ސޯޝަލް މީޑިއާގައި ފުލުހުންނަށް ދިން އިންޒާރަކާ ގުޅިގެން އިދިކޮޅު އެމްޑީޕީގެ ގައުމީ މަޖިލީހުގެ މެމްބަރު ފާތުމަތު ޒަހިއްޔާ (ޒާޔާ) ފުލުހަށް ހާޒިރުވާން އަންގާ އޭނާއަށް ޗިޓު ފޮނުވައިފިއެވެ.
ފުލުހުން ޒާޔާއަށް ފޮނުވާފައިވާ ޗިޓުގައި ވަނީ މާދަމާ މެންދުރު 14:00 އަށް ސާޖަންޓް އާދަމް ހަލީމް ކްރިމިނިލް އިންވެސްޓިގޭޝަން ބިލްޑިން އަށް ހާޒިރުވުމަށެވެ. އަދި މިއީ "ޒާޔާ ފާތިމަތު"ގެ ނަމުގައި ފޭސްބުކްގައި ހިންގާ އެކައުންޓަކުން މިދިޔަ އަހަރުގެ އޮކްޓޯބަރު މަހުގެ ހަތަރު ވަނަ ދުވަހުގެ ރޭ ފުލުހުންނަށް އިންޒާރު ދީފައިވާ ކަމަށް ތުހުމަތު ކުރެވޭ މައްސަލާގައި ސުވާލުކޮށް، ބަޔާން ނެގުމަށް ކަމަށްވެސް ޗިޓުގައި ބަޔާންކޮށްފައިވެއެވެ.
ޒާޔާ ދަނީ ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި މާލޭ ސިޓީ ކައުންސިލްގެ ހުޅުމާލެ އުތުރު ދާއިރާގެ ކައުންސިލަރު ކަމަށް އެމްޑީޕީގެ ޓިކެޓުގައި ވާދަކުރުމަށް ކެމްޕެއިން ކުރަމުންނެވެ.
މިކަމާ ގުޅިގެން ޒާޔާ ވަނީ ޗިޓުގެ ފޮޓޯއެއް ހިއްސާކޮށް އިންތިހާބު ފެށުމުގެ ކުރިން ސަރުކާރު ބަލިވެފައިވާ މަންޒަރުފެންނަކަމަށާއި، ފުލުހަށް ހާޒިރުކޮށް ކުޑަގޮޅިއަށްލިޔަސް އަޒުމަށް ކުޑަވެސް ބަދަލެއް ނާންނާނެ ކަމަށް ބުނެފައެވެ. އަދި ބޮޑުތަނުން އިންތިހާބު ކާމިޔާބު ކުރާނެކަމަށްވެސް އޭނާ ވަނީ ބުނެފައެވެ.
ފުލުހުންނަށް ދިން މި އިންޒާރާއި ގުޅިގެން ޒާޔާގެ ފޯނުވެސް މީގެކުރިން ހިފަހައްޓާފައިވެއެވެ. އަދި ފުލުހަށް ހާޒިރުކޮށް ސުވާލުވެސް ކޮށްފައިވެއެވެ.
މި މައްސަލައިގައި ޒާޔާގެ އިތުރުން އެ ޕާޓީގެ ޒުވާން އެކްޓިވިސްޓް އާއިޝަތު ޝިމަންގެ ފޯނުވެސް ހިފެހެއްޓިއެވެ. ޝިމަންގެ ފޯނު ހިފެހެއްޓީ ރައީސް އަވަހާރަކޮށްލަން ހިތްވަރު ލިބޭ ފަދަ މޭރުމަކުން މިދިޔަ ސެޕްޓެމްބަރު މަހުގެ 20 ވަނަ ދުވަހު އެކްސްގައި ކޮމެންޓެއް ކުރި ކަމަށް ތުހުމަތު ކުރެވޭ މައްސަލައެއްގައި ހެއްކާއި ގަރީނާ ހޯދުމަށް ކަމަށް ބުނެއެވެ.
ޝިމަންއަކީ މާލޭގެ އުސް އިމާރާތަކުން ފުރާޅެއްގެ މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދު، 21، އަށް އިންސާފު ހޯދައިދޭން ގޮވާލައި ސިލްސިލާކޮށް ކުރަމުންދިޔަ މުޒާހަރާގައި ވެސް އިސްކޮށް ހަރަކާތްތެރިވި ފަރާތެކެވެ.
