ޗައިނާގެ އާ އަހަރުގެ ތަހުނިޔާ އެ ގައުމުގެ ރައީސާއި ބޮޑުވަޒީރަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުއްވައިފިއެވެ.
ޗައިނާގެ އިސްވެރިންނާއި އެ ގައުމުގެ ރައްޔިތުންނަށް އާ އަހަރުގެ ތަހުނިޔާ އަރިސް ކުރައްވަމުން ރައީސް އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، މިއަހަރަކީ ޗައިނާގެ ރައްޔިތުންނަށް ފާގަތިކަމާއި ސިއްހަތާއި އުފާވެރިކަން ގެނެސްދޭ އަހަރަކަށް ވުމަށް އެމަނިކުފާނު އެދިވަޑައިގަންނަވާ ކަމަށެވެ.
އަދި ޗައިނާއާއި އެކު އޮތް ގާތް އަދި ދެމެހެއްޓެނިވި ރަހުމަތްތެރިކަން ދިވެހިރާއްޖެއިން އަބަދުވެސް ފާހަގަކޮށް ރައީސް އިތުރަށް ވިދާޅުވީ، ދެ ގައުމު ގުޅިގެން އެއްބަޔަކު އަނެއްބަޔަކަށް އިހްތިރާމާއެކު ހިއްސާކުރެވޭ އުންމީދުތަކެއްގެ މައްޗަށް ރަނގަޅު ޕާޓްނާޝިޕެއް ބިނާކުރެވިފައިވާކަމަށެވެ. އަދި ކުރިއަށް އޮތް ތަނުގައި ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެ ދެގައުމަށްވެސް އިތުރު ފައިދާތަކެއް ލިބިގެންދާނެކަމަށް ވެސް އެމަނިކުފާނު ވިދާޅުވިއެވެ.
ރައީސް ވެރިކަމާ ހަވާލުވެވަޑައިގެންނެވި ފަހުން ކުރެއްވި ފުރަތަމަ ދަތުރުފުޅުވެސް ހާއްސަކުރެއްވީ ޗައިނާއަށް ކަމަށްވާއިރު ދެ ގައުމުގެ ގުޅުން ބަދަހި ކުރުމަށް ދެ ގައުމުން ވެސް ދަނީ ގިނަ މަސައްކަތްތަކެއް ކުރަމުންނެވެ. އެ ދަތުރުފުޅުގައި ވެސް ފުށިދިއްގަރުފަޅު ތަރައްގީކުރުން ހިމެނޭ ގޮތަށް ޗައިނާއާއެކު 20 އެއްބަސްވުމެއްގައި ވަނީ ސޮއިކޮށްފައެވެ.
ހަމައެއާއެކު ރާއްޖެއިން ޗައިނާއާއެކު ހަދައިފައިވާ މިނިވަން ވިޔަފާރީގެ އެއްބަސްވުން (އެފްޓީއޭ)އަށް މި އަހަރު އަމަލު ކުރަން ފަށާފައިވާއިރު މި އެފްޓީއޭ އިން ޗައިނާއިން ރާއްޖެއަށް އިމްޕޯޓްކުރާ 70 އިންސައްތަ އައިޓަމުން ޑިއުޓީ ކަނޑާލެވޭނެއެވެ. އޭގެ ތެރޭގައި ދަގަނޑާއި، ފަރުނީޗަރާއި ތަރުކާރީ އަދި މޭވާގެ ބާވަތްތަކުގެ އިތުރުން ކަނޑުމަހުގެ ބާވަތްތައް ހިމެނެ އެވެ.
ރާއްޖެއަށް އެންމެ ގިނައިން ޗައިނާއިން މުދާ އެތެރެކުރާ ޝަންޑޮންގް ޕްރޮވިންސުގެ ކުންފުންޏަކުން އެ ގައުމުގެ ނޫހަކަށް ދިން އިންޓަވިއުއެއްގައި ބުނީ އެފްޓީއޭގެ ސަބަބުން އެ ކުންފުނިން މުދާ އެކްސްޕޯޓްކުރާ އަދަދު މި އަހަރުގެ ތެރޭގައި 20 އިންސައްތައަށް އިތުރުވެގެންދާނެ ކަމަށް ވަނީ ލަފާކޮށްފައެވެ.
