އިހަވަންދޫގައި ތަރައްގީގެ ގިނަ މަޝްރޫތަކެއް ހިންގުމަށް ނިންމާ އެއްބަސްވުންތަކުގައި ސޮއިކޮށްފިއެވެ.
ރައީސް ޑރ. މުހައްމަދު މުއިއްޒު ހއ. އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު އެ ރަށަށް ވަޑައިގެން ތިލަދުންމަތީ އުތުރުބުރީ އިހަވަންދޫގައި ހޮސްޕިޓަލެއް އެޅުމަށް އެއްބަސްވުމުގައި ވަނީ ސޮއިކޮށްފައެވެ. މި އެއްބަސްވުމުގައި ސޮއިކުރައްވާފައިވަނީ ހެލްތް މިނިސްޓަރު އަބްދުﷲ ނާޒިމާއި އާރްޑީސީގެ މެނޭޖިންގް ޑިރެކްޓަރު، ބްރިގޭޑިއާ ޖެނެރަލް ރިޓަޔާޑް އަލީ ޒުހައިރު އެވެ.
ފާހަގަކޮށްލެވޭ ގޮތުގައި މިރަށުގައި ހޮސްޕިޓަލެއް އެޅުމަކީ ރައީސް ޑރ. މުއިއްޒުގެ ރިޔާސީ ވައުދުފުޅެކެވެ. ރައީސް ވަނީ ހޮސްޕިޓަލުގައި ޑައިލިސިސް ހިދުމަތް ފެށުމަށް ވާން ޖެހޭ ތައްޔާރީތައް ވަމުންދާކަމަށާއި، ޑައިލެސިސްގެ ހިދުމަތް ރޯދައިގެ ކުރިން، ފެބްރުއަރީގައި ފެށިގެންދާނެ ކަމަށް ވިދާޅުވެފައެވެ.
މީގެއިތުރުން އިހަވަންދޫގައި ފިޝަރީޒް ކޮމްޕްލްކްސްއެއް އެޅުމުގެ މަޝްރޫއު ފެށުމުގެ ގޮތުން އެ ތަނުގެ ބިންގާވެސް ވަނީ މިއަދު އަޅާފައެވެ. މިތަނުގެ ބިންގާ އަޅުއްވައި ދެއްވީ ފިޝަރީޒް މިނިސްޓަރު އަހުމަދު ޝިޔާމާއި މިފްކޯގެ ސީއީއޯ ޑރ. ވިޓާލީ ލުބިމޯވް އާއި އެ ރަށު ކައުންސިލްގެ ރައީސް އަހުމަދު ސޮބާހުއެވެ.
މޯލްޑިވްސް އިސްލާމިކް ބޭންކް (އެމްއައިބީ) ގެ އެހީގައި އަޅާ މި ފިޝެރީޒް ކޮމްޕްލެކްސްގައި 1000 ޓަނުގެ ކޯލްޑް ސްޓޯރޭޖަކާއި، 50 ޓަނުގެ ބްރައިން ފްރީޒް ފެސިލިޓީއެއްގެ އިތުރުން އޮފީސް އިމާރާތާއި އިންޖީނުގެ އަދި ގުދަނެއްވެސް ހުންނާނެ ކަމަށް ރައީސް ވަނީ ވިދާޅުވެފައެވެ. ރައީސް ވިދާޅުވީ 3.5 މީޓަރުގެ ފުން 3 ޕޮއިންޓުން މަސް ކިރޭ ބަނދަރެއްވެސް އެޅިގެން ދާނެ ކަމަށެވެ.
މި ރަށުގައި ޕާސްޕޯޓު ދޫކުރުމާއި، އައިޑީކާޑު ޕްރިންޓު ކޮށް ދޫކުރުންވެސް ރައީސް ވަނީ އިފްތިތާހު ކޮށްދެއްވާފައެވެ. މީގެއިތުރުން އެރަށުގެ ހުރަވީ ފުޓުބޯޅަ ދަނޑު ތަރައްގީ ކުރުމުގެ އެއްބަސްވުމުގައިވެސް ވަނީ ސޮއިކޮށްފައެވެ.
