ސްޓެލްކޯގެ ރެކްރިއޭޝަން ކުލަބު އަނެއްކާވެސް އުފައްދައިފިއެވެ.
އިއްޔެ ބޭއްވި އެ ކްލަބްގެ އިފްތިތާހީ ޖަލްސާގައި ސްޓެލްކޯގެ މެނޭޖިންގް ޑިރެކްޓަރު ހުސައިން ފަހުމީ ވަނީ ރެކްރިއޭޝަން ކުލަބަކީ ކުންފުނީގެ މުވައްޒަފުންގެ އަހުލާގު ހިފެހެއްޓުމުގައި މުހިއްމު ދައުރެއް އަދާކުރި ފަރާތެއް ކަން ފާހަގަކުރައްވާފައެވެ. ފަހުމީ ވިދާޅުވީ ރެކްރިއޭޝަން ކުލަބް އަލުން ވުޖޫދުކުރުމުގެ އެއް ބޭނުމަކީ އެ އަހުލާގު އަލުން މުވައްޒަފުންގެ ތެރޭގައި އަށަގެންނެވުން ކަމަށެވެ.
އޭރުގެ ސްޓެލްކޯގެ އިސްވެރިން ރެކްރިއޭޝަން ކުލަބް މެދުވެރިކޮށް ކުންފުނީގެ މުވައްޒަފުންގެ އަހުލާގު ވަކި ގޮތަކަށް ބައްޓަންކުރުމަށް ވަރަށް ބޮޑަށް ބާރުއެޅުއްވިކަން ފާހަގަކުރައްވާ ފަހުމީ ވިދާޅުވީ އޭރު ކުންފުނީގަ ތިބި ހުރިހާ ފަރާތްތަކަކީވެސް ނަމޫނާ މުވައްޒަފުންތަކެއް ކަމަށެވެ.
މީގެއިތުރުން މި ރަސްމިއްޔާތުގައި ސްޓްލްކޯގެ ޑެޕިއުޓީ މެނޭޖިން ޑިރެކްޓަރު އަބްދުﷲ ނާޒިރު ވިދާޅުވީ، އެސްއާރްސީ އަކީ ގައުމީ ފެންވަރުގެ ހިދުމަތްތެރި، މޮޅު މީހުން އުފައްދާފައިވާ ކާމިޔާބު މާޒީއެއް އޮތް ކުލަބެއް ކަމަށާއި، ރެކްރިއޭޝަން ކުލަބަކީވެސް މާޒީއެއް އޮތް އަދި އެ މާޒީގައި ވަރަށް ރަނގަޅު ނަތީޖާތަކެއް ދައްކައިދީފަ އޮތް ކުލަބެއް ކަމަށެވެ.
ނާޒިރު އިތުރަށް ވިދާޅުވީ މުވައްޒަފުންގެ އެއްބައިވަންތަކަމާއި ދުޅަހެޔޮކަމަށްޓަކާ ކުރަންޖެހޭ ހުރިހާ މަސައްކަތްތަކެއް އެސްއާރްސީގެ ހަރަކާތްތަކުގެ ތެރެއިން ކުރެވިގެންދާނެ ކަމަށެވެ.
މި ރަސްމިއްޔާތުގައި ސްޓެލްކޯ ރެކްރިއޭޝަން ކުލަބުން މި އަހަރު ހިންގުމަށް ހަމަޖެހިފައިވާ ހަރަކާތްތަކާއި މި އަހަރު ބައިވެރިވުމަށް ހަމަޖެހިފައިވާ އެކިއެކި މުބާރާތްތައް ހިމެނޭ އެކްޓިވިޓީ ކަލަންޑަރެއްވެސް ވަނީ އިޢުލާނުކޮށްފައިވެއެވެ. އަދި ކުލަބްގެ ވެބްސައިޓާއި ލަވަވެސް މި ރަސްމިއްޔާތުގައި އިފްތިތާހުކޮށްފައިވާއިރު، ކުލަބްގެ ހަރަކާތްތައް ޕްރޮމޯޓްކުރުމަށާއި، ކުލަބް ކުރިއެރުވުމަށް ކަނޑައަޅާފައިވާ މަންދޫބުންނާއި އެމްބެސެޑަރުންގެ ގޮތުގައި ހަމަޖެއްސި ފަރާތްތައް އިއުލާނުކޮށް، އެ ފަރާތްތަކަށް ސެޓްފިކެޓު ހަވާލުކުރުންވެސް ވަނީ ކުރިއަށް ގެންގޮސްފައެވެ.
