ހާލުގައި ޖެހިފައިވާ ސްރީލަންކާއަށް އެހީތެރިވުމުގެ ގޮތުން ހާއްސަ ޓެލެތޯނެއް ހިންގަން ޕަބްލިކް ސާވިސް މީޑިއާ (ޕީއެސްއެމް) އިން ނިންމައިފިއެވެ.
މި ޓެލެތޯން ކުރިއަށް ގެންދަން ހަމަޖެހިފައި ވަނީ މާދަމާ ހެނދުނު 9:00 އިން މެންދަމު 1:00 އާ ހަމައަށެވެ.
ސްރީލަންކާއަށް މިހާރު ކުރިމަތިވެފައިވާ ބާރުގަދަ ތޫފާން 'ދިތުވާ" ގެ ސަބަބުން އެ ގައުމަށް ބޮޑެތި ގެއްލުންތަކެއްވެ އެތައް ބަޔަކު މަރުވެ އެތައް ބަޔަކު ވަނީ ހާލުގައި ޖެހިފައެވެ. ސްރީލަންކާއަށް އެހިވުމަށްބާއްވާ މި ޓެލެތޯންއާ ގުޅިގެން ޕީއެސްއެމް އިން ބުނީ، ސްރީލަންކާއަކީ ޒަމާނުއްސުރެ ރާއްޖެއާ ނުހަނު ގާތް ރަހުމަތްތެރި ޒަމާނުއްސުރެ ދިވެހިރާއްޖެއާ ނުހަނު ގާތް ރަހުމަތްތެރި ގައުމެއް ކަމަށެވެ.
އެ ގައުމުގެ ރައްޔިތުންނަކީ ދިވެހިންނާ ވަރަށް ގާތްގުޅުންތަކެއް ބާއްވާ އެކުވެރި ބައެއް ކަމަށާއި ރާއްޖޭގެ ބޭރުގައި އެންމެ ގިނަ ދިވެހިން ދިރިއުލެމުން އަންނަ އެއް ގައުމަކީ ވެސް އަވައްޓެރި އެކުވެރި ސްރީލަންކާ ކަމަށް ޕީއެސްއެމް އިން ބުނެއެވެ. އެހެންކަމުން އެ ގައުމަށް ކުރިމަތިވެފައި މިވާ ހިތާމަވެރި ހާލަތުގައި އަޅުގަނޑުމެން ދިވެހިންނަށް ދެވެން އޮތް ކޮންމެ އެހީތެރިކަމެއް ދިނުމަކީ ކޮންމެހެން ކުރަން ޖެހޭ ކަމެއް ކަމުގައި ދެކޭ ކަމަށް ޕީއެސްއެމް އިން ބުނެއެވެ.
މާދަމާ ޕީއެސްއެމް އިން ބާއްވާ މި ޓެލެތޯންގައި ބައިވެރިވުމަށް އެންމެހައި ނޫސް މީޑިއާތަކަށް ވަނީ ދައުވަތު ދީފައެވެ. އަދި މި ޓެލެތޯންގައި ދިވެހި ރައްޔިތުންނާއި ޖަމްއިއްޔާ ޖަމާއަތްތަކާއި ކްލަބްތަކާއި އޮފީސްތަކަށް ވެސް ބައިވެރިވުމުގެ ފުރުސަތު އޮތް ކަމަށް ޕީއެސްއެމް އިން ބުނެއެވެ.
