ގަޟާ ގަދަރަށް އީމާންވާ މީހަކު ދިމާވެފައިވާ ކަންކަމާ ހިތާމަކޮށް ފުރާނައަށް ގެއްލުމެއް ނުދޭނެކަމަށް މިއަދުގެ ހުކުރު ހުތުބާގައި ބުނެފިއެވެ.
"ގަޟާ ގަދަރަށް އީމާންވުން"، މި މައުޟޫއަށް ހާއްސަކޮށްފައިވާ މިއަދުގެ ހުކުރު ހުތުބާގައި ބުނީ ދަތި އުނދަގޫކަމެއް ދިމާވުމުން އެފަދަ މީހަކު ބަލިކަށިވެގެން ވެސް ނުދާނެ ކަމަށާއި، ހުރިހާ ކަމެއް މެދުވެރިވެގެންދަނީ މާތް ﷲގެ އިލްމުފުޅާއި އެކަލާނގެ އިރާދަފުޅުންކަން ގަޟާ ގަދަރަށް އީމާންވާ މީހަކަށް އިނގޭނެ ކަމަށެވެ.
އެހެންކަމުން ދުނިޔޭގެ ދިރިއުޅުމުގައި ދިމާވާ ކަންކަމުގައި ބިރުގަނެ ހިތްނުތަނަވަސްވެ، މާޔޫސްވާކަށް ނުޖެހޭނެކަން ހުކުރު ހުތުބާގައިވަނީ ހަނދާންކޮށްދީފައެވެ. މާތް ﷲ މި ކައުނުގައި ލައްވައިފައިވާ ހުރިހައި ކަމެއް ލައްވައިފައިވަނީ އަޅުތަކުންގެ މަސްލަހަތަށްޓަކައިކަން ފާހަގަކޮށް ހުތުބާގައި ވަނީ އަހަރެމެންނަށް އެކަން އެނގުނުކަމުގައި ވިޔަސް އަދި ނޭނގުނު ކަމުގައި ވިޔަސް ހިނގާ ހުރިހާ ކަމަކީ އެ ކަމުގައި އެންމެ މަސްލަހަތު ހުރި ގޮތް ކަމަށް ބުނެފައެވެ. އެއާއެކު ގަޟާ ގަދަރަށް އީމާންވާ މީހުން ދިމާވެފައިވާ ކަންކަމާ ހިތާމަކޮށް ފުރާނައަށް ގެއްލުމެއް ނުދޭނެކަން ވެސް ހުތުބާގައިވަނީ ފާހަގަކޮށްފައެވެ.
އެއްވެސް އަޅަކަށް ނުއުފުލޭވަރުގެ ތަކުލީފެއް ނުޖައްސަވާނެކަމަށާއި، މާތް ﷲ އީ އެންމެ އަދުލުވެރި، އެއްވެސް އަޅަކަށް އަނިޔާވެރިވެވޮޑި ނުގަންނަވާ ރަސްކަލާނގެ ކަންވެސް މިއަދުގެ ހުކުރު ހުތުބާގައި ވަނީ ހަނދާންކޮށްދީފައެވެ. އީމާންކަމާއި ކެތްތެރިކަމުން ހިމާޔަތް ލިބިގެންފިނަމަ، ދުނިޔެއާއި އާހިރަތުގައި ދަރުމައާއި ސަވާބު ހިސާބެއްނެތި ދެއްވާނެކަމަށްވެސް ހުތުބާގައި ވަނީ ބުނެފައެވެ.
ގަޟާ ޤަދަރަށް އީމާންވުމަކީ އީމާންކަމުގެ ރުކުންތަކުގެ ތެރެއިން ހަވަނަ ރުކުނަށްވާއިރު، އީމާންކަމުގެ ރުކުންތަކުގެ ތެރެއިން ރުކުނަކަށް އިންކާރުކޮށްފި މީހާ އީމާންވި ކަމުގައެއް ނުވާނެ ކަމަށް ހުތުބާގައި ވަނީ ބުނެފައެވެ.
