ބިންވެރިޔާ ސްކީމްގެ ދަށުން ހުޅުމާލެ ތިން ވަނަ ފިޔަވަހިން ގޯތި ލިބިފައިވާ މީހުންނާއި ގުޅިފަޅުން ގޯތި ލިބިފައިވާ މީހުންގެ ތެރެއިން ގޯތީގެ ރަޖިސްޓްރީއާ ހަވާލުވެފައި ނުވާ ފަރާތްތައް ގޯތީގެ ރަޖިސްޓަރީއާ ހަވާލުވުމަށް އެޕޮއިންޓްމަންޓް ހަމަޖެއްސުމަށް މާޗް މަހުގެ 15 އާ ހަމައަށް ފުރުސަތު ހުޅުވާލައިފިއެވެ.
މިދިޔަ ޑިސެމްބަރު މަހުގެ 19 ވަނަ ދުވަހު އާންމުކުރި ހުޅުމާލެ ތިން ވަނަ ފިޔަވަހީގެ އާ ލޭންޑް ޔޫސް ޕްލޭނަށް ގެނެސްފައިވާ ބަދަލާ ގުޅިގެން، ކުރިން ބިންވެރިޔާ ސްކީމުގެ ދަށުން ހުޅުމާލެ ތިން ވަނަ ފިޔަވަހިން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ވަނީ ބަދަލުވެފައެވެ. މި ބަދަލާއި ގުޅިގެން ހުޅުމާލެ ތިންވަނަ ފިޔަވަހިން ގޯތި ލިބިފައިވާ ފަރާތްތަކުގެ މެދުގައި ޑިސެމްބަރު 20 ގައި ވަނީ ގުރުއަތު ނަގާފައެވެ.
ހައުސިން މިނިސްޓްރީން ބުނީ، އެ ބަދަލާ ގުޅިގެން ހުޅުމާލެ ތިން ވަނަ ފިޔަވަހިން ގޯތި ލިބޭ ފަރާތްތަކަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓްރީ" ބާތިލުކޮށް، އާ ބަންޑާރަގޯތީގެ ރަޖިސްޓަރީ ދޫކުރުމަށް ވަނީ ހަމަޖެހިފައި ކަމަށެވެ. އަދި މިހާތަނަށް ގޯތީގެ ރަޖިސްޓަރީ ހަވާލުކޮށްފައި ނުވާ ފަރާތްތަކަށް ގޯތީގެ ރަޖިސްޓަރީ ހަވާލުކުރުމާއި ގޯތި ހަވާލުކުރުމުގެ އެއްބަސްވުމުގެ ސޮއި ކުރުމަށް ވެސް ހަމަޖެހިފައިވާ ކަމަށް އެ މިނިސްޓްރީން ބުނެއެވެ. ހަމައެއާއެކު ގުޅިފަޅުގެ އާ ލޭންޑް ޔޫސް ޕްލޭނަށް އައި ބަދަލާ ގުޅިގެން، މިއަދާ ހަމައަށް އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ހަވާލުވެފައި ނުވާ ފަރާތްތަކަށް އިތުރު ފުރުސަތެއް ދިނުމަށް ހަމަޖެހިފައިވާ ކަމަށް ވެސް އެ މިނިސްޓްރީން ބުނެއެވެ.
އެގޮތުން ހުޅުމާލެ ތިން ވަނަ ފިޔަވަހިންނާއި ގުޅީފަޅުން ގޯތި ލިބިފައިވާ ފަރާތްތަކުން "ބަންޑާރަ ގޯތީގެ ރަޖިސްޓްރީ" އާ ހަވާލުވުމަށް ހިޔާވަހި ޕޯޓަލް މެދުވެރިކޮށް އެޕޮއިންޓްމަންޓްއަށް އެދުމުގެ ފުރުސަތު ވަނީ ހުޅުވާލާފައި ކަމަށް ހައުސިން މިނިސްޓްރީން ބުނެއެވެ. އެ ފުރުސަތު ހުޅުވާލާފައި ވަނީ އިއްޔެ އިން ފެށިގެން އަންނަ މާޗް މަހުގެ 15 ވަނަ ދުވަހުގެ ނިޔަލަށް ކަމަށް ވެސް އެ މިނިސްޓްރީޏް ބުނެއެވެ. އެޕޮއިންޓްމަންޓް ހަމަޖެހިފައިވާ ގަޑިއަށް ހާޒިރުނުވާ ފަރާތްތަކުގެ އެޕޮއިންޓަމަންޓް ކެންސަލް ކުރެވޭނެ ކަމަށް ހައުސިން މިނިސްޓްރީން ބުނެއެވެ.
އެޕޮއިންޓްމަންޓްއަށް އެދި ހުށަހަޅާއިރު ހުށަހަޅަން ޖެހޭ ލިޔެކިޔުންތައް:
- އާ "ބަންޑާރަ ގޯތި ދޫކުރުމުގެ އެއްބަސްވުން" ގައި ހެކިވެރިއެއްގެ ގޮތުގައި ސޮއިކުރުމަށް ހާޒިރުވާނެ އެއް ފަރާތުގެ އައިޑީ ކާޑު ކޮޕީ.
- ގޯތި ލިބޭ ފަރާތް/ފަރާތްތަކުގެ ބަދަލުގައި އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ހަވާލުވުމަށް އެހެން ފަރާތެއް އައްޔަނުކުރާ ނަމަ، ހިޔާވަހި ޕޯޓަލްގައިވާ ޕަވާ އޮފް އެޓާނީގެ ނަމޫނާއާ އެއްގޮތަށް ތައްޔާރުކޮށް އެފަރާތެއް އައްޔަނުކޮށްފައިވާކަން އަންގައިދޭ ޝަރުއީ ކޯޓެއްގައި ރަޖިސްޓަރީކޮށްފައިވާ ނުވަތަ ޕަބްލިކް ނޯޓަރީގެ ކުރިމަތީގައި ސޮއިކޮށްފައިވާ ޕަވާ އޮފް އެޓާނީ
- އައްޔަނުކޮށްފައިވާ އެޓާނީގެ އައިޑީ ކާޑުގެ ކޮޕީ
- ނޮޓޮރައިޒްކޮށްފައިވާ ލިޔުމެއް ނަމަ، ނޮޓަރައިޒޭޝަން ސެޓިފިކެޓް
- ގޯތި ލިބޭ ފަރާތުން ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުން" ގެ ކޮޕީ
- ގޯތި ލިބޭ ފަރާތަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓަރީ" ގެ ކޮޕީ
އެޕޮއިންޓްމަންޓަށް ހާޒިރުވާއިރު، ގެންނަން ޖެހޭ ލިޔެކިޔުންތައް:
- ގޯތި ލިބޭ ފަރާތް/ފަރާތްތަކުގެ އައިޑީކާޑުގެ ކޮޕީ
- ޕަވާ އޮފް އެޓާނީގެ ދަށުން ހާޒިރުވާ ފަރާތެއް ނަމަ، ޕަވާ އޮފް އެޓާނީގެ އަސްލު އަދި ޕަވާ އޮފް އެޓާނީ ލިބިފައިވާ ފަރާތުގެ އައިޑީ ކާޑު.
- ޕަބްލިކް ނޯޓަރީގެ ކުރިމަތީގައި ސޮއިކޮށްފައިވާ ޕަވާ އޮފް އެޓާނީއެއް ނަމަ، ނޯޓަރައިޒޭޝަން ސެޓިފިކެޓުގެ އަސްލު
- ގޯތި ލިބޭ ފަރާތުން ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުން" ގެ އަސްލު
- ގޯތި ލިބޭ ފަރާތަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓަރީ" ގެ އަސްލު
އެޕޮއިންޓްމަންޓްއަށް އެދި ހުށަހަޅާ ފަރާތްތަކަށް "ހިޔާވެހި ޕޯޓަލް" މެދުވެރިކޮށް އަދި އެފަރާތްތަކުގެ ފޯނު ނަންބަރަށް އެސްއެމްއެސްގެ ޒަރީއާއިން "ބަންޑާރަ ގޯތީގެ ރަޖިސްޓަރީ" އާއި "ބަންޑާރަ ގޯތީގެ އެއްބަސްވުން" އާއި ހަވާލުވުމަށް ހާޒިރުވާން ޖެހޭ ގަޑި އަދި ތަން އަންގާނެ ކަމަށް ހައުސިން މިނިސްޓްރީން ބުނެއެވެ.
ގުޅިފަޅުން ދޫކޮށްފައިވާ ގޮތީގެ ރަޖިސްތްރީއާ ހަވާލުވުމަށް މިދިޔަ އޮކްޓޯބަރު މަހުގެ ތެރޭގައި ވެސް ވަނީ އެޕޮއިންޓްމަންޓް ހަމަޖެއްސުމަށް ހުޅުވާލާފައެވެ. އޭރު ނޮވެމްބަރު މަހުގެ 6 ވަނަ ދުވަހުގެ ނިޔަލަށް ފުރުސަތު ހުޅުވާލި ނަމަވެސް ބައެއް ފަރާތްތަކުން ގޯތީގެ ރަޖިސްޓްރީއާ ހަވާލުވެފައި ނުވެއެވެ.
