ލޯބިވެރިޔާގެ ކުރީގެ ފިރިމީހާގެ ސައިކަލުގައި ރޯކޮށްލި މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ ފުވައްމުލަކު ސިޓީއަށް ނިސްބަތްވާ އުމުރުން 21 އަހަރުގެ ފިރިހެނެކެވެ.
އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުން ކޯޓުން ވަނީ އޭނާ 15 ދުވަހަށް ބަންދު ކުރުމަށް އަމުރުކޮށްފައެވެ.
ކޯޓު އަމުރުގައި ފާހަގަކޮށްފައިވާ ގޮތުގައި ޝަރީއަތުގެ މަޖިލީހުގައި އޭނާ ވަނީ ކުށަށް އިއުތިރާފް ވެފައެވެ. އަދި އޭނާ ބުނެފައި ވަނީ އެއީ މަސްތުގެ ހާލަތުގައިހުރެ ކުރެވުނު ކުށެއް ކަމަށާއި ގެއްލުންދިން ސައިކަލަކީ މީނާ ލޯބީގެ ގޮތުން ގުޅިގެން އުޅޭ ފަރާތުގެ ކުރީގެ ފިރިމީހާގެ ސައިކަލު ކަމަށެވެ.
އޭނާ ރޯކޮށްލާފައި ވަނީ ޖަނަވަރީމަގު ވެލިގާ ހާޑްވެއާ ކައިރީ ސައިކަލު ބަހައްޓާފައި ހުއްޓައެވެ. ހާދިސާ ހިނގި ސަރަހައްދުގައި އޭނާ ހަރަކާތްތެރިވާތަން ސީސީޓީވީ ސްނެޕްޝޮޓްތަކުން ފެންނަކަން ވެސް ކޯޓު އަމުރުގައި ފާހަގަކޮށްފައިވެއެވެ.
މުޖުތަމައުގެ ސަލާމަތާއި ރައްކާތެރިކަމަށްޓަކައި އޭނާ ބަންދުގައި ބަހައްޓަންޖެހޭ ކަމަށް ކަނޑައަޅާފައިވާއިރު އޭނާއަކީ ކުށްކުރާ ޖަމާއަތަކަށް ނިސްބަތްވާ މީހެއްކަމަށް ފުލުހުން ބުނެފައިވާކަން ކޯޓު އަމުރުގައި ފާހަގަކޮށްފައިވެއެވެ.
