
ރާއްޖޭގައި ގިނަ މީހުންނަށް ތާށިވެފައި ހުންނަ ފަދަ އިހްސާސެއްގައި ބަނދެވިފައި ދިރިއުޅުމުގައި ކުރިއަށް ނުދެވެނީ އަމިއްލައަށް އަމިއްލަ ޑިޒިޝަން ނުނެގި ހުންނަން ޖެހުން ކަމަށް މަރިޔަމް ބުނެއެވެ. މިގޮތަށް ޑިޒިޝަން ނަގަން މީހުން ފަސްޖެހުމުގައި އެންމެ ގިނައިން ދައްކާ ބަހަނާއަކީ ކަމެއް ނުކުރުމަށް ދައްކާ އުޒުރުތައް ކަމަށް މަރިޔަމް ފާހަގަކުރިއެވެ. މިއީ ވިކްޓިމް މައިންޑް ސެޓެއް ކަމަށާއި އެމީހަކު ވަށައިގެން ތިބި މީހުންނަކީ އޭނާއަށް ނިކަމެތިކޮށް ހިތާ ބައެއްގެ ގޮތުގައި މިފަދަ މީހުން ގަބޫލު ކުރާ ކަމަށް މަރިޔަމް ބުނެއެވެ.
ނަމަވެސް އެ ހާލަތަކުން އަރައިގަތުމަށް ތިމާއަށް ކުރެވޭނީ ކޮންކަމެއްތޯ އަމިއްލަ ބުއްދި ބޭނުންކޮށްގެން ވިސްނައިގެން ކުރިއަށް ދެވިދާނެއެވެ. ބުއްދީގެ ބޭނުން ހިފައިގެން ރަނގަޅު ގޮތުގައި ވިސްނައިގެން ކަމަކުން ނުވަތަ ހާލަތަކުން އަރައިގަތުމަށް މަސައްކަތް ކޮށްފިއްޔާ އެކަމަކުން އަރައިގަނެވޭނެ އެކި ކަހަލަ ދޮރުތައް ވެސް ހުޅުވިގެން ދާނެ ކަމަށް މަރިޔަމް ބުނެއެވެ. ހަމައެއާއެކު ކޮންމެ މީހަކުވެސް އެމީހަކު ވަށައިގެން އެންމެ ގާތުގައި ގެންގުޅޭ ރަހްމަތްތެރިންނަކީ ވެސް މިކަހަލަ މައިންޑް ސެޓެއްގައި އުޅޭ ބަޔަކަށް ވީމަ އެފަދަ ވިސްނުމުން އަރައިގަތުމަށް އުނދަގޫ ވާނެ ކަމަށް މަރިޔަމް ބުނެއެވެ.
ދިރާސާތަކުން ދައްކާ ގޮތުގައި ކޮންމެ މީހަކުވެސް އެމީހެއްގެ ކޮމްފޯޓް ޒޯނުން ނިކުތުމަކީ އުނދަގޫ ކަމެއް ކަމަށާއި ތިމާ ނުކުރާ ކަމެއް ކުރަން އުޅެންޏާ ނުރައްކަލުގެ ރަނގަބީލެއް ސިކުނޑިން އަޅާނެ ކަމަށް މަރިޔަމް ބުނެއެވެ. ހަމައެއާއެކު ކަމެއްކުރުމުގެ ކުރިން އެކަމާމެދު އެހެން މީހުން ދެކޭނެ ގޮތާމެދު ތިމާ ވިސްނާ ނަމަ ޑިޒިޝަން ނަގަން އުނދަގޫ ވާނެ ކަމަށާއި އަމިއްލަ ސިކުނޑީގައި ދައްކާ ވާހަކަތައް ވެސް ނައްސި ވިސްނުމަަކަށް ދާ ނަމަ ހުރަސްތަކާ ކުރިމަތިލާން ޖެހޭނެ ކަމަށް މަރިޔަމް ބުނެއެވެ. އެހެންކަމުން ޑިޒިޝަންއެއް ނަގާނަމަ ފުރަތަމަ ކަމަކަށް ތިމާގެ ވިސްނުމަކީ ފައްސި ވިސްނުމަކަށް ބަދަލުކުރަން މަސައްކަތް ކުރަން ޖެހެއެވެ.
ހަނދާނު ފޮހެލަން ދަތިވި ދުވަހެއް: ކޮއްކޮ ނިޔާވެގެން ދިއުމާއި މަންމަ ކުރި ހިތާމަ
ދިރިއުޅުމާއި މަސައްކަތުގެ މާހައުލުގައި އުފާވެރިކަން ދެމެހެއްޓުމަށްޓަކައި ކޯޗިން އަދި ޓްރެއިންތައް ހިންގަމުންދާ މަރިޔަމް އަކީ އަބަދުވެސް ހިނިތުންވުމަކާ އެކީގައި ފެންނާނެ މޫނެކެވެ. އޭނާގެ ވިސްނުމާއި މިޒާޖު އެނގޭ މީހުންނަށް ގަބޫލު ކުރެވޭނީ މަރިޔަމް އަކީ ވަރަށް ހިތްވަރުގަދަ އަޒުމް ވަރުގަދަ އަންހެނެއްގެ ގޮތުގައެވެ. އެހެންކަމުން އޭނާއަށް ހިތްދަތިވާ ކަމަކާ ކުރިމަތިލާން ނުޖެހޭނެ ކަމަށް އަދި އަރައިގަންނަން އުންދަގޫވާނެ ހާލަތްތަކެއް ނުހުންނާނެ ކަމަކީ ބައެއް މީހުންގެ ކުރެވޭ ހީއެކެވެ. މަރިޔަމްގެ ހަޔާތުގެ ގިނަ ވާހަކަތކެއް ހިއްސާ ކުރި އިރު އޭނާގެ ހަޔާތުގައި ވެސް ހަނދާނުން ފުހެލަން ދަތިވި ކަންތައްތަކާ ކުރިމަތިލާން ޖެހުނެވެ.
އޭގެތެރެއިން އެއް ދުވަސް ހިއްސާކުރަމުން މަރިޔަމް ބުނީ، މީގެ ދެ އަހަރު ކުރިން އޭނާގެ ކޮއްކޮ ނިޔާވި ހާދިސާއަކީ ހަނދާނުން ފުހެލަން ދަތި ދުވަހެއް ކަމަށެވެ. އެ ދުވަހު ނަފްސާނީ ގޮތުން ވަރަށް ބޮޑަށް އަސަރު ކުރި ކަމަށާއި ނަމަވެސް އެ ދުވަހުން އޭނާއަށް ވަރަށް ބޮޑު ފިލާވަޅެއް ދަސްވެގެން ދިޔަ ކަމަށް މަރީ ބުނެއެވެ.
ރިސޯޓަކަށް ދަތުރެއް ގޮސް އުޅެނިކޮށް ކޮއްކޮ ނިޔާވި ހަބަރު ލިބި މަރީ އަށް ލިބުނީ އެ ދުވަހު ކުއްލި ޝޮކެކެވެ. އެހެން މީހުންނަށް ދިރިއުޅުމުގައި ކުރިއަށް ދާންވީ ގޮތް ކިޔައި ދިނުމަށް ފަރިތަ މަރިޔަމްގެ ދުނިޔެ ހުއްޓިގެން ދިޔަ ގޮތް ހިއްސާކުރަމުން ބުނީ، އެނަމް ބޮޑަށް އަސަރު ކުރީ މަންމަ ކުރަމުންދިޔަ ހިތާމަ ފެނިފައި ކަމަށެވެ. ނަމަވެސް ޖެހިގެން އޮތް ދުވަހަކީ 6 ގަޑިއިރުގެ މޯޓިވޭޝަނަލް ޓްރެއިނިން އެއް ނަގަން ޖެހޭ ދުވަސްކަމުން މަރިޔަމްގެ ދިރިއުޅުމަށް އެޅުނު ހިޔަނީގެ ނިވާފަތްގަނޑުގެ ދަށުގައި ހުރެ އެ ޓްރެއިނިން ކަމިޔާބުކަމާ އެކު އޭނާ ނިންމާލީ ވަރަށް ހިތްވަރާ އެކުގައެވެ. އެ ޓްރެއިނިން ނިންމާލި އިރު ވެސް އެތަނުގައި ތިބި އެއްވެސް ފަރާތަކަށް ކޮއްކޮ ނިޔާވެގެން އުޅޭ ކަން ނޭނގޭނެ ކަމަށާއި އެ ހިތްވަރު އޭނާއަށް ލިބުނީ ކޮއްކޮ ހުރިނަމަ ދައްތައާ މެދު ފަހުރުވެރިވާނެ ކަން ހިތަށް ގެނެވުނު ހިސާބުން ކަމަށް މަރިޔަމް ބުނެއެވެ.
އަމިއްލަ ނަފްސާނީ ދުޅަހެޔޮކަމުގެ ސިއްރު: އަަބަދުވެސް ހިނިތުންވެފަ ހުރުން
ނަފްސާނީ ގޮތުން މީހުން ކުރިމަތިލާން ޖެހޭ ހާލަތްތަކުން އަރައިގަތުމަށް ދޭ ހިދުމަތުގއި މީުންގެ ޒާތީ އެތައް ވާހަކައެއް އަޑު އަހަން ޖެހޭ އިރު، ހިތަށް އަސަރު ކުރާ އެތައް ވާހަތަކެއް އަޑުއަހަން ޖެހޭ ކަމަށް މަރިޔަމް ބުނެއެވެ. އެފަދަ ކްލައޔަންޓުންނާ ވާހަކަ ދައްކައި އެމީހުންނަށް ދިމާވެފައިވާ އަނިޔާތަކާއި ކެކުޅުންތަކާއި ތަޖުރިބާތަކުން އަރައިގަތުމަށް ހިތްވަރުދިނުމަށް ބާރުއަލަން މަސައްކަތް ކުރާ އިރު އަމިއްލަ ނަފްސާނީ ދުޅަހެޔޮ ކަމަށް ވަރަށް ބޮޑު ސަމާލުކަމެއްދޭ ކަމަށް އޭނާ ބުނެއެވެ. އެގޮތުން މިފަދަ ހިދުމަތެއް ދޭ އިރު އަމިއްލަ މީހާ ވެއްޓިއްޖިއްޔާ ދެން ހުރި މީހާ ނަގައި ކޮޅަށް ޖެހުމަކީ ކުރެވޭނެ ކަމެއް ނޫން ކަން ވިސްނައި އަބަދުވެސް ވަރުގަދަ ވިސްނުމެއްގައި ހުރުމުގެ އަޒުމެއްގައި މަސައްކަތް ކުރާ ކަމަށް އޭނާ ބުނެއެވެ. ސްޓްރެސްއާ ދުރުވުމަށް މަރިޔަމް ދެން ކުރާ ކަމަކީ ކަސްރަތު ކުރުމެވެ.
ފައްސި ވިސްނުމެއްގައި ހުރުމަށް އެންމެ ބޮޑު ފަރުވާ އަކީ ނަމާދު ނާޅާ ކުރުން ކަމަށާއި ޒިކުރު ކުރުން ކަމަށް ވެސް މަރިޔަމް ފާހަގަކުރެއެވެ. އަދި އެހެން މީހުންގެ ވާހަކަތައް އަޑު އހެުމަކީ ވެސް ދުނިޔެއަށް ލޯ ހުޅުވި މީހާ "ހީލް" ވުމަށް ލިބޭ ފުރުސަތެއްގެ ގޮތުގައި މަރިޔަމް ފާހަގަކުރެއެވެ. މީގެ އިތުރުންވެސް އަމިއްލަ ދިރިއުޅުމުގެ ކަންކަން ޖާނަލްކުރުމާއި އަބަދު ހިނިތުންވެފައި ހުރުމަކީ ވެސް މަރިޔަމްއަށް މިފަދަ މަސައްކަތެއްގައި އުޅޭ އިރު އަމިއްލަ ނަފްސާނީ ދުޅަހެޔޮކަން ރަނގަޅު ކުރުމަށް އެހީވެދޭ ވަރަށް ބޮޑު ކަމެއްގެ ގޮތުގައި ފާހަގަކުރެއެވެ.
ދިރިއުޅުމުގައި ހިނިތުންވެފައި ތިބޭ މީހުން ފެންނާނެ ކަމަށާއި ނަމަވެސް އެ ހނިތުންވުމުގެ ފަހަތުގައި ފޮރުވިފައި ވަނީ ކޮން ކަހަލަ ހިތްދަތި ވާހަކަތަކެއް ކަން ނޭނގޭނެ ކަމަށް މަރިޔަމް ބުނެއެވެ. ކޮންމެ މީހަކާ ބައްދަލުވި ކަމުގައި ވިޔަސް އޯގާތެރިކަމާއެކު ހިނިތުންވެލާފައި މުހާތަބު ކުރުމަކީ ކޮންމެ މީހަކަށް ވެސް ކުރެވޭނެ ކަމެއް ކަމަށް އޭނާ ބުނެއެވެ. މިފަދަ ކަމެއް ކުރުމަކީ އަތުން ފައިސާތަކެއް ހޭދަވާނެ ކަމެއް ނޫން ކަމަށާއި އެއީ ވަރަށް ފަސޭހައިން ކުރެވޭނެ ކަމެއް ކަމެކެވެ. ހިނިތުންވުމެއް ބަދަލުކޮށްލުމަކީ ވެސް ކުރެވޭ ސަދަގާތެއް ކަމަށާއި ހިނިތުންވުމަކުން އަމިއްލަ އަތުން އެއްޗެއް އުނިވެގެން ނުދާނެ ކަމަށް އޭނާ ބުނެއެވެ.
މަރިޔަމްގެ ކާމިޔާބީގެ ފަހަތުގައި ގިނަ ބަޔަކު ޝަމިލްވާ އިރު، އޭނާއަށް މި މަސައްކަތުގައި ކުރިއެރުން ދެއްވި ކަމަށްޓަކައި އެންމެ ފުރަތަމަ މާތްﷲއަށް ހަމްދުކުރަމުން މަރިޔަމް ބުނީ، އެންމެ ހާއްސަ ޝުކުރެއް އަދާކުރަން ބޭނުންވަނީ މަންމަ އާއި ބައްޕައަށް ކަަމަށެވެ. އެއަށްފަހު އޭނާގެ އަންހެން ދަރިފުޅަށް ހާއްސަ ޝުކުރެއް އަދާކުރަމުން ބުނީ، ދަރިފުޅުގެ ފަރާތުން އެއްބާރުލުން ނުލިބޭ ނަމަ މަސައްކަތުގެ މާހައުލުގައި މިހެން އުޅުމަކީ ދަތިވާނެ ކަމެއް ކަމަށެވެ. މީގެ އިތުރުން އޭނާއަށް ކިޔަވައިދިން ހުރިހާ މެންޓާސްއަށް ހާއްސަ ޝުކުރެއް ރައްދު ކުރިއެވެ. މެންޓާސްގެ ލިސްޓު ދިގު ކަމުން އެންމެންގެ ނަން ވަކިވަކިން ހާމަނުކުރި ކަމުގައި ވީ ނަމަވެސް އެ ހުރިހާ ފަރާތްތަކަކީ ޝުކުރުގެ ލިސްޓުން އުނިކޮށްލެވޭނެ ބައެއް ނޫން ކަމަށް މަރިޔަމް ބުނެއެވެ.
މިއަދާ ހަމައަށް ކުރި މަސައްކަތުން ފެންނަނީ މަރިޔަމްގެ ބުރަ މިންނަތް މަސައްކަތްތަކުގެ ފޮނި ނަތީޖާއެވެ. މި ހިދުމަތް ފުޅާކޮށް ރާއްޖޭގައި ނަފްސާނީ ދުޅަހެޔޮ ޖީލެއް ބިނާކުރުމަށް މަރިޔަމްގެ ހިޔާލުގައި ކުރަހާ މަންޒަރުގައި ކުލަޖެހިގެންދާނެ ދުވަހަކީ އޭނާ އެންމެ ދެކެން ބޭނުންވާ ދުވަހެވެ. އެއީ ވަރަށް ބޮޑު ހުވަފެނެއް ކަން ފާހަގަކުރަމުން މަރިޔަމް ބުނީ، ރާއްޖޭގައި ނަފްސާނީ ދުޅަހެޔޮކަމަށް ކުރާ މަސައްކަތް މުޅިން އެހެން ހަރުފަތަކަށް ގެންގޮސްދޭނެ ފަދަ "ހީލިން އައިލެންޑް" އެއް ހުޅުވުމަކީ އޭނާގެ ތަސައްވުރު ކަމަށެވެ.
އެ ހީލިން އައިލެންޑަކީ ރާއްޖެއިން ބޭރުގެ މީހުންނަށް ހިދުމަތް ދިނުމަށް ހަމައެކަނި ހުޅުވާ ތަނެއް ނޫން ކަމަށާއި ބޮޑަށް އެ ރަށް ހާއްސަކޮށްލަން ބޭނުންވަނީ ދިވެހިންނަށް ކަމަށް މަރިޔަމް ބުންޏެވެ. ދިވެހިންގެ ތެރޭގައި ބިޒީ ދިރިއުޅުމުން އެކަހެރިވެ ހީލިން އައިލެންޑުން ހިދުމަތް ދިނުމަށް މަރިޔަމް ރާވަމުންދަނީ "21 ޑޭސް ހީލިން ޖާނީ" އެއް ގެ ހިދުމަތުން ނަފްސާނީ ހުރަސްތަކުން އަރައިގަނެވޭނެ މަންޒިލެއްގެ ބިންގާ އަޅާށެވެ.
