މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް، މިފްކޯއިން ފުވައްމުލައް ސިޓީ ބަނދަރުން މަސްގަންނަން ފަށައިފިއެވެ.
މިފްކޯއިން ނެރުނު ބަޔާނެއްގައި ބުނެފައިވަނީ، އެ ކުންފުނީގެ ސީއީއޯ ފަރުޙަތު ޝަހީރު މި އޮގަސްޓު މަހު ފުވައްމުލައް ސިޓީއަށް ކުރެއްވި ދަތުރުގައި ފުވައްމުލަކު ސިޓީގެ ކައުންސިލާ ބައްދަލުކޮށް، އެ ސިޓީން މަސް ގަންނާނެކަމަށް ވައުދުވެވަޑައިގެންފައިވާ ކަމަށެވެ. އަދި މިދިޔަ ބުރާސްފަތި ދުވަހު މިފްކޯގެ ބޯޓު، ފުވައްމުލަކަށް ބަނދަރުކޮށް ރޭ މަސްގަންނަން ފަށާފައިވާކަމަށް އެ ކުންފުނިން ވަނީ ބުނެފައެވެ.
ފުވައްމުލައް ސިޓީ ބަނދަރުން މަސްގަތުމަށްޓަކައި މިފްކޯގެ "ރަނދި 19" ބޯޓު ބަނދަރުކޮށްފައިވާ އިރު މި ބޯޓަކީ 36 މެޓްރިކްޓަނުގެ މަސްކިރުވައި ރައްކާކުރެވޭ ޖާގައިގެ ބޯޓެެކެވެ.
މީގެ އިތުރުން މިފްކޯ އިން ވަނީ ފުވައްމުލައް ސަރަހައްދަށް ހާއްސަކޮށްގެން މިފެށި އޮޕަރޭޝަނާއެކު މިފްކޯއަށް ކިރުވާ މަހުގެ އަދަދު އިތުވެގެންދާނެކަން ހާމަކޮށްފައެވެ. އަދި ފުވައްމުލައް ސަރަހައްދުގެ މަސްވެރިންނަށް ލުއިފަސޭހަކަމާއެކު މެދުނުކެނޑި މަސްކިރުވުމުގެ އިންތިޒާމު ދާއިމީކޮށް ހަމަޖެހިގެންދާނެކަމަށް އެ ކުންފުނިން ވަނީ ބުނެފައެވެ. ފުވައްމުލައް ހިމެނޭ ސަރަހައްދުގައި މަސްވެރިކަން ކުރިއެރުވުމަށްޓަކައި އެ ސިޓީގައި މަސް ޕްރޮސެސިން ފެސިލިޓީގެ ގާއިމްކުރުމުގެ އަމަލީ މަސައްކަތްވެސް ފަށާފައިވާއިރު، މިފެސިލިޓީ މިއަަހަރު ނިމުމުގެކުރިން ނިންމާލެވޭނެ ކަމަށް މިފްކޯ އިން ވަނީ ބުނެފައެވެ.
