ފުލުހުންނަކީ އަބަދުވެސް ގާނޫނުތަކާއި ގަވައިދުތަކަށް ބޯލަނބާ ބަޔަކަށް ވާންޖެހޭނެކަމަށާއި ރައްޔިތުންގެ އިހްތިރާމް ހޯދުމަށް ފުލުހުން އަބަދުވެސް މަސައްކަތް ކުރަންވާނެކަމަށް ކޮމިޝަނާ އޮފް ޕޮލިސް އިސްމާލް ނަވީން ވިދާޅުވެއްޖެއެވެ.
40 ވަނަ ފުލުހުންގެ އަސާސީ ތަމްރީން ކޯހުގެ ދަސްވެނިވެ ހިނގާލުމުގެ ރަސްމިއްޔާތުގައި ސީޕީ ނަވީން ވިދާޅުވީ ފުލުހުންގެ ޔުނީފޯމަކީ މަސްއޫލިއްޔަތާ، ޒިންމާތަކާއެކު ކޮނޑުގައި އެޅިފައިވާ ވާޖިބެއްގެ ނިޝާންކަމަށެވެ. އަދި މި ނިޝާން އަބަދުވެސް ފުލުހުންގެ ހަނދާނުގައި ބަހައްޓާންވާނެ ކަމަށާއި މި ނިޝާނަށް އިހުލާސްތެރިވާންވާނެކަމަށް ނަވީން ވިދާޅުވިއެވެ
ފުލުހުންގެ އަސާސީ ތަމްރީން ކޯހުން ދަސްވެނިވުމަކީ މި ދަތުރުގެ ފެށުންކަން ފާހަގަކުރައްވަމުން ނަވީން ވިދާޅުވީ ފުލުހުންގެ މަސައްކަތްތަކުގައި ތެދުވެރިކަމާ، އަމާނާތްތެރިކަމާ، ޕްރޮޕެޝަނަލްކަމާ، ވަކި ފަރާތަކަށް ނުޖެހުމާ އަދި އިންސާނީ ހައްގުތަކަށް އިހްތިރާމްކޮށް ރައްޔިތުން އިހްތިރާމްކުރާ ބަޔަކަށް ވާންޖެހޭނެ ކަމަށެވެ. މީގެ އުތުރުން ނަވީން ވިދާޅުވީ ރައްޔިތުން އިތުބާރުކުރާ ބަޔަކަށް ކޮންމެ ފުލުހަކުވެސް ވުމަކީ މުޖުތަމައުގެ ބަލަދުވެރިންގެ ސިފައެއް ކަމަށެވެ. އަދި ހެދިފައިވާ ގާނޫނުތަކާއި ގަވާއިދުތަކަށް ފުރިހަމައަށް ބޯލެނބުމާއެކު އަބަދުވެސް އިސްކަންދޭންވާނީ ރައްޔިތުންނާ ގާތުން މަސައްކަތް ކުރުމަށް ކަމަށް ނަވީން ވިދާޅުވިއެެވެ.
ހަގީގީ ދުނިޔޭގެ ފުލުހުންގެ ގޮންޖެހުންތަކަށް، ދަސްވެނިވި ހުރިހާ ފުލުހުން ތައްޔާރުކުރެވިފައިވާކަން ފާހަަގަކުރައްވަމުން ނިޝާން ވިދާޅުވީ ކުށްކުރުމާއި މަސްތުވާތަކެއްޗާ އިޖުތިމާއީ މައްސަލަތަކާ ކުއްލި ހާލަތްތަކާ ކުރިމަތިލާންޖެހޭނެ ކަމަށެވެ. އަދި ކެތްތެރިކަމާއި އޯގާތެރިކަން އަދި އަޅާލުމާއި އިންސާފުވެރިކަމަކީ އަވައްޓެރި ފުލުހުންގެ ފަލްސަފާގެ މައިގަނޑު އެއް އަސާސް ކަމަށާއި ދިވެހި ފުލުހުންގެ ޝަރަފުވެރި ބެޖުގެ އިއްޒަތާއި ގަދަރު ހިފަހައްޓާނެކަމުގެ ޔަގީންކަން އެބައޮތް ކަމަށެވެ.
