ތޫފާން 'ދިތުވާ" ގެ ސަބަބުން ހާލުގައި ޖެހިފައިވާ ސްރީލަންކާއަށް އެހީވުމަށް ޕީއެސްއެމް އިން ކުރިއަށް ގެންދާ "ސިލޯނާ އެކު ދިވެހިން" ޓެލެތޯންގައި ޕީއެންސީގެ ޕާލަމެންޓްރީ ގްރޫޕުން 300،000 ރުފިޔާ ހަދިޔާ ކޮށްފިއެވެ.
މިއަދު ހެނދުނު 9:00 އިން މިރޭ ދަންވަރު 1:00 އާ ހަމައށް ކުރިއަށް ގެންދިއުމަށް ހަމަޖެހިފައިވާ މި ޓެލެތޯނަށް ޕީއެންސީން ފައިސާގެ ޗެކް ހަވާލުކޮށް ދެެއްވީ ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއެވެ.
ޗެކް ހަވާލުކޮށްދެއްވުމަށް ފަހު ޓެލެތޯންގައި އަބްދުއްރަހީމް ވިދާޅުވީ ސްރީލަންކާ އަކީ ދިވެހިންނާ ވަރަށް ގާތް އެއްބަނޑުއެއްބަފާކަމުގެ ގުޅުމެއް، ޒަމާނުއްސުރެ އުފެދިފައި އޮތް ދެގައުމު ކަމަށެވެ. އެއީ ދިވެހިން އެންމެ ގިނައިން ދަތުރުކޮށް އުޅޭ ގައުމު ކަމަށާއި އެ ގައުމުގެ ގިނަ އަދަދެއްގެ ރައްޔިތުން ރާއްޖޭގައި ދިރިއުޅެމުންދާ ކަމަށް އަބްދުއްރަހްމާން ވިދާޅުވިއެވެ. ސްރީލަންކާ އަށް މިފަދަ ހިތާމަވެރި ކާރިސާއެއް ކުރިމަތިވުމާ އެކީގައި އެންމެ ފުރަތަމަ އެހީވާން އިސްނެގި ގައުމެއް ގޮތުގައި ފާހަގަވެފައި މިވަނީ ރއްޖެ ކަމަށް ވެސް އަބްދުއްރަހީމް ވިދާޅުވިއެވެ.
ޓެލެތޯންގައި ވާހަކަ ދައްކަވަމުން ފަލާހް ވިދާޅުވީ، ލަންކާއަށް ކުރިމަތިވި ހިތާމައިގާ ދިވެހިން ބައިވެރިވަނީ ދިވެހިންނަށް ކުރިމަތިވި ހިތާމައެއްގެ ގޮތުގައި ކަމަށެވެ. ކޮވިޑް 19 ގައި ދިމާވި އިގްތިސޯދީ ކާރިސާއިން އަރައިގަނެ، ވަރަށް ރަނގަޅު މިސްރާބަކަށް ދަތުރުކުރަމުން ދިޔަ ދަނޑިވަޅެއްގައި މި ދިމާވި ހާދިސާގައި ދިވެހި ހުރިހާ ރައްޔިތުން ވެސް އެ ހިތާމައިގާ އެބަ ބައިވެރިވާ ކަމަށް ފަލާހު ވިދާޅުވިއެވެ.
ޕީއެސްއެމް އިން ކުރިއަށް ގެންދާ މި ޓެލެތޯންގައި މިހާތަނަށް 2.7 މިލިއަން ރުފިޔާ ވަނީ ލިބިފައެވެ. މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ވެސް ވަނީ ބަހައްޓާފައެވެ. އެ ފަންޑު ފޮށިތައް ގުނަން ފަށާނީ މިރޭ ދަންވަރު 12 ޖެހުމުން ކަމުގައި ވިޔަސް މިރޭ 1 ޖެހުމާ ހަމައަށް ފައިސާ ޓްރާންސްފާ ކުރެވޭނެއެވެ.
ސްރީލަންކާއަށް އެހީވުމަށް ފައިސާ ޖަމާކުރާނީ ދިވެހި ރުފިޔާއިން ނަމަ 7730000796107 ނަންބަރު އެކައުންޓަށެވެ. އަދި ޑޮލަރުން ނަމަ 7730000796106 ނަންބަެު އެކައުންޓަށެވެ.
