ވެނެޒުއޭލާއިން އެމެރިކާއަށް މަސްތުވާތަކެތި އެތެރެ ކުރާ ކަމަށާއި، އެކަން ކުރުމަށް ކަނޑުމަގުން ދަތުރުކުރާ އުޅަނދުތަކަށް ހަމަލާދީ ގޮއްވާލާނެ ކަމުގެ އިންޒާރަށް ފަހު، ވެނެޒުއޭލާގެ ވައިގެ ސަރަހައްދުވެސް ބަންދު ކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.
ކަނޑުމަގުން ދަތުރު ކުރާ އުޅަނދުތައް ގޮއްވާލުމުގެ އިންޒާރާއެކު އެކަން އެމެރިކާއިން ކުރަމުން ދާ އިރު ދަތުރު ކުރަނީ ކޮން ބައެއްކަމެއް، އުޅަނދުގައި ހުރީ ކޮންއެއްޗެއް ކަމެއް ހާމަ ކުރުމެއް ނެތި މިހާތަނަށް 22 އުޅަނދެއް ވަނީ ގޮއްވާލާފައެވެ.
އެމެރިކާގެ ރައީސް ޑޮލާންޑް ޓްރަމްޕް ވަނީ، ވެނެޒުއޭލާއަށް ބިރު ދެއްކުމުގެ ގޮތުން، އެމެރިކާގައި އޮންނަ އެންމެ ބޮޑު މަނަވަރާއި މިސައިލާއިން އެނޫންވެސް ހަތިޔާރުން ބަރާކޮށްފައި އޮތް އިތުރު މަނަވަރެއް ވެނެޒުއޭލާގެ ކައިރިއަށް ފޮނުވާފައެވެ. އެމެރިކާގެ އެންމެ ބޮޑު މަނަވަރުގައި ފައިޓާ ޖެޓުގެ 75 ބޯޓާއި ބޮން އަޅަން ގެންގުޅޭ ބޮމްބާގެ 1 ބޯޓާއި ހެލިކޮޕްޓަރުގެ އިތުރުން 15،000 ސިފައިންނަށް ތިބެވެއެވެ. މިސައިލާއި އެނޫންވެސް އާލާތްތައް ފޮނުވަން ތައްޔާރު ކޮށްފައި އޮންނަ މަނަރުގައި 7،000 ސިފައިންނަށް ތިބެވެއެވެ.
ވެނެޒުއޭލާގެ ކައިރިއަށް މި ބޯޓުތައް ފޮނުވުމުގެ އިތުރުން އެގައުމާއި އެ ގައުމުގެ ވަށައިގެންވާ 'ވައިގެ ސަރަހައްދު ބަންދު ކަމަށް' ޓްރަމްޕް އާންމު ކުރެއްވުމާއެކު، ބައިނަލްއަގުވާމީ އުދުހުމުގައި ބޭނުންކުރާ ގިނަ އެއާލައިންތައް ވަނީ ވެނެޒުއޭލާއަށް ދިޔުން މަޑުޖައްސާލައިފައެވެ. އޭގެ ތެރޭގައި އިބޭރިއާ، ޓެޕް ޕޯޗުގަލް، ގޯލް، ލަޓަމް، އެވިއަންކާ އަދި ޓަރކިޝް އެއާލައިން ހިމެނެއެވެ.
މި މައްސަލައިގައި ވެނެޒުއޭލާއިން ބުނެފައި ވަނީ، އެހެން ގައުމެއްގެ ވައިގެ ސަރަހައްދު ބަންދު ކުރުމުގެ އުހުތިޔާރު އެމެރިކާއަށް ނޯންނާނެ ކަމަށާއި އެއީ އަޅުވެތި ކުރުމަށް ބިރުދެއްކުމެއް ކަމަށެވެ. އަދި އެއީ ބައިނަލްއަގުވާމީ ހަމަތަކުންވެސް ކުރެވޭނެ ކަމެއް ނޫން ކަމަށާއި ގާނޫނުތަކާ ހިލާފު އަދި މިނިވަންކަމާއި އިސްތިގުލާލާ ގުޅިފައިވާ ކަމެއް ކަމަށެވެ.
އިތުރަށް ވެނެޒުއޭލާއިން ބުނެފައި ވަނީ، އެމެރިކާއިން ބޭނުން ވަނީ، ވެނެޒުއޭލާގެ ވެރިކަން ގަދަބާރުން ބަދަލު ކުރަން ކަމަށާއި، ރައްޔިތުން ތިބީ އެކަމަށް ޖާގަ ދޭން ނޫން ކަމަށެވެ. އަދި އެމެރިކާގެ ކޮންމެ ހަމަލާއަކަށް ރައްދު ދޭނެ ކަމަށާއި ތައްޔާރީ ހާލަތުގައި އެތައްހާސް ސިފައިންނެއް ރުކުރުވާލައިފައި ވާ ކަމަށެވެ.
ވެނެޒުއޭލާއަކީ، ތެލުގެ ދުނިޔޭގެ އެންމެ ބޮޑު ރިޒާވް އޮންނަ ގައުމު ނަމަވެސް އަސްކަރީ ގޮތުން އެއީ އެމެރިކާއާ ވާދަ ކުރެވޭވަރަށްވުރެ މާ ފަހަތުގައި އޮތް ގައުމެކެވެ.
ވެނެޒުއޭލާއިން އެހުރިހާ ވާހަކައެއް ދައްކަމުން ދާއިރު އެމެރިކާއިން ވަނީ ސީދާ ޓްރަމްޕްގެ އޯޑަރަށް ވެނުޒުއޭލާގެ ތެރޭގައި އެމެރިކާގެ ސީއައިއޭގެ (ސިއްރު އެޖެންޓުން) ގެ ހަރަކާތްތައް ފަށާފައެވެ.
