ޔަހޫދީ އިޒްރޭލުން ގާޒާގެ ސްކޫލަކަށް ދިން ހަމަލާއާއި ބޭސްފަރުވާއަށް ބެނުންވާ ސާމާނު ރައްކާކުރާ ގުދަނަކަށް ދިން ހަމަލާތައް ރާއްޖެއިން ކުށްވެރި ކޮށްފިއެވެ.

އެ ހަމަލާތައް ކުށްވެރިކޮށް ރާއްޖޭގެ ފޮރިން މިނިސްޓްރީން މިއަދު ނެރުނު ބަޔާނުގައި ބުނީ، މި ހަމަލާތަކުގައި ކުށެއްނެތް އަންހެނުންނާއި ކުޑަކުދިން މަރުވެ އެތަކެއް ބަޔަކު ޒަހަމް ވެފައިވާ ކަމަށެވެ.

މީގެ އިތުރުން، ސައުދީ ސެންޓަ ފޯ ކަލްޗާ އެންޑް ހެރިޓޭޖުން ގާޒާގައި ހިންގާ ބޭސްފަރުވާއަށް ބޭނުންވާ ސާމާނު ރައްކާކުރާ ގުދަނަކަށް އިޒްރޭލުން ދިން ހަމަލާވެސް ވަނީ ސަރުކާރުން ކުށްވެރިކޮށްފައެވެ.

"މިދަފަ ހަމަލާތަކަކީ ބައިނަލްއަގްވާމީ ގާނޫނާއި ބައިނަލްއަގްވާމީ އިންސާނިއްޔަތުކަމާބެހޭ ގާނޫނާ މުޅިން ހިލާފު އަމަލުތަކެއްކަން ފާހަގަކުރަން" އެ ބަޔާނުގައި ވެއެވެ.

ހަމައެހެންމެ އިޒްރޭލުން ހިންގާ މިފަދަ އަނިޔާވެރި އަމަލުތައް ވަގުތުން ހުއްޓުވައި، މި އަމަލުތަކަށް އިޒްރޭލު ޖަވާބުދާރީކުރުވައި، ގާޒާގެ ރައްޔިތުންގެ އަސާސީ ބޭނުންތައް ފުށްދުމަށް ބޭނުންވާ އެހީތެރިކަން ފޯރުކޮށްދިނުމަށް ބައިނަލްއަގްވާމީ މުޖުތަމައަށް ރާއްޖެއިން ގޮވާލާ ގޮވާލުން ވަނީ ތަކުރާރުކޮށްފައެވެ.

އަދި ފަލަސްތީނުގެ ރައްޔިތުންނަށް ކުރާ ތާއީދު ތަކުރާރުކޮށް، މި މައްސަލައަށް ދެމެހެއްޓެނިވި އަދި އަދުލުވެރި ހައްލެއް ހޯދޭނީ 1967 ވަނަ އަހަރުގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަންކުރާ ރަށްކަމުގައި ކަނޑައަޅައި، ފަލަސްތީނުގެ މިނިވަން ދައުލަތެއް ގާއިމުކުރެވިގެން ކަމަށްވެސް އެ ބަޔާނުގައި ބުނެފައި ވެއެވެ.