ހދ. ކުޅުދުއްފުށީ ރީޖަނަލް ހޮސްޕިޓަލްގައި ޕްރައިވެޓް ރޫމް، އައިސޮލޭޓް ކުރެވޭގޮތަށް ފެސިލިޓީއެއް އެޅުމަށް އަލްޓެކް މޯލްޑިވްސް ޕްރައިވެޓް ލިމިޓެޑްއާއި ހަވާލުކޮށްފިއެވެ.
އަލްޓެކް މޯލްޑިވްސް ޕްރައިވެޓް ލިމިޓެޑާއި މި މަސައްކަތް ހަވާލުކޮށްފައިވަނީ 53،560،648.01 ރުފިޔާއަށް 435 ދުވަހުގެ ތެރޭގައި ނިންމާ ގޮތަށެވެ.
މި އެއްބަސްވުމުގައި ސޮއި ކުރުމަށް މިއަދު ހެލްތް މިނިސްޓްރީގައި ބޭއްވި ހާއްސަ ރަސްމިއްޔާތުގައި މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު ހަދީޖާ އަބްދުއްސަމަދު އަބްދުﷲއެވެ. އަދި އެ ކުންފުނީގެ ފަރާތުން ސޮއި ކުރެއްވީ ޖެނެރަލް މެނޭޖާ، ހުސައިން ތަސްމީން އެވެ. މި މަސައްކަތަށް ފަންޑުކޮށްފައިވަނީ އޭޝިއަން އިންފްރާސްޓްޗާ އިންވެސްޓްމަންޓް ބޭންކް (އޭއައިއައިބީ) އިންނެވެ.
މިއީ މިބޭންކްއިން ރާއްޖޭގައި ކުރިޔަށްގެންދާ ފުރަތަމަ ސްޓޭންޑް އެލޯން ޕްރޮޖެކްޓްވެސް މެއެވެ. ކުޅުދުއްފުށީ ރީޖަނަލް ހޮސްޕިޓަލްއަކީ ގްރޭޓާ މާލެ ސަރަހައްދު ފިޔަވައި، ރާއްޖޭގައި އެންމެ ގިނައިން ބަލިމީހުންނަށް ހިދުމަތްދޭ ހޮސްޕިޓަލެވެ.
ހެލްތް މިނިސްޓްރީން ބުނީ، އެކި ރަށްރަށުން ދަތުރުކޮށްފައި އައިސް ވޯރޑްގައި އެޑްމިޓްކޮށްގެން ދިގު މުއްދަތަކަށް ހިދުމަތްދޭންޖެހޭ ހާލަތްތަކުގައި އެހީތެރިޔާއަށްވެސް އަދި ބަލިމީހާއަށްވެސް ދަތިތަކެއް ދިމާވާ ކަމަށެވެ. އަދި ހަމަ އެހެންމް އެހީތެރިޔާއަށްވެސް އޮށޯވެލެވޭނެގޮތް ނުވެވުމާއި، ބައެއް ހާލަތްތަކުގައި ރަށުން ތަންތަން ކުއްޔަށް ހިފަންޖެހުން ފަދަ ކަންކަން ދިމާވާކަން ފާހަގަކޮށް މިނިސްޓްރީން އިތުރަށް ބުނީ އަލަށް އިމާރާތް ކުރެވޭ ޕްރައިވެޓް ރޫމްތަކާއެކު އެ ދަތިތަކަށް ލުޔެއް ލިބިގެންދާނެ ކަމަށެވެ.
މިއަދު ސޮއިކުރެވުނު އެއްބަސްވުމުގެ ދަށުން ގާއިމްކުރެވޭ މި ފެސިލިޓީގައި 14 ޕްރައިވެޓް ރޫމް ހުންނާނެ ކަމަށާއި މި 14 ކޮޓަރި ހުންނާނީ ބަލިމިހާގެ އިތުރަށް ބަލިމީހާގެ އެހީތެރިއާއިއެކު ހުރެވޭގޮތަށް ކަމަށް މިނިސްޓްރީން ބުނެއެވެ. މީގެ އިތުރުން ވެސް ޕްރައިވެޓް ކޮޓަރިތަކުން ލިބެން ހުންނާނެ ހިދުމަތްތަކަކީ:
- ކޮންމެ ކޮޓަރިއެއްގައި ފާހަނާ
- މޮޑަރޭޓް ޕޭޝަންޓް، ކްރިޓިކަލް ޕޭޝަންޓް އަދި ޕޭޝަންޓް ވިތް ސްޕެޝިއަލް ނީޑްއަށް ހާއްސަކުރެވިފައިވާ ކޮޓަރި
- ޕްރައިވެޓް ރޫމްގެ އިތުރަށް މި އިމާރާތުގައި ޑައިލިސިސް ރޫމް، އެމަރޖެންސީ ރޫމް، މެޑިކަލް ސްޓޯރ، ޖެނެރަލް ސްޓޯރ، ނާރސް ސްޓޭޝަންސް، އޮޓޯކްލޭވް ރޫމްސް، އެޑްމިން ރޫމް، ބްރީފިންގ ރޫމް، ޔުޓިލިޓީ ރޫމްސް، ޓީރޫމް، ޑޮނިންގް، ޑޮފިންގ އަދި ވަކިން ނަމާދު ކުރެވޭ ގޮތަށް ނަމާދު ކޮޓަރި
އަދި މި ކޮޓަރިތަކާއެކު އެ ފެސިލިޓީއިން މެޑިސިން ކިޔާވާކުދިންގެ ސެޝަންތައް ކުރިޔަށްގެންދިޔުމަށް އިތުރަށް ފަސޭހަވުމާއި، ސިއްޙީ ހިދުމަތްތެރިން ތަމްރީން ކުރުމަށް އިތުރަށް ފަސޭހަވެ، އަދި ރަށުގެ އަތޮޅުގެ ކޮމިއުނިޓީތަކަށް ހާއްސަކޮށްގެން ކުރިޔަށްގެންދެވޭ ބޮޑެތި ވޯކްޝޮޕްތައްވެސް ކުރިޔަށްގެންދިޔުމަށް ފަސޭހަވެގެންދާނެ ކަމަށް މިނިސްޓްރީން ބުނެއެވެ.
އަދި ސަރުކާރުގެ އަމާޒަކީ ރައްޔިރުންނަށް ވީހާވެސްފަސޭހައިން ސިއްޙިދުމަތް ލިބެންހުރުމާއި، އަދި މާލެއަށް ބަރޯސާވުން ކުޑަކޮށް އަތޮޅުތަކުގައި ގާއިމްކުރެވިފައިވާ ސިއްޙީ ޙިދުމަތްދޭ ތަންތަނުގެ ހިދުމަތް އިތުރަށް ފުޅާކޮށް ފެންވަރު ރަނގަޅުކުރުން ކަމަށް ވެއެވެ.
