ރާއްޖެ އަންނަ އާގުބޯޓުތަކަށް މިއަދުން ފެށިގެން 24 ގަޑިއިރު ޕޯޓް އޭރިއާއަށް ވަދެވޭނެކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.
އެމްޕީއެލް އިން ބުނީ ރާއްޖެއަށް އަންނަ އާގު ބޯޓުފަހަރަށް، 26 ޖެނުއަރީ ވާ ހޯމަ ދުވަހުން ފެށިގެން 24 ގަޑިއިރު ޕޯޓް ލިމިޓް އޭރިޔާއަށް ވަދެވޭގޮތަށް ހުޅުވާލުމަށް ނިންމާފައިވާކަމަށާއި، މިއީ 1988 ވަނަ އަހަރުން ފެށިގެން އަމަލުކުރަމުން އައި އުސޫލު ބަދަލުކޮށް އިގުތިސާދީ ގޮތުން އެޅުނު މުހިންމު ފިޔަވަޅެއް ކަމަށެވެ.
މިކަމާ ގުޅިގެން ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވީ މިބަދަލާއެކު ކުރިންވެސް އުޅަނދުފަހަރަށް ދެމުންއައި ކްލިޔަރެންސް ދިނުމާއި ޕައިލޮޓޭޖުގެ ހިދުމަތް ދިނުމުގެ ކަންކަންވެސް 24 ގަޑިއިރު ހިނގަމުން ދާނެކަމަށެވެ. އިތުރަށް މިނިސްޓަރު އަމީން ވިދާޅުވީ މި ނިންމުމަކީ ރައީސް މުއިއްޒުގެ ހަރުދަނާ ސިޔާސަތުތަކުގެ ދަށުން ގެނެވުނު މުހިންމު ހެޔޮ ބަދަލެއް ކަމަށެވެ.
1988 ވަނަ އަހަރުން ފެށިގެން އަމަލުކުރަމުން އައިސްފައިވަނީ މެންދަމު 12:00 އާއި ހެނދުނު 6:00 އާ ދެމެދު ރާއްޖެއިން ބޭރުން އަންނަ ކަނޑު ބޯޓުތައް ރާއްޖޭގެ ކަނޑުގެ ބަނދަރުތަކަށް ނުވަދެވޭ ގޮތަށެވެ.
މިފަދައިން އަމަލުކުރަމުން އައިސްފައިވަނީ ނޮވެމްބަރު، 1988 ގައި ޓެރަރިސްޓުންގެ ބަޔަކު ރާއްޖެއަށް ދިން އުދުވާނީ ހަމަލާއާ ގުޅިގެން އެޅި ސަލާމަތީ ފިޔަވަޅެއްގެ ގޮތުންނެވެ.
ރައީސް މުއިއްޒާއި ބައްދަލުކުރައްވާ ވިޔަފާރިވެރިންވެސް ވަނީ ވިޔަފާރި ބަނދަރުން އާގުބޯޓު ފަހަރަށް 24 ގަޑިއިރު ހިދުމަތް ނުދޭތީ ބޮޑެތި ދަތިތަކާ ކުރިމަތިވާކަމަށާއި، އެކަމަށް އެދެވޭ ހައްލެއް ހޯދައިދިނުމަށް އެދިފައެވެ.
