އިންޑިއާއިން ރާއްޖެއަށް ދީފައިވާ ކޯޓާގެ މިންވަރު ބޮޑުކޮށް، މި އަހަރާއި އަންނަ އަހަރަށް ކޯޓާ ދޭ މުއްދަތު އިތުރު ކޮށްފިއެވެ.
އިންޑިއާ ހައި ކޮމިޝަނުން ބުނީ، އިންޑިއާ އާއި ރާއްޖެ ދެމެދު އޮންނަ ގުޅުމުގެ ތެރެއިން ހާއްސަ ކޯޓާއެއްގެ ދަށުން އަބަދުވެސް އަސާސީ ބާވަތްތަކުގެ މުދާ އިންޑިއާއިން ރާއްޖެއަށް އެތެރެ ކުރާ ކަމަށެވެ. އެގޮތުން މި އަހަރާއި އަންނަ އަހަރަށް ކޯޓާގެ މުއްދަތު އިތުރުކޮށްފައި ވަނީ އެކި ބާވަތްތަކުން ކޯޓާ ދޭ މިންވަރު ވެސް އިތުރު ކުރުމަށް ފަހުއެވެ.
ކޯޓާއަށް ގެނައި ބަދަލަށް ބަލާއިރު، ފިޔާ، ބިސް، އަލުވި، ހަކުރު، ހަނޑޫ އަދި ފުށުގެ ކޯޓާ އިން 5 ޕަސެންޓް ވަނީ އިތުރު ކޮށްފައެވެ. އަދި މުގުން ދެމުން ދިޔަ ކޯޓާއިން ވަނީ 56 ޕަސެންޓް އިތުރު ކޮށްފައެވެ.
ކެއިން ބުއިމުގެ ބާވަތްތަކުގެ އިތުރުން އިމާރާތް ކުރުމުގެ ސިނާއަތަށް ބޭނުންވާ ހިލަ އާއި ހިލަވެލީގެ ކޯޓާ ވެސް 30 ޕަސެންޓް އިތުރު ކުރުމަށް އިންޑިއާ އިން ވަނީ ނިންމާފައެވެ.
މިއީ 1981 ވަނަ ކޯޓާ ދޭން ފެށި ފަހުން އެންމެ ބޮޑު އަދަދަކަށް ކޯޓާ ދެވުނު ފަހަރު ކަމަށް އިންޑިއާ ހައިކޮމިޝަނުން ބުނެއެވެ. އަދި މީގެކުރިން އިންޑިއާއިން ހަނޑޫ، ހަކުރު އަދި ފިޔާ ބޭރުކުރުން ހުއްޓާލި ނަމަވެސް ރާއްޖެއަށް ހާއްސަ ކޯޓާގެ ދަށުން މި ބާވަތްތައް ފޯރުކޮށްދިން ކަމަށާއި، މިހާރުވެސް އެގޮތަށް ކުރިއަށް ދާނެ ކަމަށް ބުނެއެވެ.
ރާއްޖޭގެ އިންސާނީ ތަރައްގީއަށް އަބަދުވެސް އިސްކަމެއް ދޭ ކަން ފާހަގަކޮށް އިންޑިޔާއިން ވަނީ މިއީ އެ ގައުމުގެ "ނެއިބަހުޑް ފަސްޓް ޕޮލިސީ"ގެ ދަށުން ކުރާ ކަމެއް ކަމަށް ބުނެފައެވެ.
