ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ ކްރެޑިޓް ކާޑުތަކުން ރާއްޖެއިން ބޭރުގެ މުދަލާއި ހިދުމަތަށް ފައިސާ ދެއްކޭ ލިމިޓް އަންނަ މަހުގެ އެކަކުން ފެށިގެން ދެގުނަ ބޮޑުވާނެ ކަމަށް އެ ބޭންކުން ބުނެފިއެވެ.
ބީއެމްއެލް އިން އެކްސްގައި ކުރި ޕޯސްޓެއްގައި ބުނީ އެ ބޭންކުން ދޫކުރާ ކްރެޑިޓް ކާޑުތަކުގެ ތެރެއިން ތިން ކެޓަގަރީގެ ކާޑަކުން ލިމިޓް ބޮޑުކޮށްފައިވާ ކަމަށެވެ.
ކާޑުގެ ލިމިޓް އިތުރުކުރި ގޮތް:
- ކްލެސިކް ކްރެޑިޓް ކާޑުތަކުގެ ލިމިޓް 750 ޑޮލަރުން 1،400 ޑޮލަރަށް
- ގޯލްޑް ކްރެޑިޓް ކާޑުގެ ލިމިޓް 750 ޑޮލަރުން 1،500 ޑޮލަރަށް
- ޕްލެޓިނަމް ކާޑުގެ ލިމިޓް 1،500 ޑޮލަރުން 3،000 ޑޮލަރަށް
ބީއެމްއެލް އިން ބުނީ މިއީ ކޮންމެ ކަސްޓަމަރަކަށް ދޫކޮށްފައިވާ ޑެބިޓް ކާޑުގެ ލިމިޓްގެ އިތުރުން އެ ކަސްޓަމަރެއްގެ ކްރެޑިޓް ކާޑަށް ހަމަޖައްސާފައިވާ ލިމިޓެއް ކަމަށެވެ.
ބީއެމްއެލްއިން ވަނީ މިދިޔަ ނޮވެމްބަރު މަހު ޑެބިޓް ކާޑުން ރާއްޖޭން ބޭރުގައި ފައިސާދެއްކުމަށް ކަނޑައަޅާފައިވާ ލިމިޓް އިތުރުކޮށްފައެވެ. އެގޮތުން ކާޑު މެޝިނުން ކުރާ މުއާމަލާތްތަކަށް މަހަކު 1,000 ޑޮލަރަށް ލިމިޓް އިތުރުކޮށްފައިވެއެވެ. އަދި ބޭސްފަރުވާގެ ބޭނުމަށާއި ދަތުރުފަތުރުގެ ބޭނުމަށް ބޭރުގައި ހަރަދުކުރެވޭ މިންވަރު ވެސް ވަނީ މަހަކު 3,000 ޑޮލަރަށް އިތުރުކޮށްފައެވެ.
