ރާއްޖެ އާއި ރާއްޖޭން ބޭރަށް ފަސޭހަކަމާއެކު ފައިސާގެ މުއާމަލާތްތައް ކުރެވޭ ސްވައިޕްގެ ލިމިޓެޑް ރިލީޒަށް ރެޖިސްޓްރޭޝަނަށް ބޭންކް އޮފް މޯލްޑިވްސް (ބީއެމްއެލް) އިން ހުޅުވާލައިފިއެވެ.
ބީއެމްއެލުން ބުނީ މިއީ ފައިސާގެ މުއާމަލާތްތައް ކުރުމުގައި 100 ޕަސަންޓު ދިވެހި އުފެއްދުމެއް ތަޖުރިބާކޮށްލުމަށް ލިބޭ ފުރުސަތެއް ކަމަށެވެ. އަދި މި ލިމިޓެޑް ރިލީޒްގައި ސްވައިޕް ބޭނުންކުރުމުގެ ފުރުސަތު ލިބޭނީ https://www.swipe.mv މެދުވެރިކޮށް ރަޖިސްޓާވާ ފުރަތަމަ 5،000 ކަސްޓަމަރުންނަށެވެ.
ސްވައިޕްއާ ގުޅޭގޮތުން ބީއެމްއެލުން ބުނީ ރަޖިސްޓާވުމަށްފަހު ކަސްޓަމަރުންނަށް ސްވައިޕްގެ ފީޗާތައް ބޭނުންކުރެވޭނެކަމަށެވެ. އެގޮތުން ޕާސަންޓު-ޕާސަން ޓްރާންސްފާތަކާއި ކިއުއާރް މެދުވެރިކޮށް ކުރެވޭ ފައިސާގެ މުއާމަލާތްތަކާއި ސްވައިޕް މެދުވެރިކޮށް ހޭދަކުރެވޭ ގޮތުގެ އިންސައިޓްސް ބަލައިލެވޭނެކަމަށް ވެސް ބީއެމްއެލްއިން ބުނެފައިވެއެވެ.
ސްވައިޕް މެދުވެރިކޮށް ޕޭމަންޓް ލިންކް ފަސޭހަކަމާއެކު ފޮނުވޭނެކަމަށާއި ޓޮޕްއަޕްކޮށް، ވޮލެޓްގައި ހުރި ފައިސާ ބީއެމްއެލް އެކައުންޓަށް އަނބުރާ ފޮނުވޭނެކަމަށް ވެސް ބީއެމްއެލްއިން ފާހަގަކުރިއެެވެ.
ބީއެމްއެލުން ބުނީ ސްވައިޕް ފަރުމާކޮށްފައިވަނީ ރާއްޖޭގެ ރެގިއުލޭޓަރީ މިންގަނޑުތަކާއި އިންޓަނޭޝަނަލް ޕޭމަންޓް ސްޓޭންޑާޑްތަކާ އެއްގޮތަށް ކަމަށެވެ. އަދި މަލްޓި-ކަރަންސީ ވޮލެޓެއްގެ ގޮތުގައި ބޭނުންކުރެވޭ ސްވައިޕް ޓޮޕްއަޕް ކުރުމަށް ބީއެމްއެލްގެ އެކައުންޓުތަކާއި ކޮންމެ ކްރެޑިޓް އަދި ޑެބިޓް ކާޑެއްވެސް ބޭނުންކުރެވޭނެ ކަމަށް ބީއެމްއެލް އިން ބުނެފައިވެއެވެ.
