ކ. ގުޅީގެ ބިންހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ ތެރެއިން ބިން ހިއްކުމުގެ އަމަލީ މަސައްކަތް ފަށައިފިއެވެ.
މިކަމާ ގުޅިގެން އެމްޓީސީސީ އިން ނެރުނު ބަޔާނެއްގައި ބުނެފައިވަނީ 814 މީހުންގެ އާބާދީއެއް އޮންނަ ގުޅިއަކީ ވަރަށް ރީތި ހިތްގައިމު ރަށެއް ކަމަށާއި، ނަމަވެސް ގުޅިއަކީ ބިމުގެ ޖާގައިގެ ދަތިކަން ވަރަށް ބޮޑަށް ދިމާވެފައިވާ ރަށެއް ކަމަށެވެ. އެއާއެކު އެމްޓީސީސީ އިން ވަނީ މި މަޝްރޫގެ ދަށުން ބިން ހިއްކުމުގެ މަސައްކަތް ފެށުމާއެކު ރައްޔިތުންގެ ހުވަފެންތަކުގައި ކުލަޖެހިގެންދާނެ ކަމަށާއި، މަޝްރޫއު ނިމުމާއެކު ރަށުގެ ރައްޔިތުންގެ އޮތް ބޯހިޔާވަހިކަމާއި އިގްތިސޯދު ފުޅާކުރުމަށް އޮތް ދަތިކަމަށް ބޮޑުތަނުން ހައްލު ލިބިގެންދާނެ ކަމަށެވެ.
އެމްޓީސީސީން ބުނީ މި މަޝްރޫއުގެ ދަށުން ބިން ހިއްކުމުން 10.15 ހެކްޓަރުގެ ބިމެއް އެ ރަށަށް އިތުރުވާނެ ކަމަށެވެ. އަދި ގޮނޑުދޮށް ހިމާޔަތްކުރުމުގެ މަސައްކަތުގެ ދަށުން 10,962 މީޓަރުގެ ބޮޑު ހިލައިގެ ރިވެޓްމަންޓާއި 362 މީޓަރުގެ ޖިއޯބޭގް ރިވެޓްމަންޓެއްގެ އިތުރުން 88 މީޓަރުގެ ގްރޮއިންސް ޖެހުމުގެ މަސައްކަތް ކުރާނެ ކަމަށެވެ.
މި މަޝްރޫއުއަކީ 89.63 މިލިއަން ރުފިޔާގެ މަޝްރޫއެކެވެ.
ބިން ހިއްކުމުގެ މަސައްކަތް ރަސްމީކޮށް ފަށްޓަވައިދެއްވާފައިވަނީ އެމްޓީސީސީގެ މެނޭޖިން ޑިރެކްޓަރު އަހްމަދު ސައުދީއެވެ. މަސައްކަތް ފަށްޓަވައިދެއްވުމަށް ފަހު ވާހަކަދައްކަވަމުން ސައުދީ ވިދާޅުވީ މިދިޔަ ސަރުކާރުގައި ދައުރު ނިމެން ގާތްވެފައިވަނިކޮށް އެމްޓީސީސީއަށް މަސައްކަތް ހަވާލުކުރި ނަމަވެސް، މަސައްކަތް ފެށުމަށްޓަކައި ކުރަންޖެހޭ އެއްވެސް ކަމެއްކޮށްފައިނުވާ ކަމަށެވެ.
މި ރަސްމިއްޔާތުގައި ގުޅީ ކައުންސިލްގެ ރައީސް މޫސާ ސަފީލާއި، އެމްޓީސީސީއާއި ގުޅީގެ ކައުންސިލްގެ އިސްވެރިން ވަނީ ބައިވެރިވެވަޑައިގަންނަވާފައެވެ.
ފާހަގަކޮށްލެވޭ ގޮތުގައި ފަތުރުވެރިކަމުގެ ދާއިރާގައިވެސް ކުރި އަރަމުން އަންނަ ގުޅީގައި އެންމެ ފަހުން ބިން ދޫކޮށްފައިވަނީ 2003 ވަނަ 13 ގޯއްޗެވެ. ގުޅީގައި ބޯހިޔާވަހިކަމަށް ބޭނުންވެފައިވާ ގިނަ އަދަދެއްގެ ރައްޔިތުންތަކެއް ތިބި ކަމަށް އެ ރަށު ކައުންސިލުން ވަނީ ފާހަގަކޮށްފައެވެ.
