ގަން އިންޓަނޭޝަނަލް އެއާޕޯޓަށް ބައިންލަ ްއަގްވާމީ އެއާލައިންތައް ގެންނަން މަސައްކަތް ކުރައްވާ ކަމަށާއި އެ އެއާޕޯޓަކީ ރާއްޖޭގެ ވައިގެ ސަދަން ހަބު ކަމުގައި ހަދާނަން ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
ވަޒީރު މިހެން ވިދާޅުވީ، ދެކުނުގެ އަތޮޅުތައް ގުޅާލުމަށް ކުރިއަށްގެންދާ "ދެކުނުގެ ގުޅުން" ޕްރޮޖެކްޓް އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އަމީން ވިދާޅުވީ، ގަން އިންޓަނޭޝަނަލް އެއާޕޯޓަކީ ދުނިޔޭގެ ކޮމާޝަލް އެއާލައިންތަކުގައި ބޭނުންކުރާ ހުރިހާ ސައިޒެއްގެ މަތިންދާ ބޯޓު އޮޕަރޭޓް ކުރެވޭނެ ކެޕޭސިޓީ ހުރި އެއާޕޯޓެއް ކަމަށެވެ. ނަމަވެސް މިހާތަނަށް އެކަށީގެންވާ މިންވަރަށް އެއާލައިން އޮޕަރޭޓް ކުރުމަށް ކުރަންޖެހޭ މަސައްކަތް ކޮށްފައި ނެތް ކަމަށް އަމީން ފާހަގަކުރެއްވިއެވެ.
އަމީން ވިދާޅުވީ ސަރުކާރުގެ އަމާޒަކީ ގަން އިންޓަނޭޝަނަލް އެއާޕޯޓަކީ ދެކުނުގެ ވައިގެ ހަބު ކަމުގައި ހެދުން ކަމަށެވެ. މިފަދައިން ވައިގެ މަގުން ދެކުނުގެ ހަތަރު އަތޮޅު ގުޅާލުމަކީ ދެކުނުގެ ޓޫރިޒަމް ސްކޯޕް ބޮޑުވެގެން ދާނެ ކަމެއް ކަމަށް އަމީން ވިދާޅުވިއެވެ.
މިވަގުތު ވެސް މެދުއިރުމަތީގެ އެއާލައިނަކާއި، ޗައިނާގެ އެއާލައިނެއް ގަން އެއާޕޯޓަށް ގެނައުމަށް މަސައްކަތް ކުރަމުން ކަމަށް އަމީން ވިދާޅުވިއެވެ. ގަން އެއާޕޯޓުގެ ހާލަތު ބަދަލު ކުރައްވާނެ ކަމަށާއި އެ އެއާޕޯޓަކީ އެއާލައިންތައް އަންނަ ރާއްޖޭގެ ވައިގެ ސަދަން ހަބު ކަމުގައި ހަދާނަން ކަމަށް އަމީން ވިދާޅުވިއެވެ.
އެއާޕޯޓުތައް ތަރައްގީ ކުރުމުގެ އިތުރުން ރައީސުލްޖުމްހޫރިއްޔާގެ އިރުޝާދަކީ ހަމައެކަނި އެއާޕޯޓުތަކެއް އެޅުން ނޫން ކަމަށާއި ހުރިހާ ވަސީލަތްތަކުގެ ބޭނުން އެންމެ ފުރިހަމައަށް ހިފައި ރައްޔިތުންގެ ދިރިއުޅުމަށް ފަސޭހަކަން ގެނެސްދިނުމަށް މަދަނީ ދަތުރުފަތުރުގެ ނިޒާމެއް ގާއިމުކުރުން ކަމަށް އަމީޏް ވިދާޅުވިއެވެ. އަދި ދެކުނުގެ އަތޮޅުތައް ސީޕްލޭންގެ ހިދުމަތުން ގުޅާލުމުން އެ އަތޮޅަށް އެކި ގޮތްގޮތުން ފައިދާ ކުރާނެ ކަމަށް ވެސް ވިދާޅުވިއެވެ.
މީގެ އިތުރުން ދެކުނުގައި ސީޕްލޭނަށް ޑިމާންޑް އިތުރުވާ ނަމަ އިތުރު ބޯޓުތަކާއެކު ދަތުރުތައް އިތުރު ކުރުމަށް ރާވާފައިވާ ކަމަށް ވެސް އަމީން ވިދާޅުވިއެވެ. އަދި ކުރިއަށް އޮތްތަނުގައި ގދ. އަތޮޅުގެ ފަރެސްމާތޮޑާ އެއާޕޯޓާއި، މާވަރުލު އެއާޕޯޓަށް ވެސް ސީޕްލެން ހިދުމަތް އިތުރު ކުރައްވާނެ ކަމަށް އަމީން ވިދާޅުވިއެވެ.
