ހުޅުމާލޭގައި ސައިކަލެއްގައި މަޑުކޮށްގެން އިން މީހަކަށް ހަމަލާދިން ދެ މީހަކު ހައިވޭއިން ހައްޔަރު ކޮށްފިއެވެ.
ފުލުހުން ބުނީ ހުޅުމާލެ ބޯގަންވިލާ މަގު، ރެހެންދި ޓާފް ދަނޑު ހުޅަނގު ފަޅީގައި މަޑުކޮށްގެން އިން މީހަކަށް ސައިކަލެއްގައި ދިޔަ ބަޔަކު ހަމަލާ ދީފައިވާ މައްސަލަ ރޭ 23:35 އެއްހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. އެ މާރާމާރީގައި އަނިޔާވި މީހާއަށް ހުޅުމާލެ ހޮސްޕިޓަލުގައި ފަރުވާ ދިނުމަށް ފަހު މިހާރު ދޫކޮށްލާފައި ވާއިރު ފުލުހުން ބުނީ އެ މާރަމާރީ ހިންގާފަ އިވަނީ ކޯރާޑިއަކުން ކަމަށް މައުލޫމާތު ލިބިފައި ވާކަމަށެވެ.
މާރާމާރީ ހިންގި ކަމަށް ތުހުމަދު ކުރެވޭ ދެ މީހުން ފިލައިގެން ހައިވޭއިން މާލެ ދަނިކޮށް ހުއްޓުވައި ފުލުހުންގެ ބެލުމުގެ ދަށަށް ގެންގޮސްފައި ވާކަމަށް ފުލުހުން ބުނެއެވެ.
ފުލުހުން ބުނީ މި މައްސަލައިގައި ހައްޔަރު ކޮށްފައި ވަނީ 25 އަހަރާއި 19 އަަހަރުގެ މީހެއް ކަމަށެވެ. އެ މީހުން ހުއްޓުވި ސަރަހައްދުން މާރާމާރީ ހިންގަން ބޭނުން ކުރި ކަމަށް ތުހުމަތު ކުރެވޭ ހަތިޔާރު ފެނިފައިވާ ކަމަށާއި ވަޅިއެއް ވެސް ފެނިފައިވާ ކަމަށް ފުލުހުން ވަނީ ބުނެފައެވެ.
މި މައްސަލަ ފުލުހުން ގެންދަނީ ތަހުގީގު ކުރަމުން ކަމަށެވެ.
