މިދިޔަ އޭޕްރިލް މަހު ހ. ފެންޓެނޯއީގޭގެ ނުވަވަނަ ފަންގިފިލާއިން ހައްވާ ޔުމްނު ރަޝީދު ހ. މިޓާޒްގޭގެ ފުރާޅު މައްޗަށް ވެއްޓިފައި އޮއްވާ ފެނުނު މައްސަލައިގައި ގ. އެރިޔަދޫ، ރައުދު އަހުމަދު ޒިލާލުގެ މައްޗަށް ދައުލަތުން ކުރި ދައުވާއަށް އޭނާ އިއުތިރާފު ވެއްޖެއެވެ.
އެ މައްސަލައިގައި ރައުދުގެ މައްޗަށް ދައުވާ ކުރުމަށް ޕީޖީ އޮފީހަށް ފޮނުވާފައި ވަނީ މިދިޔަ މެއި މަހުއެވެ. އޭނާގެ މައްޗަށް ކޮށްފައި ވަނީ ދިވެހިރާއްޖޭގެ ގާނޫނުލްއުގޫބާތުގެ 618 ވަނަ މާއްދާގެ ދަށުން، އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި، އެހީތެރިކަން ފޯރުކޮށްނުދިނުމުގެ ކުށުގެ ދައުވާ އެވެ.
ރައުދުގެ މައްޗަށް އެ ދައުވާ ކޮށްފައި ވަނީ 18 އެޕްރީލް 2025 ދުވަހު 04:54 އެހައިކަށްހައިއިރު ހ. ފެންޓެނޯއީ ގޭގެ 9 ވަނަ ފަންގިފިލާގެ ސިޑި ގޮޅީގައި ހުންނަ ފެން ލައިޓުން (ކުޑަދޮރަކުން) ހ. މިޓާޒް ގޭގެ ފުރާޅު މައްޗަށް އަންހެނަކު ވެއްޓުނުކަން އެނގިހުރެ، އޭނާއަށް އެހީތެރިވެދީފައި ނުވާތީއާއި، އޭނާއަށް އެހީތެރިކަން ހޯދުމަށް އެދި ކަމާ ގުޅުންހުރި އެއްވެސް އިދާރާއަކަށް ރިޕޯޓުކޮށްފައިނުވާތީއެވެ.
އަދި އެ ކުށަށް އޭނާ ވަނީ އިއުތިރާފްވެފައެވެ. އެހެންކަމުން ދެން ކުރިއަށް ގެންދާނީ އަވަސްނިޔާގެ މައްސަލައެއްގެ ގޮތުގައެވެ. ރައުދުގެ މައްޗަށް މި ދައުވާ ސާބިތުވެއްޖެ ނަމަ 1 މަހާއި ހަ ދުވަހުގެ ޖަލު ހުކުމެއް އަންނާނެއެވެ. ފުލުހުންގެ ހައްޔަރުގައި ދުވަސްކޮޅަކަށް ބެހެއްޓުމަށްފަހު ރައުދު ވަނީ ޕީޖީގެ ލަފާގެ މަތީން ދޫކޮށްލައިފައެވެ.
ޔުމްނު ވެއްޓުނު ރޭ ޔުމްނުއާއެކު ހ. ފެންޓެނޯއީގޭގައި ރައުދުއާއި ޔުމްނުއާ ދެމެދު ހަމަނުޖެހުންތަކެއް ހިނގާފައިވާ ކަމަށް ފުލުހުން މީގެ ކުރިން ވަނީ ބުނެފައެވެ. އަދި ޔުމްނު ވެއްޓުނު ހާދިސާއަށް ފަހު އޭގެ މާ ގިނައިރު ތަކެއް ނުވަނީސް ޔުމްނު ކޮބައިތޯ ރައުދުއާއި ސުވާލުކުރުމުން ވީތަނެއް ނޭނގޭ ކަމަށާއި، ވެއްޓުނީ ކަމަށް ބެލެވޭ ކަމަށް ރައުދު ބުނި ކަމަށް ވެސް ފުލުހުންގެ ތަހުގީގަށް އެނގިފައިވާ ކަމަށް ފުލުހުން ބުނެފައިވެއެވެ.
