ހުޅުމާލެ ހިޔާ ފްލެޓުގެ އެޕާޓްމަންޓެއްގައި މީހަކު ރަހީނު ކޮށް އޭނާގެ އިނގިލި ބުރިކޮށްލަން އުޅުނު މައްސަލައިގެ ތުހުމަތުގައި ހައްޔަރު ކުރި މީހަކު ވައްކަމުގެ މައްސަލައެއްގައި ހައްޔަރުކޮށްފިއެވެ.
ވައްކަމުގެ މި މައްސަލާގައި ހައްޔަރު ކޮށްފައި ވަނީ މ. ކޮޅުފުށި، އާރެސް އުމުރުން 38 އަހަރުގެ ހަސަން ގާލިބްއެވެ.
ކްރިމިނަލް ކޯޓުން ވަނީ 15 ދުވަހުގެ މުއްދަތަކަށް ގާލިބު ބަންދުގައި ބެހެއްޓުމަށް އަމުރުކޮށްފައެވެ. ކްރިމިނަލް ކޯޓުގެ އަމުރުގައި ފާހަގަކޮށްފައިވާ ގޮތުގައި ގާލިބްއަކީ ގިނަ އަދަދެއްގެ ކުށުގެ ރެކޯޑް އޮތް މީހެކެވެ.
ހިޔާ ފްލެޓްގައި މީހަކު ރަހީނުކުރި މައްސަލައިގައި ގާލިބް ހައްޔަރުކޮށްފައި ވަނީ މިދިޔަ އަހަރުގެ ނޮވެމްބަރު މަހުގައެވެ. މި މައްސަލައިގައި ގާލިބުގެ އިތުރުން H9 ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމެންޓުން 11 މީހަކު ހައްޔަރުކުރިއެވެ.
އެ އެޕާޓްމެންޓްގެ ދޮރު ވައްޓާލައިގެން ފުލުހުން ވަން އިރު، ރަހީނުކުރި މީހާގެ ބޯ ބާލުވާފައި އޭރު އެމީހާގެ އިނގިލި ބުރިކޮށްލަން ތިބީ ތައްޔާރަށެވެ. އެ އެޕާޓްމެންޓްގައި މަސްތުވާތަކެތި ހުރި އިރު، އެތަނަކީ މަސްތުވާތަކެތީގެ މައްސަލައެއްގައި ފުލުހުން އެކި ފަހަރުމަތިން މީގެ ކުރިން ވެސް ރެއިޑް ކޮށްފައިވާ ތަނެކެވެ.
މި މައްސަލައިގައި ތުހުމަތު ކުރެވޭ މީހުންގެ މައްޗަށް ދައުވާ ކުރުމަށް ޕްރޮސެކިއުޓާ ޖެނެރަލް އޮފީސް (ޕީޖީ)އަށް މިދިޔަ ޑިސެމްބަރު މަހު ފޮނުވާފައިވާ ކަމަށް ފުލުހުން ވަނީ ބުނެފައެވެ.
