މި އަހަރު ވެގެންދާނީ ގެދޮރުގެ ދަތިކަމުގެ މައްސަލަ ހައްލު ކުރުމުގައި އަމަލީ ގޮތުން އެއް އަހަރެއްގެ ތެރޭގައި އެންމެ ގިނަ މަސައްކަތް ހިންގާނެ އަހަރު ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެ މަނިކުފާނު މިފަދައިން ވިދާޅުވެފައި ވަނީ ކ. ގުޅިއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ވަނީ މި އަހަރަކީ "ބޯހިޔާވަހިކަމުގެ އަހަރަށް" ހައްދަވާނެ ކަމުގެ ޔަގީންކަން ދެއްވާފައެވެ. އެގޮތުން މާލެ ފިޔަވައި ރާއްޖޭގެ އެހެން ހުރިހާ ސަރަހައްދެއްގައި ކުރިއަށް ގެންދަވާނެ ކަމަށް ވައުދުވެވަޑައިގެންފައިވާ ބޯހިޔާވަހިކަމުގެ ހުރިހާ މަޝްރޫއުތަކުގެ އަމަލީ ގޮތުން ހިންގައިދޭނެ ފަރާތްތައް ހޯދުމަށް، މިމަހުގެ ތެރޭގައި އިއުލާން ކުރައްވާނެ ކަމަށް ރައީސް ވިދާޅުވިއެވެ.
އެކި ފަރާތްތަކާ މަސައްކަތްތައް ހަވާލު ކުރެވޭ ތަރުތީބުން، މި އަހަރު ވެގެންދާނީ ގެދޮރުވެރިކަމުގެ ދާއިރާއިން އެއް އަހަރެއްގެ ތެރޭގައި އަމަލީ ގޮތުން އެންމެ ގިނަ މަޝްރޫއު ހިންގޭނެ އަހަރު ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ބިން ހިއްކައި، ޖާގަ އިތުރު ކުރެވިފައި ވާ ރަށްތަކުގައި ވެސް ކުރިއަށް ހުރި އަހަރުތަކުގެ ތެރޭގައި މިކަން ހިނގަމުންދާނެ ކަމަށް އެ މަނިކުފާނު ވިދާޅުވިއެވެ. ވެރިރަށް މާލެ ސަރަހައްދުގެ މަޝްރޫއުތައް ވެސް އިއުލާންކޮށްފައިވާ ގޮތަށް ކުރިއަށްދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މާލެ އަތޮޅު ގުޅިއާ ދާދި ކައިރީގައި އޮތް ފަޅަކީ، މި ސަރުކާރުން ހިންގާ ބޯހިޔާވަހިކަމުގެ އެންމެ މުހިންމު މަޝްރޫއު ހިނގާ ސަރަހައްދުކަން ފާހަގަކުރައްވައި ރައީސް މުއިއްޒު ވަނީ، މާތް ﷲގެ އިރާދަފުޅާއެކު "ރަސްމާލެ" މަޝްރޫއަކީ ރާއްޖެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އެއް ސަރަހައްދަކުން އެންމެ ބޮޑު ހައްލެއް ލިބޭނެ މަޝްރޫއު ކަމުގައި ވިދާޅުވެފައެވެ. އެގޮތުން އެމަޝްރޫއުގެ ބިން ހިއްކުމުގެ އަމަލީ މަސައްކަތްތައް މިހާރުވެސް ކުރިއަށްދާ އިރު، އިތުރު ފަރާތްތަކާ ގުޅިގެން މަޝްރޫއު ފުޅާކޮށް، މަސައްކަތުގެ ދުވެލި، ދެތިން ގުނައަށް ހަލުވިކުރެވިގެންދާނެ ކަމުގައިވެސް ރައީސް ވިދާޅުވިއެވެ.
އެ މަޝްރޫއު ނިމިގެންދާއިރު މުޅި ރާއްޖެއަށް، އަދި ރަސްމާލެ ހިމެނޭ ސަރަޙައްދަށް ވެސް ފައިދާތަކެއް ގެނެސްދޭނެކަމުގެ ޔަގީންކަން އެބައޮތް ކަމުގައި ރައީސް ވަނީ ވިދާޅުވެފައެވެ. މި އަހަރަކީ ތަރައްގީގެ އަމަލީ މަސައްކަތާއި މާލީ ތަނަވަސްކަން އިހްސާސްކޮށް ދިނުމުގެ އަމަލީ މަސައްކަތްތައް ވަރަށް ފުޅާ ދާއިރާއެއްގައި، އެހާމެ ބާރަށް ހިނގާނެ އަހަރެއް ކަމަށް ރައީސް ވިދާޅުވިއެވެ. ކުރިއަށްދާންވީ މި ރޫހާއި އުންމީދުގައި ކަމަށް ވެސް ރައީސް ވިދާޅުވިއެވެ.
ވާރުތަވި އިގްތިސޯދަކާއެކު ނިމިދިޔަ އަހަރަކީ އެންމެ އެދިވަޑައިގެންނެވި ގޮތަށް ކަންކަން ހިނގި އަހަރަކަށް ނުވި ނަމަވެސް، މިދިޔަ އަހަރު ދުވަހުގެ ތެރޭގައި ހަރުދަނާ ކުރެއްވި، އިގްތިސޯދީ ބިންގަލުގެ މަތީގައި ގައުމު ބިނާކުރައްވަމުން ގެންދަވާނެ ކަމުގެ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ. ސަރުކާރުގެ އެކި ވުޒާރާތަކާއި، ސަރުކާރު ހިއްސާވާ ކުންފުނިތަކާ، އެ ނޫންވެސް ގޮތްގޮތުން އެކި ފަރާތްތަކުން ހޯދާފައިވާ ހިދުމަތްތަކަށް ދޭންޖެހޭ އުޖޫރަ ހަލާސް ކުރުމުގެ މަސައްކަތްތައް މިދިޔަ އަހަރު ކުރެއްވި ފަދައިން، މި އަހަރުގެ ފުރަތަމަ 2 މަސްދުވަހުގެ ތެރޭގައިވެސް އެމަސައްކަތް ކުރައްވާނެ ކަމުގައި ރައީސް ވިދާޅުވިއެވެ.
އަތޮޅުތަކާއި، ރަށްތަކާއި، ސިޓީތަކުގެ ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރެއްވުމަށް ރައީސުލްޖުމްހޫރިއްޔާ ފައްޓަވައިގެން ކުރިޔަށްގެންދަވާ ސިލްސިލާ ދަތުރުފުޅުތަކުގެ ތެރެއިން، މިއަހަރު ކުރައްވާ އެންމެ ފުރަތަމަ ދަތުރުފުޅެއްގެ ގޮތުގައި ރައީސް ވަޑައިގަތީ ކ. ގުޅިއަށެވެ.
