ކޮންމެ ބޮޑު ކާމިޔާބީއެއްގެ ފަހަތުގައި ވަނީ އެކަމެއް ކުރުމަށްޓަކައި ދެކެމުން އަންނަ ހުވަފެނާއި ނުގުޑާފަދަ ވަރުގަދަ އަޒުމެވެ. ރާއްޖޭގައިވެސް ތަފާތު މޮޅެތި ހުނަރުވެރި ދަރިން ތިބިއިރު، މިފަދަ މޮޅެތި ކާމިޔާބީތައް ހާސިލުކޮށްފައި އެބަ ހުއްޓެވެ.
މިއަދު "ދަ ޕްރެސް" އިން ކިޔުންތެރިންނަށް މި ދޫކޮށްލަނީ މިފަދަ ތަފާތު މޮޅު އީޖާދެއް ކޮށްފައިވާ ގއ. ގެމަނަފުއްޓަށް އުފަން އުމުރުން އެންމެ 16 އަހަރުގެ އަހުމަދު އައިޒަން އަމްޖަދުގެ ވާހަކައެވެ. އައިޒަން ވަނީ ކާމިޔާބު ކަމާއެކު ރޭސިން ކާރެއް ކުރު މުއްދަތެއްގެ ތެރޭގައި ހަދާ ނިންމާލާފައެވެ. ގިނަ ބައެއްގެ ސަމާލުކަން މި ރޭސިން ކާރަށް ލިބެމުންދާއިރު، މި ކާރު ފެނިފައި ހައިރާން ނުވާ މީހަކު މަދެވެ. ހުދު އަހަރެންވެސް އައިޒަންގެ ވާހަކަތައް އަޑުއަހާލާފައި އަޖައިބުވިއެވެ.
މި ނޫހަށް މައުލޫމާތު ދެމުން އައިޒަން ބުނީ މިއީ ގުރޭޑު 8 ގައި ކިޔަވަމުން ދިޔައިރުވެސް ސިކުނޑީގައި އެނބުރެމުން ދިޔަ ހިޔާލެއް ކަމަށެވެ. ނަމަވެސް އޭރު މިފަދަ މަސައްކަތެއް ނުކުރީ ކިޔެވުމަށް ދެވޭ ވަގުތު މަދުވެދާނެ ތީ ކަމަށާއި، މި އަހަރުގެ ޖޫން މަހު އޯލެވެލްގެ އިމްތިހާނު ނިމުމާއެކު މި މަސައްކަތް ކުރަން ފެށި ކަމަށް އައިޒަން ބުންޏެވެ.
އައިޒަން ކިޔައިދިން ގޮތުގައި އައިޒަން އަކީ ކުޑައިރުންސުރެ ކުޅެން ގެންގުޅޭ ރިމޯޓު ކާރުތަކާއި، ލޯންޗުތައް ރޫޅާ އެ އެއްޗެހި ދިރާސާކޮށް އުޅުނު ކުއްޖެކެވެ. އަމިއްލަ އަށް ފުޅިމަދުންނާ މިކަހަލަ ތަކެތި ބޭނުންކޮށްގެން ކުދި ކުދި އެއްޗެހި ހަދާކަމަށާއި، މިއީ އަބަދުވެސް ކުރާ ހިތްވާ މަސައްކަތެއް ކަމަށް އައިޒަން ބުންޏެވެ.
ރޭސިން ކާރު ހެދުމުގައި ދިމާވި އެންމެ ބޮޑު ގޮންޖެހުން
މިފަދަ ބޮޑު މަސައްކަތެއް ކުރާއިރު ތަފާތު ގިނަ ގޮންޖެހުންތަކާއި ކުރިމަތިވާނެ ކަން ޔަގީނެވެ. އައިޒަން ކިޔައިދިން ގޮތުގައި ރޭސިން ކާރު ހެދުމަށް ބޭނުންވާ ތަކެތި ހޯދުމުގައި ދަތި ތަކެއް ކުރިމަތިވިއެވެ. އެގޮތުން އެންމެ އުނގަދޫވީ ފަހަތު ޝާފްޓް ހެދުމަށް ސީދާ އެ ސައިޒުގެ ޝާފްޓެއް ހޯދުން ކަމުގައި އައިޒަން ބުންޏެވެ. ދެން ލިބުނު ޝާފްޓް އަށް އޮޅިގަނޑެއް އިތުރުކޮށް އަމިއްލައަށް މޮޑިފައިކުރުމަށްފަހު ހެދީކަމުގައި އައިޒަން ބުނެއެވެ.
ރޭސިން ކާރުގެ ފްރޭމާއި އޭގެ ކަވަރުތަކާއި އިންޖީނާއި މި ހުރިހާ އެއްޗެއްވެސް އެއީ އަމިއްލައަށް ބަގީ ތަކާއި ސައިކަލު ތަކުން ނަގާފައިވާ ތަކެތިންކަން ފާހަގަކޮށް އައިޒަން ބުނީ ފުރޮޅުތަކާ އެއްޗެހި ހެދީ އަމިއްލައަށް މޮޑިފައި ކުރުމަށްފަހު ކަމަށެވެ.
އައިޒަން ފާހަގަކުރި ގޮތުގައި މި މަސައްކަތް ކާމިޔާބުކަމާއެކު ނިންމާލުމުގައި އެންމެ ބޮޑު އެހީތެރިކަމެއް ލިބިފައިވަނީ މައިންބަފައިންގެ ފަރާތުންނެވެ. އަދި ބޭބެމެންގެ ފަރާތުން ލިބުނު އެހީތެރިކަމަށްވެސް އައިޒަންގެ ހިތުގައި ވަނީ ނިމުމެއް ނެތް ޝުކުރެވެ.
އައިޒަން ކިޔައިދިން ގޮތުގައި ފުރަތަމަ ފަހަރަށް އަލަށް ވެލްޑިން ޕްލާންޓެއްގަ އަތްވެސް ލީ މި މަސައްކަތް ކުރުމަށްޓަކައެވެ. އެގޮތުން މިކަން ކުރަން ދަސްކުރުމަށް ބޭބެއެއްގެ އެހީތެރިކަން ވަރަށް ބޮޑަށް ލިބުނުކަމަށާއި، ދެން މަސައްކަތް ކުރިއަށް ގެންދިޔައީ ރެޔާ ދުވާލު އަމިއްލަ އަށް ކަމަށް އައިޒަން ބުންޏެވެ.
މުސްތަގުބަލުގައި ކުރިއަށް ދާން ބޭނުންވަނީ އިންޖިނިއަރިންގެ ދާއިރާއިން
މުސްތަގުބަލަށް އައިޒަން ފޮނި އުންމީދުތަކެއް ދެކެއެވެ. އައިޒަން ކުރިއަށް ދާން ބޭނުންވަނީވެސް ހަމަ މި ދާއިރާއިންނެވެ. އެގޮތުން އައިޒަން ވަނީ މި އަހަރުގެ އޮގަސްޓު 31 ގައި ދިވެހިރާއްޖެ ގައުމީ ޔުނިވަސިޓީ (އެމްއެންޔޫ)ގައި ފަށާ ފައުންޑޭޝަން އިން އިންޖިނިއަރިން ކޯހުގައި ބައިވެރިވެފައެވެ.
މި ކޯސް ހެދުމަށް މިހާރު މާލެ އައިސްފައިވާ އައިޒަން ބުނި ގޮތުގައި އައިޒަންގެ މި މަސައްކަތާމެދު އަމިއްލަ އަށް އުފާވެ ފަހުރުވެރިވެއެވެ.
އައިޒަން ފަދައިން މިފަދަ ތަފާތު ތަކެތި ހަދަން ބޭނުންވާ ކުދިންނަށް އައިޒަން ދޭން ބޭނުންވާ ހާއްސަ މެސެޖެއެއް އެބައޮތެވެ. އެއީ ކަމެއް ކުރުމުގެ ވަރުގަދަ އަޒުމެއް އޮތިއްޔާ އެކަމެއް ކުރެވޭނެ ކަމެވެ. އައިޒަން ބުނާ ގޮތުގައި ބޭނުންވަނީ ކަން ކުރާނެ ހިތްވަރެވެ. ނުގުޑާފަދަ އަޒުމެވެ.