ކުރިއަށް އޮތް ލޯކަލް ކައުންސިލް އިންތިހާބުގައި ޕީއެންސީގެ ޓިކެޓުގައި ވާދަކުރަން ބޭނުންވާ ފަރާތްތަކުން ޕީއެންސީގެ ޕްރައިމަރީގައި ވާދަކުރުމުގެ ފުރުސަތު މާދަމާ ހުޅުވާލާނެ ކަމަށް އެ ޕާޓީއިން ބުނެފިއެވެ.

ޕީއެންސީއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީ ޕީޖީ ލީޑަރު އަދި އެ ޕާޓީގެ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގެ ކެމްޕެއިން މެނޭޖަރު އިބްރާހިމް ފަލާހް ވިދާޅުވީ ޕާޓީގެ ޕްރައިމަރީގައި ވާދަކުރުމަށް ޝައުގުވެރިވާ ފަރާތްތަކަށް އެ ފުރުސަތު މާދަމާ ހުޅުވާލާނެ ކަމަށެވެ.

މާދަމާއިން ފެށިގެން ޑިސެމްބަރު މަހުގެ 15 ވަނަ ދުވަހުގެ ހަވީރު 6:00 ގެ ނިޔަލަށް ޕީއެންސީ ޕްރައިމަރީގައި ބައިވެރިވުމުގެ ފުރުސަތު އޮންނާނެ ކަމަށް ފަލާހް ވިދާޅުވިއެވެ. އަދި އެ މުއްދަތުގެ ތެރޭގައި ޕީއެންސީގައި މީހާރު ރަޖިސްޓްރީވެފައިނުވާ ޕީއެންސީގެ ޕްރައިމަރީގައި ވާދަކުރަން ބޭނުންވާ ފަރާތްތަކުން ޕާޓީގައި ރަޖިސްޓްރީވެ، އިންތިހާބުގައި ވާދަކުރުމުގެ ފުރުސަތު އޮތް ކަމަށް ވެސް ފަލާހް ވަނީ ވިދާޅުވެފައެވެ.

ފަލާހް ވިދާޅުވީ ލޯކަލް ކައުންސިލް އިންތިހާބުގައި ބައިވެރިވުމަށް ބޭނުންވާ ފަރާތްތަކަށް އޮންލައިންކޮށް ފޯމު ހުށަހެޅުމުގެ އިންތިޒާމުތައް ހަމަޖެހިފައިވާ ކަމަށެވެ. ވޯޓުލުން އޮންނާނީ 27 ޑިސެމްބަރު ވާ ހޮނިހިރު ދުވަހު ކަމަށް ވެސް ފަލާހް ވިދާޅުވިއެވެ.

ޕީއެންސީގެ ޕްރައިމަރީގައި ވޯޓުލެވޭނީ ހަމައެކަނި އެމީހަކު ރަޖިސްޓްރީވެފައިވާ ރަށެއްގައި ބަހައްޓާފައިވާ ވޯޓު ފޮއްޓަށްކަން ފަލާހް ވިދާޅުވިއެވެ. އަދި މާލޭގައި އަތޮޅުތެރޭގެ ރަށްރަށުގެ ވޯޓު ފޮށިތައް ނުބަހައްޓާނެކަން ފަލާހް ފާހަގަކުރެެއްވިއެވެ.

ފަލާހް ވިދާޅުވީ އެއީ އިންތިހާބުގެ ސައްހަކަން ކަށަވަރު ކުރުމުގެ އިތުރުން އިދާރީ ކަންކަން ވީހާވެސް ފުރިހަމަކޮށް ކުރިއަށް ގެންދިއުމަށް ގޮތުން ޕީއެންސީއިން ނިންމާފައިވާ ކަމެއް ކަމަށެވެ.