ދިރިއުޅުމުގައި އެންމެ މުހިންމު އެއް ކަމަކީ އުނގެނުމާއި ދަސްކުރުމެވެ. މިގޮތުން، އެހެން ގައުމުތަކުގެ ސަގާފަތަކާއި އާދަކާދަތައް ދަސްކުރުމަކީ ވަރަށް މުހިންމު ކަމެކެވެ. މިފަދަ ކަންކަމުން ތިމާގެ ދިރިއުޅުމުގައި ތަފާތު ތަޖުރިބާތައް ކުރެވި ދުނިޔެއަށް ލޯ ހުޅުވިގެން ދާނެއެވެ. މިއާއެކު ތިމާގެ ވިސްނުން ތަނަވަސްވެ، އެހެން މީހުންނާ މެދު ދެކޭގޮތް ބަދަލުވެ ގުޅުންތައް ބަދަހިވެގެން ދާނެއެވެ. މިސާލަކަށް، ޗައިނާގެ މުޖުތަމައުގައި އޮންނަ ބޮޑެތި މީހުންނަށް އިހުތިރާމް ކުރުމާއި، އާއިލާގެ އެއްބައިވަންތަކަމަށް ދޭ އަހައްމިއްޔަތުކަން ފަދަ ކަންކަމަކީ އަހަރެމެން ދަސްކޮށް، އަމަލުކުރަން ޖެހޭ ކަންކަމެވެ.
އެގޮތުން މިއަދު "ދަ ޕްރެސް" އިން މި ގެނެސްދެނީ މިފަދައިން ރައްޔިތުންގެ މެދުގައި ހާއްސަކޮށް ޒުވާނުންގެ މެދުގައި ބައިނަލްއަގުވާމީ ހޭލުންތެރިކަން އިތުރުކުރުމަށް މަސައްކަތް ކުރަމުންދާ އެންޖީއޯއެއްގެ ވާހަކައެވެ. ޗައިނާ-މޯލްޑިވިއަން ކަލްޗަރަލް އެސޯސިއޭޝަން ނުވަތަ ސީއެމްސީއޭ އަކީ ދިވެހި ރާއްޖޭގައި ޗައިނާގެ ބަހާއި ސަގާފަތް ކުރިއަރުވާ އާލާކުރުމުގެ ގޮތުންނާއި، ދެގައުމުގެ ދެމުދުގައި އޮތް ގުޅުން ހަރުދަނާ ކުރުމުގެ އިތުރުން ޒުވާނުންގެ ހުނަރުތައް ތަރައްގީކުރުމަށް އަމިއްލަ ފަރާތަކުން އިސްވެ އުފައްދާފައިވާ ޖަމިއްޔާއެކެވެ. 2015 ވަނަ އަހަރު އުފައްދާފައިވާ މި ޖަމިއްޔާގެ ފައުންޑާ އަދި ޗެއާމަންއަކީ މީގެ ކުރިން ރާއްޖެއިން ޗައިނާއަށް ކަނޑައަޅުއްވަވާފައިވާ ސަފީރެއްގެ މަގާމު އަދާކުރެއްވެވި ބޭފުޅެއް ކަމުގައިވާ މުހައްމަދު ރަޝީދެވެ.
މި ޖަމިއްޔާގެ މައުލޫމާތު "ދަ ޕްރެސް" އަށް ދެއްވަމުން ސީއެމްސީއޭގެ ޖެނެރަލް ސެކްރެޓަރީ އާމިނަތު ޝަމާ މުހައްމަދު ވިދާޅުވީ މި ޖަމިއްޔާއިން، ކުރަމުންދާ މައިގަނޑު މަސައްކަތްތަކުގެ ތެރޭގައި، ރާއްޖޭގެ ޒުވާނުންނަށް ޗައިނާގެ ބަހާއި ސަގާފަތް ތައާރަފްކުރުމުގެ ގޮތުން ކޮންމެ އަހަރަކު "ސީއެމްސީއޭ ފްލެގްޝިޕް ޕްރޮގްރާމް"ގެ ނަމުގައި ޕްރޮގްރާމެއް ހިންގަމުންދާ ކަމަށެވެ.
ސީއެމްސީއޭއިން މިހާތަނަށް 15 އަށްވުރެ ގިނަ ދަރިވަރުންނަށް ސްކޮލާޝިޕްގެ ފުރުސަތު ދީފައިވޭ
ޝަމާ ވިދާޅުވި ގޮތުގައި ސީއެމްސީއޭ އިން 2018 ވަނަ އަހަރުން ފެށިގެން މިއަދާ ހަމައަށް 15 އަށްވުރެ ގިނަ ދިވެހި ދަރިވަރުންނަށް އެކި ދާއިރާތަކުން ޗައިނާގައި ކިޔެވުމަށް ސްކޮލާޝިޕްގެ ފުރުސަތު ވަނީ ދީފައެވެ. މި ސްކޮލާޝިޕް ޕްރޮގްރާމްތަކަށް ދަރިވަރުން ހޮވުމުގައި އިސްކަން ދެނީ ސީއެމްސީއޭއިން ކަނޑައަޅާފައިވާ ޝަރުތުތައް ފުރިހަމަވާ ދަރިވަރުންނަށެވެ.
މި ސްކޮލާޝިޕްތަކާ ބެހޭ މައުލޫމާތު ސީއެމްސީއޭގެ ވެބްސައިޓްގައި ޝާއިއުކުރުމަށްފަހު ސްކޮލާޝިޕްތަކަށް ކުރިމަތިލުމުގެ ފުރުސަތު ހުޅުވާލެވިގެންދާނެ ކަމަށް ޝަމާ ވިދާޅުވިއެވެ.
މަޒުމޫނު ލިޔުމުގެ މުބާރާތަކުން ހޮވި އެންމެ މޮޅު 12 ދަރިވަރަކު މިދިޔަ އަހަރު ޗައިނާއަށް ގެންދިޔަ
ޝަމާ ވިދާޅުވި ގޮތުގައި މިދިޔަ އަހަރުގެ ކަލްޗަރަލް އެކްސްޗޭންޖް ޕްރޮގުރާމު ކުރިއަށް ގެންގޮސްފައިވަނީ ދެ އަތޮޅެއްގެ ކުދިންނަށެވެ. އެއީ ށ. އަދި ނ. އަތޮޅުގެ ދަރިވަރުންނަށެވެ. މި ދަތުރަށް ކުދިން ހޮވުމަށްޓަކައި ވަނީ މަޒުމޫނު ލިޔުމުގެ މުބާރާތެއް ބާއްވާފައެވެ. މި މުބާރާތުގައި ދަރިވަރުން މަޒުމޫނު ލިޔަން ޖެހެނީ ޗައިނާގެ ސަގާފަތާއި ބެހޭގޮތުން ދަރިވަރުންނަށް ލިބިފައިވާ މައުލޫމާތުގެ އެހީގައި ސީއެމްސީއޭއިން ދޭ މައުޟޫތަކެއްގެ މައްޗަށެވެ. މި ދަރިވަރުން ހޮވާފައިވަނީ ސީއެމްސީއޭ އާއި ދެ އަތޮޅުގެ ކައުންސިލް ތަކާ ގުޅިގެންނެވެ.
މިގޮތުން ށ. އަދި ނ. އަތޮޅުން ހޮވާލެވުނު 12 ދަރިވަރަކު ވަނީ ޗައިނާއަށް މިދިޔަ ޑިސެމްބަރު މަހު ސީއެމްސީއޭގެ ފަރާތުން 13 ދުވަހުގެ މުއްދަތަކަށް ގެންގޮސްފައެވެ.
ޝަމާ ފާހަގަކުރެއްވި ގޮތުގައި މިފަދަ ތަޖުރިބާ ދަތުރު ތަކުގެ ސަބަބުން އެހެން ގައުމުތަކުގެ ބަހާއ،ި ސަގާފަތާއ،ި ތާރީހަށް ދަރިވަރުންގެ އޮންނަ ހޭލުންތެރިކަމާއި ޝައުގުވެރިކަން އިތުރުވެގެން ދެއެވެ.
ޗައިނާ ދަތުރުގެ ތަޖުރިބާ ދަރިވަރުންގެ ދުލުން
މި ތަޖުރިބާ ދަތުރުގެ ބައިވެރިއެއް ކަމަށްވާ ށ. ފޯކައިދޫއަށް އުފަން ސަޚާ އިބްރާހިމް ވަނީ މިފަދަ ދަތުރެއް އިންތިޒާމްކޮށްދިން ސީއެމްސީއޭއަށް ޝުކުރު އަދާކޮށްފައެވެ. އަދި މި ދަތުރުގެ ސަބަބުން މިހާތަނަށް އިނގިފައިނުވާ ތަފާތު މައުލޫމާތު ތަކާއި ތަޖުރިބާތައް ހާއްސަކޮށް ޗައިނާގެ ސަގާފަތުގެ މުހިންމު ކަންކަން ދަސްވި ކަމަށް ބުނެފައެވެ. ޝަހާ ބުނި ގޮތުގައި ދަތުރު ކުރި ދުވަސްވަރަކީ އަހަރުގެ ފަހު ކޮޅަށް ވުމާއެކު އެ ގައުމުގެ ނިއު އިޔާ ސެލެބްރޭޝަންތައްވެސް ބަލާލުމުގެ ފުރުސަތު ލިބިގެންދިއުމަކީ އެންމެ އުފާވި އެއްކަމެވެ.
ދަތުރުގެ ތަޖުރިބާ "ދަ ޕްރެސް" އާއި ހިއްސާ ކުރަމުން ނ. ހޮޅުދޫ، އައިޝަތު އަހުދާ މާދް ބުނީ އެހެން ގައުމެއްގެ ބަޔަކާއި ބައްދަލުވެ އެމީހުންގެ ސަގާފަތް ދަސްކުރުމަށް މިއީ ލިބުނު ރަނުގެ ފުރުސަތެއް ކަމަށާއި، މި ދަތުރުގެ ސަބަބުން ދިރިއުޅުމަށް ފައިދާކުރާނެ ތަފާތު މައުލޫމާތުތައް ދަސްވެގެން ދިޔަ ކަމަށެވެ. މިއާއެކު އަހުދާ ފާހަގަކުރީ ޗައިނާއަށް ދަތުރު ދިޔަ ދުވަސްވަރަކީ އެ ގައުމަށް ފިނި މޫސުން ނުވަތަ ވިންޓާ ސީޒަން އަށް ވުމާއެކު އެއީ ތަޖުރިބާ ކުރެވުނު އާ ކަމެއް ކަމަށެވެ.
މީގެއިތުރުން ށ. މިލަންދޫ، އަބްދުﷲ މާނިއު އަކީވެސް މި ދަތުރުގައި ތަފާތު ތަޖުރިބާއެއް ކުރެވުނު ދަރިވަރެކެވެ. ދުނިޔޭގެ ހަތް އަޖައިބުން އެއް އަޖައިބު ކަމުގައިވާ ޗައިނާ ބޮޑު ފާރަށް އެރުމުގެ ހުވަފެން ސީއެމްސީއޭގެ މި ދަތުރުގެ ޒަރީއާއިން ހާސިލުވިކަން މާނިއު ފާހަގަކުރިއެވެ. ޗައިނާ ބޮޑު ފާރުގެ އިތުރުންވެސް ޗައިނާގެ އެކިއެކި އާސާރީ ތަންތަނަށް ޒިޔާރަތްކުރެވުން ކަމަށާއި، ތަފާތު ސަގާފަތެއް އެކްސްޕީރިއެންސް ކޮށްލަން ލިބުނު ކަމަށް މާނިއު ބުނެއެވެ.
މާނިއު ބުނިގޮތުގައި ރާއްޖޭގައި ކާ އާންމު ކާއެއްޗެއްސާއި ޗައިނާގައި ހުންނަ ކާތަކެތި ތަފާތު ވުމަކީ ދަތުރުގެ ފުރަތަމަ ކޮޅު އުނދަގޫވި ކަމެއް ނަމަވެސް މިފަދަ ތަޖުރިބާއެއް ލިބުންކަމީ އުފާކުރާ ކަމެކެވެ.
އެހެން ސަގާފަތްތަކުގެ އަގު ވަޒަންކޮށް އިހުތިރާމްކުރުމަކީ ތަފާތުތައް ނައްތާލާ، ވިސްނުން ތަރައްގީވުމަށް ފަހިވެގެންދާނެ މަގެއް
ސީއެމްސީގެ ޖެނެރަލް ސެކްރެޓަރީ ޝަމާ ވިދާޅުވި ގޮތުގައި އެހެން ސަގާފަތްތަކަށް އިހުތިރާމްކުރުމަކީ ހަމައެކަނި އާ އާދަކާދަތަކާ ތައާރަފުވުން ކަމަށް ދެކުމުގެ ބަދަލުގައި ސަގާފަތްތަކުގެ ތަފާތުތަކަށްވުރެ، އެއްބައިވަންތަކަން އިސްކުރަން ޖެހެއެވެ. އެހެން ސަގާފަތްތަކާއި މީހުންގެ ކިބައިން އަބަދުވެސް އުނގެނުމަށް ތައްޔާރަށް ތިބެން ޖެހޭކަން ފާހަގަކޮށް ޝަމާ ވިދާޅުވީ މިއީ ތަފާތުތައް ނައްތާލާ، ތިމާގެ ވިސްނުން ތަރައްގީވުމަށް ކޮށޭނެ މަގެއް ކަމަށެވެ. ސީއެމްސީއޭގެ ފަރާތުން ދޭން ބޭނުންވާ މެސެޖަކީވެސް މިއީ ކަމުގައި ޝަމާ ފާހަގަކުރެއްވިއެވެ.
ޝަމާ އިތުރަށް ވިދާޅުވީ ސީއެމްސީއޭގެ ފަރާތުން މި އަހަރަށްވެސް ހާއްސަ ކަންކަން ރާވާފައިވާ ކަމަށާއި އޭގެ ތެރޭގައި ރޭވިފައިވާ މައިގަނޑު ކަންތައްތަކަކީ، ކޮލެޖް/ޔުނިވަސިޓީ ދަރިވަރުންގެ "ޔޫތު ޑެލިގޭޝަން" ފުވައްމުލަކު ސިޓީގައި ޗައިނާ ބަހުގެ އަސާސީ ކޯހެއް ހިންގުން ކަމަށެވެ.
