ސްރީލަންކާއަށް ކުރަމުންދާ ވިއްސާރައިގައި މިހާތަނަށް އެއްވެސް ދިވެއްސަކަށް ގެއްލުމެއް ކުރިމަތިވެގެން ރިޕޯޓްކޮށްފައި ނުވާކަމަށް ލައްކާގައި ހުންނަ ދިވެހި ހައިކޮމިޝަނުން ބުނެފިއެވެ.

ދިވެހި އެމްބަސީން ނެރުނު ބަޔާނެއްގައިވަނީ ވަނީ ސްރީލަންކާގައި ދިރިއުޅޭ އަދި ސްރީލަންކާއަށް ދަތުރުކުރާ ދިވެހި ސަމާލުވުމަށް އިލްތިމާސްކޮށްފައެވެ. އެގޮތުން ކޮންމެހެން ކުރަން ޖެހިއްޖެ ހާލަތެއްގައި މެނުވީ ދަތުރުފަތުރު ނުކުރުމަށާއި، ހާއްސަކޮށް ފެންބޮޑުވެ، ބިންގަނޑު ކަނޑައިގެން ދިއުމުގެ ހާދިސާތައް ހިނގާ ސަރަހައްދުތަކަށް ދަތުރު ނުކުރުމަށް ވަނީ އަންގާފައެވެ.އަދި ބޯކޮށް ވާރޭވެހުމާއި ވައިގަދަވާ ވަގުތުތަކުގައި ބޭރަށް ނުނިކުތުމަށާ، ލަންކާގެ މޫސުމާއި ބެހޭ އިދާރާގެ އެންގުންތަކުގެ މައުލޫމާތު ހޯދާ، އެއަށް އަމަލުކުރުމަށްވެސް އިލްތިމާސްކޮށްފައެވެ.

މީގެއިތުރުން ޒަރޫރީ ބޭނުންތަކަށް ބޭނުންވާ ކާޑުގެ ބާވަތްތަކާއި، ފެނާއި ބޭސް ފަދަ ތަކެތި ހޯދައި، ރައްކާތެރި ތަންތަނުގައި ބެހެއްޓުމަށާ، މުހިންމު ލިޔެކިޔުންތަކަށް ސަމާލުވުމުގެ އިތުރުން މޯބައިލް ފޯނު ޗާޖު ކޮށްފައި ބޭއްވުން ފަދަ ކަންކަމަށް ސަމާލުވުމަށް ވަނީ އެދިފައެވެ. އަދި ލަންކާއިން މާލެ ދަތުރުކުރާ ފަރާތްތަކުންވެސް ދަތުރުގެ މައުލޫމާތު ރަނގަޅަށް އޮޅުންފިލުވައި، ދުރާލާ އެއާޕޯޓަށް ދަތުރު ފެށުމަށްވެސް ވަނީ އެދިފައެވެ.

ހައިކޮމިޝަނުން ނެރުނު ބަޔާނުގައި ވަނީ، ވިއްސާރައިގައި ކޯރުތައް ފުރި ބަންޑުންވަމުންދާ ކަމުގެ އިންޒާރު ކަމާއި ބެހޭ ފަރާތްތަކުން ދެމުންދާތީ، އެފަދަ ސަރަހައްދުތަކުގައި ދިރިއުޅޭ މީހުންނާ، ބިންތިރި ސަރަޙައްދާއި މޫދު ކައިރި ސަރަހައްދުގައި ދިރިއުޅޭ މީހުން އިންޒާރަށް ސަމާލުވެ، ރައްކާތެރި ހިސާބުތަކަށް ދިއުމަށް އަންގާފައެވެ. އަދި އެއްވެސް އެހީތެރި ކަމަކަށް ބޭނުންވެއްޖެނަމަ، ކޮމިޝަންގެ ހޮޓްލައިން 9476881666 އަށް ގުޅުމަށްވެސް ވަނީ ޢިލްތިމާސްކޮށްފައިވެއެވެ.