ސްރީލަންކާއަށް މިހާރު ކުރިމަތިވެފައިވާ ބާރުގަދަ ތޫފާން 'ދިތުވާ" ގެ ސަބަބުން ސްރީލަންކާއަށް އެހީވުމަށް ޕީއެސްއެމް އިން ކުރިއަށް ގެންދާ "ސިލޯނާ އެކު ދިވެހިން" ޓެލެތޯންގައި 7 ގަޑިއިރު ތެރޭ 1.5 މިލިއަނަށް ވުރެ ގިނަ ރުފިޔާ އާއި ޑޮލަރު ލިބިއްޖެއެވެ.
މިއަދު ހެނދުނު 9:00 ގައި ފެށި ޓެލެތޯން ނިންމާލަން ހަމަޖެހިފައި ވަނީ މިރޭ ދަންވަރު 1:00 ގައެވެ.
ހަވީރު 4 ޖެހުމާ ހަމައަށް އިރު ބީއެމްއެލްއިން މި ޓެލެތޯންއަށް ހާއްސަކޮށްފައިވާ ދިވެހި ރުފިޔާ އެކައުންޓަށް ވަނީ 1،321،068.57 ރުފިޔާ ލިބިފައެވެ. އަދި ޑޮލަރު އެކައުންޓަށް ވަނީ 12،152.45 ޑޮލަރު ލިބިފައެވެ.
އެންމެ ގިނައިން ޑޮލަރު ހަދިޔާކުރީ ރާއްޖޭގައި އެންމެ މުއްސަނދި އެއް ކުންފުނި ކްރައުން އެންޑް ޗަމްޕާ ރިސޯޓްސް އިންނެވެ. އެއީ 10،001 ޑޮލަރެވެ.
މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ވެސް ވަނީ ބަހައްޓާފައެވެ. އެ ފަންޑު ފޮށިތައް ގުނަން ފަށާނީ މިރޭ ދަންވަރު 12 ޖެހުމުން ކަމުގައި ވިޔަސް މިރޭ 1 ޖެހުމާ ހަމައަށް ފައިސާ ޓްރާންސްފާ ކުރެވޭނެއެވެ.
ސްރީލަންކާއަށް އެހީވުމަށް ފައިސާ ޖަމާކުރާނީ ދިވެހި ރުފިޔާއިން ނަމަ 7730000796107 ނަންބަރު އެކައުންޓަށެވެ. އަދި ޑޮލަރުން ނަމަ 7730000796106 ނަންބަެު އެކައުންޓަށެވެ.
