އެމްކިޔުއޭ އިން އެކްރެޑިޓް ކޮށްފައިވާ ޕްރޮގްރާމްތަކަކީ ހަމައެކަނި ދިވެހިރާއްޖޭގައި ހިންގުމަށް ހުއްދަ ދީފައިވާ ޕްރޮގްރާމްތަކެއް ކަމަށް މޯލްޑިވިސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ބުނެފިއެވެ.
މޯލްޑިވިސް ކޮލިފިކޭޝަންސް އޮތޯރިޓީގެ ފަރާތުން އެކްރެޑިޓޭޝަން ދީފައިވާ ބައެއް ޕްރޮގްރާމްތަށް ރާއްޖެ އިން ބޭރުގައި ހިންގާ މައްސަލަ ފެންމަތިވެފައިވުމާ ގުޅިގެން އެ އިދާރާއިން ނެރުނު ބަޔާނެއްގައި ބުނީ އެމްކިޔުއޭގެ ހުއްދައާއި ނުލައި އެ އިދާރާ އިން އެކްރެޑިޓް ކޮށްފައިވާ ޕްރޮގްރާމްތަށް ބޭރު ގައުމުތަކުގައި ހިންގައި ދަރިވަރުންނަށް ހަވާލުކުރެވޭ ސަނަދު ގަބޫލުނުކުރެވޭނެ ކަމަށެވެ.
އެމްކިޔުއޭގެ ހުއްދައާއި ހިލާފަށް ސަނަދު ދެވުމުގެ ސަބަބުން ރާއްޖެއާއި ރާއްޖެއިން ބޭރުގެ ދަރިވަރުންނަށް ގިނަ ގެއްލުންތަކާއި ކުރިމަތިލާން ޖެހިފައި ވާކަން ފާހަކޮށް، އެމްކިޔުއޭ އިން ވަނީ މިކަމުގެ ޒިންމާ ނުނަގާނެކަމަށް ބުނެފައެވެ.
މަތީ ތައުލީމުދޭ މަރުކަޒުތަކުން ރާއްޖެއިން ބޭރުގައި ޕްރޮގްރާމްތައް ހިންގަން ދިއުމަކީ ލިބޭ ކުރިއެރުމެއްކަން ފާހަގަކޮށް އެމްކިޔުއޭ އިން ބުނީ މިކަމާއި ގުޅުން ހުރި އުސޫލެއް އެކުލަވާލާ އާންމުކުރުމުގެ މަސައްކަތް ކުރަމުން އަންނަކަމަށެވެ.
މީގެ އިތުރުން އެމްކިޔުއޭ އިން ވަނީ ރާއްޖޭގެ މަތީ ތައުލީމުދޭ މަރުކަޒުތަކުން ޕްރޮގްރާމް އެކްރެޑިޓޭޝަން ދީފައިވާ ގޮތާއި އެއްގޮތަށް ކޯސް ހިންގުމަށް އިލްތިމާސްކޮށްފައެވެ.
