ސިނގިރޭޓު މަނާކުރަންވީ އުމުރުފުރާއެއް ކަނޑައެޅުމަށް އާންމުންގެ ހިޔާލު ހޯދުމުގެ ގޮތުން އެކްސްގައި ރައީސް ޑރ. މުހައްމަދު މުއިއްޒު މިއަދު ޕޯލްއެއް ހުޅުއްވައިފިއެވެ.
މި ޕޯލްގައި ރައީސް ވަނީ މި ޖެނެރޭޝަނަލް ބޭން ފަށަން ފެންނަނީ ކޮން އުމުރުފުރާ އަކުންތޯ ސުވާލު ކުރައްވާ ރައްޔިތުންނަށް ފެންނަ ގޮތަކަށް ވޯޓު ދިނުމުގެ އިހުތިޔާރު ދެއްވާފައެވެ. ސިނގިރޭޓު މަނާކުރުމުގެ ވާހަކަ އެންމެ ފުރަތަމަ ރައީސް އިއުލާނުކުރައްވާފައިވަނީ 'ރައްޔިތުންނާ އެކު' ޕޮޑްކާސްޓްގެ ފުރަތަމަ އެޕިސޯޑުގައެވެ.
އެގޮތުން ރައީސް ވިދާޅުވީ ދުންފަތުގެ އިސްތިއުމާލުކުރަން ފެށުމުގެ ކުރިން އެކަން ހުއްޓުވިއްޖެނަމަ އެއީ އެންމެ ރަނގަޅު ގޮތް ކަމަށެވެ. އަދި ދުންފަތުގެ އިސްތިއުމާލުކުރަން ފެށިތާ ގިނަ ދުވަސް ނުވާ ކުދިން އެކަމުން ސަލާމަތްކުރަން ފަސޭހަވާނެ ކަމަށެވެ.
ޕޮޑްކާސްޓުގެ ދެވަނަ އެޕިސޯޑުގައި ރައީސް ވަނީ އެންމެ ބޮޑު އިސްކަމެއް ދެއްވާނީ އުމުރުން 18 އަހަރު ފުރުމުން ނުވަތަ ޒުވާން އުމުރުގައި ދުންފަތުގެ އިސްތިއުމާލު ކުރުން ހުއްޓުވަން ކަމަށް ވިދާޅުވެފައެވެ.
މިގޮތުން ހުށަހަޅާފައިވާ ގޮތްތަކަކީ:
- 2007 ވަނަ އަހަރުގެ ޖެނުއަރީ 1 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިންނަށް ސިނގިރޭޓާއި ދުންފަތުގެ އިސްތިއުމާލުނުކުރެވޭ ގޮތަށް ހެދުން
- 2004 ވަނަ އަހަރުގެ ޖެނުއަރީ 1 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިންނަށް ސިނގިރޭޓާއި ދުންފަތުގެ އިސްތިއުމާލުނުކުރެވޭ ގޮތަށް ހެދުން
- 2000 ވަނަ އަހަރުގެ ޖެނުއަރީ 1 އިން ފެށިގެން އުފަންވީ ހުރިހާ ކުދިން އަދި އުފަންވާނެ ހުރިހާ ކުދިންނަށް ސިނގިރޭޓާއި ދުންފަތުގެ އިސްތިއުމާލުނުކުރެވޭ ގޮތަށް ހެދުން
ރައީސް ވިދާޅުވީ ފަންނީގޮތުން މަޝްވަރާކުރުމަށްފަހު ގާނޫނެއް އުފައްދައިގެން މި 3 ގޮތުން ކުރެ ކޮންމެވެސް އެއްގޮތަކަށް ދުންފަތުގެ އިސްތިއުމާލުކުރުން މަނާކުރައްވާނެ ކަމަށެވެ. އޭރުން ކުރިއަށް އޮތް ޖީލު ސަލާމަތްކުރެވޭނެ ކަމަށް ރައީސް ވަނީ ވިދާޅުވެފައެވެ.
މިހާރު ވޭޕް މަނާކޮށްފައިވާކަން ފާހަގަކޮށް ރައީސް ވިދާޅުވީ ދެން އޮތް އަމާޒަކީ ސިނގިރޭޓާއި ދުންފަތުގެ އިސްތިއުމާލުކުރުމުން ޒުވާނުން ސަލާމާތްކުރުން ކަމަށެވެ. އަދި ބާރުއަޅަނީ އެކި އުމުރުފުރާގެ ފަރާތްތަކުން ވެސް ދުންފަތުގެ އިސްތިއުމާލުކުރުން ހުއްޓާލުމަށް ކަމަށެވެ.
