ސިނާމާލެ ހައިވޭގެ ޓްރެފިކް ލައިންތައް އާކުރުމަށް މަސައްކަތް ކުރާ ވަގުތު ހައިވޭ ބޭނުންކުރާ ފަރާތްތަކުން އެކަމަށް ސަމާލުވުމަށް އަންގައިފިއެވެ.
ފުލުހުން ބުނީ، މަގުތަކަކީ އަމާން ރައްކާތެރި ތަނަކަށް ހެދުމަށް ކުރެވޭ މަސައްކަތުގެ ތެރެއިން ހައިވޭގެ ޓްރެފިކް ލައިންތައް އާކުރުމުގެ މަސައްކަތް ކުރުމަށް ވަނީ ހަމަޖެހިފައި ކަމަށެވެ.
އެގޮތުން މިރެއިން ފެށިގެން އެ މަސައްކަތް ނިމެންދެން، ކޮންމެ ރެއެއްގެ 12:00 އިން ހެނދުނު 06:00 އަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހައިވޭގައި މަސައްކަތް ކުރާނެ ކަމަށް ފުލުހުން ބުނެއެވެ. ވީމާ މި މަސައްކަތް ކުރިއަށް ދާއިރު، ހައިވޭ ބޭނުންކުރާ ފަރާތްތަކުން މިކަމަށް ސަމާލުވުމަށް ފުލުހުން ވަނީ އިލްތިމާސް ކޮށްފައެވެ.
މާލެ އާއި ހުޅުލެ އަދި ހުޅުމާލެ ގުޅުވައިދޭ ހައިވޭ ބަލަހައްޓައި މަރާމާތުކުރުމުގެ މަސައްކަތް ހަވާލުކޮށްފައި އޮންނަނީ އެޗްޑީސީއާ އެވެ. ހައިވގެ ޓްރެފިކް ލައިންތައް އާ ކުރުމުގެ މަސައްކަތް މިރޭ ފަށަން ހަމަޖެހިފައިވާ އިރު، އެ މަގުގެ ކުރަހާފައިވާ މަގުމަތީގެ ނިޝާންތައް ވަނީ ވަރަށް ބޮޑަށް ފުހެވިފައެވެ.
